Husik Uma Estadu ! Alkatiri : “Presidente Lu Olo Preokupadu Tebes, La Hatene Atu Ba Ne’ebe ?”
Imajem : Eis Primeiru Ministru Marí Alkatiri iha Kintal-Boot Dili, 28/09/2025. Foto : Média Ex GPM
SAPNewsTL, Dili : Durante partisipa iha Atividade Asembleia Suku iha suku Santa Cruz, Dili. Sekretariu Jeral Partidu FRETILIN Marí Bin Amude Alkatiri deklara sei husik Residênsia Farol ne’ebe uza durante ukun rasik an maibe nia preokupa Eis Presidente República Francisco Guterres Lu Olo tanba la hatene atu ba ne’ebe.
Fundador & Secretario Geral Dr. Mari Alkatiri fo sai lia hirak ne’e tanba iha ona desizaun hodi eis titular husik uma estadu nian ligadu ho revogasaun lei pensaun vitalísia ne’ebe Parlamentu Nasionál aprova foin lailais ne’e.
Marí Alkatiri hateten nia parte foti ona sasan balun hodi muda ba uma tanba laiha direitu ba uma estadu.
“Ha’u agora foti hela sasan atu muda uma, tanba ha’u laiha direitu ona ba uma estadu, ha’u fundador ha’u fo tinan 55 husi ha’u-nia tinan-75 ba rai ida ne’e no povu ida ne’e agora laiha direitu”.
“Se ha’u deit mak laiha direitu, problema mak ha’u, ha’u laiha direitu, labuat ida mais favor ida labele dudu tan ema seluk ba kiak, labele dudu tan saida mak agora dadaun sira simu ba sira nia moris no ba sira oan dudu sira ba kiak ne’e laloos”. Hateten Sekretariu Jeral FRETILIN Marí Alkatiri iha Kintal-Boot, 28/09/2025. Sita página Oficial Marí Alkatiri
Alkatiri husu, karik iha lider polítiku balun la gosta, bele hasoru nia hodi ko’alia.
“Se la gosta ha’u hasoru ha’u deit, ha’u hasoru imi, ohin dala ikus mak ha’u mai ho seguransa polisia.” Afirma Alkatiri
Eis Presidente República Francisco Guterres Lu Olo mós sei husik hela fatin tanba uma ne’ebe nia uza kategoria uma estadu nian.
Alkatiri informa, “la’os ha’u deit, Presidente Lu Olo mós atu sai, ha’u foin simu telefonema hosi Presidente Lu, nia preokupadu tebes tanba nia la hatene atu ba ne’ebe, se ba ami mak sira halo ona hanesan ne’e, se ba povu, sira sei la respeita liu”. Sublinha Alkatiri
Iha sorin seluk, Eis Presidente República no Eis Primeiru Ministru Taur Matan Ruak mós sei husik Residênsia Farol ne’ebe durante ne’e uza, oras ne’e hahú arruma ona sasan balun ne’ebe konsidera privadu hodi lori ba uma.
Lembra falu katak iha loron 23 fulan Setembru 2025, Eis Primeiru Ministru Taur Matan Ruak hala’o mós sorumutu ho eis Primeiru Ministru Marí Bin Amude Alkatiri iha Residênsia Farol.