Papa Kanoniza Beatu Na’in 7 ! “Mate Ba Lialos La’os Derrota Maibé Vitória”
Imagem : Beatu na’in ne’ebe hetan kanonizasaun ba Santu hosi Papa Leão XIV iha Vaticano, 19/10/2025. Foto : Vatican News
SAP News TL, Vaticano : Papa Leão XIV prezide misa kanonizasaun ba beatu na’in hitu iha Prasa São Pedro hanesan Ignacio Maloyan, Pedro To Rot, Vincenza Maria Poloni, Maria Carmen Rendiles Martínez, Maria Troncatti, José Gregório Hernández Cisneros, no Bartolo Longo.
Papa Leão XIV kanoniza santu foun hitu iha Igreja Katólika, entre sira ida mak Peter To Rot, Katekista ida husi Papua Nova Guiné.
Durante Funu Mundiál Daruak, bainhira ezérsitu Japaun nian haleu Leste Nova Bretaña , inklui Papua Nova Guiné, sira hamrik firme hodi haklaken fiar, lialos no resiste hasoru inimigu.
Igreja sira taka metin, bandi sira halo orasaun, ema neʼebé brani atu temi Jesus nia naran, tau sira-nia moris iha risku. Maibé iha nakukun ne’e nia leet hamriik Katekista ida naran Peter To Rot, ema ida ne’ebé moris no boot iha Papua Nova Guiné. Nia ema simples ida, defende an de’it ho fiar.
“Sira haruka nia para atu haklaken. Nia rekuza. Ho segredu, nia kontinua habelar fiar. Maske bandu ema kristaun atu kaben. Nia defende no kontinua prepara sira ba kaben. Nia La tauk”.
“Sira koko atu sobu nia espíritu. Nia hamnasa no kontinua sarani, hanorin, no reza iha segredu”. Sita Page Tentang Katolik, 19/10/2025.
Soldadu Japonés sira tauk ninia kbiit ne’ebé la haree, ahi fiar nian ne’ebé labele hamate ho surik ka kilat-musan. Nune’e sira kaer nia hodi hatama iha sela ida, no halo nia nonook ho venenu.
“Maibé nia mate la’ós derrota. Ida-ne’e maka vitória. Peter To Rot nia ran sai hanesan fini korajen ba jerasaun Papua Nova Guine oan sira”.
Nia naroman nafatin lakan maka’as liu fali nakukun ne’ebé koko atu halakon nia. Nia mate lahó arma, maibé nia manán buat hotu ho fiar, domin no esperansa.
Laiha prizaun ida maka bele rai lia-loos. Laiha venenu ida maka bele oho klamar ne’ebé sunu ba Maromak.
“São Pedro To Rot, harohan mai ami, haraik mai ami Ita-nia ahi, Ita-nia domin neʼebé la taʼuk, Ita-nia fiar neʼebé la nakdoko”.