𝗚𝗼𝘃𝗲𝗿𝗻𝘂 𝗘𝘀𝘁𝗮𝗯𝗲𝗹𝗲𝘀𝗲 𝗥𝗮𝗱𝗶𝘂 𝗞𝗼𝗺𝘂𝗻𝗶𝗱𝗮𝗱𝗲 𝗙𝗿𝗼𝗻𝘁𝗲𝗶𝗿𝗮 𝗛𝗼 𝗙𝗿𝗲𝗸𝘂𝗲𝗻𝘀𝗶𝗮 𝟵𝟴.𝟯 𝗠𝗵𝘇

Imagem : SEKomS Expedito Días Ximenes iha Balibo, 15/10/2025

SAP News TL, Bobonaro : Sekretáriu Estadu Komunikasaun Sosial Expedito Loro Dias hamutuk ho Presidente Conselho Imprensa no Komunidade Balibó Villa lansa Radiu Komunidade Fronteira Balibo 5 ho frekuensia 98.3 Mhz, lian ba fronteira hamutuk hari’i dame no dezenvolvimentu liu husi informasaun.

Administrador Postu Administrativu Balibo Casimeiro dos Santos agradese ba nonu guvernu konstitusional liu hosi Sekretariu Estadu Komunikasaun Sosiál tanba bele hari’i ona radiu iha komunidade iha Balibo five.

“Edifísiu foun ida ne’ebé mak durante ne’e ami hein ho esperansa ohin bele realiza duni no halo lansamentu, agradese ba IX governu ne’ebé mak rona duni ami komunidade Postu Balibo nia halerik ohin loron rádiu ne’e bele hari’i duni iha Balibo”. Hateten Administrador Postu Administrativu Balibo Casimeiro dos Santos iha Balibo, 15/10/2025

Iha fatin hanesan Jestór Rádiu Komunidade Fronteira Balibo 5, Samuel dos Santos Soares hatutab, “Rádiu ne’e ho naran Balibo 5 tanba ita hotu hatene katak jornalista nain lima (5) ne’ebé mak lakon sira-nia vida iha fatin ida ne’e tanba hakarak espalla ita-nia luta nain sira-nia esforsu hodi luta ba rai ida ne’e no ikus mai ita hetan ukun rasik-an”.

“Ami iha de’it komputador ida hodi halo servisu, ami iha mós problema kona-ba sekuensia rádiu ne’ebé labele perkore Balibo laran tomak, tanba liña internet ne’ebé la di’ak, maibé nu’udar jestór iha tempu badak nia laran, ha’u sei halo pedidu ida ba iha SECOMS atu bele rezolve problema sira ne’ebé mak ami enfrenta, atu nune’e ita bele garante katak rádiu ida ne’e bele sai di’ak liu tan iha futuru”, dehan nia.

Nia dehan, “Rádiu komunidade ita hanaran komunidade katak husi povu ba povu no fila fali ba povu, la signifika katak ami hirak ne’ebé hakna’ar an iha rádiu ne’e ami nian ne’e lae, maibé ida ne’e komunidade hotu-hotu iha Balibo nian”.

Sekretariu Estadu Komunikasaun Sosiál Expedito Loro Dias Ximenes hatete, “Edifisiu ida ne’e nakonu ho istória tanba ita hotu hatene katak iha tempu difisil jornalista nain lima (5) husi hela sira-nia servisu no sira-nia família ho sakrifisiu bo’ot defende lia loos, defende ita-nia liberdade no defende direitu povu Timor-Leste nian, tanba ne’e mak edifisiu ida ne’e ita tau naran Rádiu Komunidade Fronteira Balibo 5, atu ita fó omenajen fó ita nia respeitu ba ita nia jornalista nain lima (5)”.

“Rádiu komunidade sira-nia papel importante mak atu atende atividade komunidade nian, la signifika katak dirijentes estadu nian la halo, maibé ha’u sempre fó hatene ba rádiu komunidade sira iha munisípiu hotu-hotu katak se bele 60% ba atividade komunidade nian no 40% ba atividade estadu ka governu nian”.

“Agora rádiu komunidade ne’ebé mak ita rejista iha rua nulu resin rua (22), planu iha tinan oin ita sei apoia tan rádiu rua (2) iha Baguia no Fatumea ne’ebé mak sira-nia proposta mai no iha fulan oin ekipa sei ba halo survei fatin hodi hare’e katak bele ka lae rádiu komunidade hari’i iha ne’eba”.

Entretantu, orsamentu ne’ebé SECOMS utiliza hodi apoia ba edifisiu Rádiu Komunidade Fronteira Balibo 5, hamutuk rihun ruanulu resin.

Serimonia lançamentu ne’e hetan mós partisipasaun hosi autoridade lokal, komunidade no lideransa média sira iha Timor-Leste.