Expo Iha Oe-Cusse ! “Promove Foinsa’e Iha Setór Produtivu, Investe Agora”
Imajem : OXFAM hamutuk ho parseiru sira realiza exposição iha Oe-Cusse, 23/09/2025
SAP News TL, RAEOA : Partnership for Inclusive Prosperity (PROSIVU sigla Inglés) ho finansiamentu husi Department of Foreign Affairs and Trade (DIFAT) realiza expozisaun ho tema “Promove Foinsa’e iha Setór Produtivu, Investe Agora” no reforsa produtividade foinsa’e iha area rurais.
𝐄𝐫𝐦𝐞𝐥𝐢𝐧𝐝𝐚 𝐒𝐨𝐚𝐫𝐞𝐬 – 𝐒𝐀𝐏𝐍𝐞𝐰𝐬𝐓𝐋
Tuir Country Diretor OXFAM iha Timor-Leste Pankay Anand hatete, eventu ida ne’e importante tanba envolve partisipasaun barak hodi loke espasu dialogu aberta ho foinsa’e produtivu sira hodi halo investimentu.
“Ita sei haree juventude husi grupu produtivu sira partilla informasaun kona-ba atinjimentu no fallansu ne’ebe durante sira hasoru iha sira-nia kna’ar servisu, iha setor produtivu”. Dehan Diretor OXFAM, Pankay Anand, iha Palanan Pante Makassar, Segunda-Feira 23/09/2025.
Nia salienta, exposisaun ida ne’e fó oportunidade ba grupu foinsa’e produtivu sira, atu hetan formasaun teknika, apoiu finanseiru no espasu komunikasaun hodi hadia dezafiu ne’ebe foinsa’e sira hasoru.
“Ita haree ba juventude grupu produtivu sira atu servisu hamutuk, haree oinsa sira bele fahe sira-nia informasaun kona-ba kria oportunidade ba setor produtivu sira, tanba ita espera katak sira sei hetan oportunidade no alinamentu formasaun teknika no apoiu ho finanseiru”.
Iha fatin hanesan, Diretor Mata Dalan Institutu (MDI) Estevanos Coli reforsa, exposisaun refere hetan apoiu husi DIFAT liu husi PROSIVU hodi implementa.
“Ita hetan apoiu fundu husi Partnership for Inclusive Prosperity (PROSIVU) ho finansiamentu husi Department of Foreign Affairs and Trade (DIFAT) apoiu fundu 38 mil implementa husi MDI, entaun ita koloka ba atividade diferente la’os ba exposisaun de’it maibé iha intervest metting ho komunidade sira ho autoridade lokal kona-ba dezenvolvimentu infransturtura ne’ebe kanaliza ba diversifikasaun”.
Nia hatutan, kolabarosaun entre grupu sira iha projetu hakfoun grupu produtu foinsa’e sira ne’e hala’o iha munisipiu 13 inklui Sub Regiaun Oe-kusse.
“Expozisaun ida ne’e laos atu hatudu de’it kona ba produtu maibé oinsa maka foinsa’e sira bele aprende no fahe esperensia ba malu kona-ba meius ne’ebe uza hodi bele dezenvolve setor produtivu iha ita-nia rain”.
Kordenadora Grupu Foinsa’e Tali Laran Dili, Zelia Ribeiro, hatete, difikulade ne’ebe grupu hasoru maka laiha traktór atu fera rai, tanba iha grupu ne’e kuda mós Pateka, ai-manas, tomate, tanba ne’e presiza makina atu bele fila rai.
“Ami agradese tanba atividade expozisaun ne’e halai liu ba tema katak investe agora, oportunidade kapas mai grupu foinsa’e sira ne’ebe halo produsaun hodi hato’o problema saida mak grupu produtivu sira hasoru iha sira nia atividade sira”.
Entretantu, atividade ne’e realiza husi OXFAM ne’ebe parseria hamutuk ho Alumni Parlamentu Foinsa’e Timor-Leste (APFTL), Mata Dalan Institute (MDI), Asosiasaun Jornalista Timor-Leste (AJTL), Timor-Leste Organic Fertilizer (TILOFE), Ermera Ai-kulat Mutin Organiku (EAMO) no Forum Juventude Defisiensia Timor-Leste (FJDTL).