TLPU Triste Ema Akadémiku Harahun Liberdade Imprensa, “Jornalista La’os Inimigu”.

Imajem : Presidente TLPU Candido Alves iha Sede AJTL Fatuhada, 22/10/2025.

SAPNewsTL, Díli : Prezidente Timor-Leste Press Union (TLPU) Candido Alves, deklara, públiku presija respeitu jornalista, tanba jornalista laos inimigu, maibé jornalista amigu ba ema hotu, tantu ema ki’ak no ema riku.

𝐆𝐮𝐢𝐥𝐡𝐞𝐫𝐦𝐢𝐧𝐨 𝐑𝐚𝐦𝐨𝐬 𝐝𝐚 𝐂𝐫𝐮𝐳 – 𝐒𝐀𝐏𝐍𝐞𝐰𝐬𝐓𝐋

Tuir Prezidente TLPU hateten, publiku tomak presija iha dever moral, no etika hodi valoriza no respeitu servisu jornalista nian, tanba husi obra jornalista, hanoin publiku rejiste kontra
injustisa sosiál no kazu sensitivu sira.

“Husi oportunidade ida ne’e husu nafatin ba ema atu respeitu trabalhador jornalista sira-nia atividade, tanba jornalista la’ós inimigu maibé jornalista amigu ba ema hotu no jornalista sai professor ba ema hotu” Dehan Lideransa TLPU liu husi Konferénsia Imprensa iha salaun AJTL Fatuhada, (22/10/2025).

Antigu jornalista timoroan ne’e aprofunda, Wainhira ema ida asessu obra jornalista nian iha plataforma online no média konvensional sira hatudu katak ema ne’e aprende buat balun husi obra jornalista nian.

“Estudante ne’ebe halo agresaun fizika hasoru jornalista, nia la komprende duni ba jornalista nia atividade ou nia sengaja tanba nia iha kazu ou isin kanek, tanba ne’e labele haree jornalista hanesan inimigu, tanba jornalista sai manorin ba ema barak, aprende husi obra ne’ebe jornalista kria” Tenik nia.

Hanesan jornalista nia parte senti triste tebes, tanba aktu violentu ne’ebe estudante balun husi Univerdade Dili (UNDIL) halo hasoru jornalista, ameasa ba liberdade imprensa Timor-Leste nian, Nia salienta.

“Ha’u hanesan Prezidenti TLPU triste tebes tanba haree liberdade imprensa la’os harahun husi ema seluk, maibé harahun fali husi ema akademiku sira ne’ebe koiñesementu klean, aktu ida ne’e TLPU harre triste tebes, tanba ne’e asosiasaun jornalista sira hamutuk ho vitima afirma katak aktu violentu ne’e hatudu imajen desrespeitu ba servisu jornalista nian”.

Candido Alves hatutan, nia parte hato’o solidariedade ba maluk jornalista Marino Pinto husi média SAPNews ne’ebé hetan agresaun fisika husi oknum estudante universitariu balun, maibé nia mós husu ba jornalista sira atu labele haluhan instrumentu importante sira ne’ebe ajuda jornalista durante hala’o kobertura.

“Aproveita oportunidade ida ne’e apela ba jornalista sira ita nia kilat labele haluhan, ida ita nia lapizeira, rua ita nia nota, tolu ita nia kartaun ida ne’e identidade, tanba ne’e ita labele haluhan, tanba laiha kazu buat hotu diak maibé iha kazu autor sira komesa husu kartaun jornalista nian, sira hanoin sala katak ita la’os jornalista” Nia hakotu.

Vítima Marino Pinto, deklara katak, nia parte hetan agresaun fizika direita husi estudante UNDIL balun, nune’e nia hili dalan nonok, maske estudante balun ho emosional hakilar no dudu nia atu sai husi resintu UNDIL nian.

“Ha’u ho ekipa ba iha kampus UNDIL tanba ami hetan konvite husi vitima asediu sexual, maibé ami to’o iha ne’eba estudante sira, hakilar ha’u dehan duni nia sai husi ne’e, se mak haruka nia mai, sira konsege buti ha’u nia faru iha kakorok, dudu ha’u, sira barak hobur mai ha’u atu baku ha’u”.Dehan Mariano

Vitima hatutan, aktu ne’ebe estudante sira komete, dalaruma estudante sira la kompriende papel jornalista nian, tanba sira impede kobertura jornalista nian.

“Kazu ne’e ha’u senti ofende entaun ha’u hamutuk ho AJTL no TLPU sei lori kazu ne’e ba oin tuir dalan legal, tanba ha’u agresaun fisika husi estudante sira”.

Enkuantu, kazu ne’e vítima hamutuk ho AJTL no TLPU sei apresenta ba Ministériu Públiku hodi prosesa tuir dalan legal tanba konsidera krime hasoru jornalista.