Hemu Tua Besik Xefe Aldeia Nia Uma, Katuas Vasco Hetan Tuda Iha Madrugada
Imajem : Vasco Cabecas de Araujo ne’ebe hetan tuda iha Dili, 07/09/2025. Foto : Média PNTL, Serviço Relações Públicas.
SAPNewsTL, Dili : Polisia Nasional Timor-Leste (PNTL), liu hosi Servisu Informasaun Polísia Makikit Ekipa Alfa junta ho Eskuadra Vera-Cruz no Forsa Rezerva, neutraliza kazu asaltu iha Aldeia Lemorai, Suku Vila-Verde, Postu-Administrativu Vera-Cruz Munisipiu Dili.
Kazu ne’e akonntese iha loron domingu, tuku tolu madrugada no ekipa servisu to’o iha fatin akontesimentu suspeitu sira konsege halai no hetan deit vitima ida ho naran Vasco Cabecas de Araujo tinan 64, ne’ebe hetan kanek grave tanba fatuk kona iha parte ibun.
Tuir deklarasaun vitima katak, nia toba hela rona joven lubun boot ida hakilar dehan “milisia” no kontinua tuda nia uma hodi la fó hakmatek ba komunidade sira.
“Halo trauma ba labarik ki’ik, feto no inan sira ne’ebé hela iha area refere. Hafoin situasaun hakmatek vitima lori lampada leno sai mai liur joven grupu ida tuda hasoru kedas hodi rezulta ibun ran tanba fatuk maka kona”. Sita Média PNTL, Serviço Relações Públicas. Dili, 07/09/2025
Vitima hatutan, antes ne’e ema tuda ona nia kareta rahun ona iha fulan jullu 2024, tuir mai tuda rahun janela no baku rahun motor ida no ikus mai iha dezembru baku rahun lampu ne’ebe fo naroman ba estrada nian.
Maske PNTL iha ona terenu hodi neutraliza situasaun, joven sira kontinua tuda hasoru no Xefi Ekipa orienta kedas membru sira lao ain tama sai komunidade nia uma let maibe suspeitu sira subar hotu.
Xefi Ekipa mos tenta halo koordenasaun ho autoridade lokal atu identifika joven sira-nia identidade tanba antes ne’e joven sira halibur malu hemu tua besik Xefi Aldeia nia uma maibe ekipa dere odamatan bolu mos Xefi Aldeia la sai mai.
Hare ba situasaun komesa manas xefi ekipa orienta kedas Forsa Rezerva atu mantein seguransa hodi fo apoiu ba komunidade iha area refere, nune’e labele mosu tan Kazu asaltu no tuda uma hodi perturba ordem publika.