Hasa’e Profissionalidade Mídia ! SEKomS Lori Jornalista Na’in 10 Vizita BRTV, BaliPost & DenPost

Imajem : Sekretariu Estadu Komunikasaun Sosial Expedito Dias Ximenes hamutuk iha Bali, 16/01/2026

SAPNewsTL, Bali – Sekretáriu Estadu Komunikasaun Sosiál (SEKomS), Expedito Ximenes Loro Dias hamutuk ho representante média 10 halo estudu vizita ba média Bintang Radio dan Televisi (BRTV), Bali Post & DenPost iha Indonézia hodi hasa’e profissionalidade mídia iha Timor-Leste.

Sekretáriu Estadu Komunikasaun Sosiál, Expedito Loro Dias Ximenes, haktuir dezenvolvimentu teknolojia ohin loron jornál tún ba beibeik, maibé jornál eziste nafatin iha sosiedade.

“Kondisaun iha-ne’e hanesan mós iha Timor-Leste, maibé oinsá mak espíritu iha profisaun hanesan troka ideia tanba universal. Ami buka esperiénsia sira hodi hariku ami-nia espriénsia”. Hateten SEKomS Expedito Loro Dias Ximenes, Bali, 15/01/2026.

Xefe Redasaun Bali TV, Made Sueca, sente kontente ho vizita Governu Timor-Leste nian iha área komunikasaun Sosiál hodi partilla hanoin sira iha área dijitalizasaun no konverjénsia mídia.

“Ami la perfeitu, ami-nia kondisaun hanesan mídia lokál ne’ebé hala’o funsaun hodi fó prioridade ba karáter kultura Bali nian, maibé ho perspetiva nasionál, tanba ne’e ita profisaun hanesan iha área mídia nian”.

Nia dehan, komunidade mídia entre nasaun ho profisaun ho misaun prinsipál muda ema-nia mentalidade, liuliu joven sira, liuliu populasaun iha Bali.

“Iha Bali laiha rasizmu ba relijiaun, asuntu saida de’it, ami sempre habelar, uluk iha jornál maibé agora tenke adapta ba konverjénsia mídia tanba mundu dijitalizasaun obriga mídia hotu ba konverjénsia ne’e”.

Made hatutam, “forsa ami-nian mak konverjénsia mídia, entaun jornalista bele hakerek ba jornál, hakerek ba online, hakerek ba TV, bele hasai foto no bele hato’o reportajen direta husi terrenu. Atu iha publisidade ka laiha publisidade mós Bali Post tenke kontinua nafatin, katak ho perspetiva nasionál hodi muda mentalidade oan sira-ne’ebé sai futuru nasaun nian”. Nia konta

Liga ba publikasaun iha jornal no online, Xefe Redasaun Bali TV ne’e afirma polítika redasaun tenke koloka asuntu entre online no jornál labele hanesan, nune’e bele dada leitór sira-nia atensaun ba kualkér notísia.

“Ita tenke koloka asuntu ba online ho jornál labele hanesan, asuntu bele hanesan maibé ângulu labele hanesan. Kona-ba independénsia editorial, ita bele akordu ho Governu iha publisidade, maibé krítiku ne’e tenke la’o nafatin, importante mak halo diferensa entre advetoriál ho notísia, no importante mak fó benefísiu ba sosiedade”. Nia esklarese

Iha fatin hanesan, Xefe Redasaun Bali Post Online, Diah Dewi Juniarti Mendala, apresia ho media tour ne’ebé lidera husi Sekretaria Estadu Komunikasaun Sosiál.hodi troka ideia kona-ba área mídia.

“Ami kada loron diskute issue redasaun nian mak área sosiál no kultura sai nu’udar polítika redasaun Bali Post Online nian”. Nia sublinha

​Durante estudu vizita parte média Indonézia simu ho laran ksolok no fó oportunidade ba delegasaun Timor-Leste hodi observa direta ekipamentu modernu ne’ebé sira uza no rona mós sistema servisu redasaun média sira Iha Bali.

​Vizita ne’e hasa’e mós kapasidade profisionál média nian liuliu iha aspetu teknolojia foun no jestaun média no sistema ne’ebé média Indonézia implementa ona.

Enkuantu, Sekretáriu Estadu Komunikasaun Sosiál, fasilita mídia Timor-Leste hamutuk 10 hala’o media tour ba Bali ne’e konsege halo vizita ba Bintang Radio dan Televisi (BRTV), Bali Post (Média Print no On-line) no ​DenPost.

Delegasaun ne’ebé lidera husi SEKOMS ne’e kompostu husi Diretór no Xefe Redasaun husi órgaun komunikasaun sosiál ne’ebé boot iha rai-laran, inklui, ​Média Estadu, Rádio Televizaun Timor-Leste (RTTL, E.P) no Ajénsia Multimédia Tatoli, I.P., ​Média Privadu GMN, STL, Dili Post, Timor Post, Jornal Independente, SAPNews, SMNews-Timor, no VIP-TV.