Loron Finadu ! Sidade Díli Mamuk, Bom Finadu Ba Ita Hotu

Imajem : Imajem Sidade Dili ne’ebe mamuk, wainhira iha tempu finadu, populasaun sira fila ba foho.

SAP News TL, Dili : Relativamente ho loron finadu ka dia de funtos, populasaun sira ne’ebe estadia iha Dili hahú ba ona nia munisípiu ida-idak hodi selebra loron matebian iha tinan 2025.

Loron Finadu mak loron relijiozu ida ne’ebé katóliku sira selebra iha 2 de Novembru kada tinan. Iha loron ne’e, ema katóliku sira hanoin no rezá ba ema Matebian sira, hanesan inan-aman, maun-alin, kolega, no katuas sira ne’ebé lakon tiha ona ka fila ona ba mundu seluk.

Durante Loron Finadu, família sira ba semitériu atu hadia fatin ema mate nian, fa’an flor, halai vela, no rezá atu husu Maromak atu simu matebian sira ba moris no damen rohan laek.

Iha kultura Timor-Leste, Loron Finadu importante tebes tanba timoroan sempre respeita liu-liu ba ema mate sira, hanoin sira hanesan família, sente saudades no fo omenajem ba sira.

Loron Finadu hanorin ita atu lembra, rezá, no hadomi ema mate sira, tanba moris no mate mak parte husi mistériu Maromak nian.

Loron Finadu hatudu katak moris no mate la separa ita; ita hotu mak parte husi komunidade ida, entre ema moris no mate.

Tuir observasaun Mídia Sapnews Iha territóriu nasional liliu iha kapital Dili nota katak komunidade ne’ebe hela iha sidade Dili hahú fila ba foho (munisípiu) hodi selebra loron finadu ne’ebe sei monu Iha loron 2 fulan Novembru 2025.

Wainhira sidadaun sira ne’ebe estádia iha Dili fila ba foho, kapital Dili hahú mamuk, laiha barullu, laiha engrafamentu, estrada públiku sira menuz karreta no motor kompara hodi loron bailet.

Boa viajem ba populasaun hotu iha ne’ebe deit, halai kuidadu an, bom finadu no hakuak boot hosi família SAP News ba ita boot sira hotu.