Hadia Povu Nia Moris ! MDRHC Apoia Karau 20 Ba Komunidade Lela-Ufe & Vizita Grupu Pekuária Naimeko
Imajem : MDRHC Mariano Assanami Sabino iha RAEOA, 11/01/2026. Foto : Média GVPM
SAPNewsTL, Díli : Ministro do Desenvolvimento Rural e Habitação Comunitária Mariano Assanami Sabino, no Prezidente Autoridade Reziaun Administrativu Oekuse Ambeno (RAEOA), entrega karau vaka hamutuk 20 ba Komunidade Lela-Ufe hodi hakiak no habokur.
MDRHC, Mariano Assanami Sabino agradese ba PA RAEOA ho nia estrutura ne’ebe iha kolaborasaun di’ak hodi ofisializa entrega karau hirak ne’e ba komunidade hakiak nain sira atu bele hakiak no habokur, nune’e ba oin sira bele faan hodi hadia sira nia ekonomia rai laran.
“Iha Oekuse uluk kedas iha karau ne’ebe barak, tanba ne’e ba oin, ita presiza hakiak barak liutan atu nune’e bele hadiak ekonomia komunidade nian iha suku ne’e rasik,” dehan Ministru MDRHC iha RAEOA, 11/01/2026. Sita Media GVPM
Assanami mós sujere ba Sekretariu Rejional ba Assuntu Agrikultura atu kontinua servisu hamutuk ho komunidade hakiak nain sira no halo vizita hodi vasina sira-nia animal, nune’e bele buras no distribui ba merkadu ho karau ne’ebe saudavel..
Iha serimonia ne’e simbolikamente entrega Kaurau Vaka hamutuk 20, maibe tuir planu sei atinje to’o karau 100, tanba ne’e Ministru MDRHC mos lansa karau luhan ne’ebe tuir planu sei konstrui hamutuk 100 iha suku refere.
Antes ne’e, Ministro do Desenvolvimento Rural e Habitação Comunitária hala’o vizita ba Grupu Pekuaria ne’ebe halo atividade hanesan hakiak bibi no karau iha Aldeia Bonomese, Suku Naimeko, Postu Administrativu Oesilo, Reziaun Administrativu Oekuse Ambeno.
Grupu sira ne’ebe halo atividade produsaun ne’e finansia husi Sentru Dezenvolvimentu Aldeia Bonomese ne’ebe mai husi transferensia publika husi Ministeriu Dezenvolvimentu Rural no Habitasaun Komunitaria.
Grupu Nomenese sira hahu ona prepara bibi luhan, kuda hahan bibi nian, nune’e tuir planu tempu besik sira sei sosa bibi hamutuk 40 hodi sira bele hakiak. Governante ne’e enkoraza grupu produtor sira iha Aldeia Nomenese atu kontinua halo produsaun ho kuantidade ne’ebe barak liutan hodi fornese ba merkadu.
Assanami Sabino informa, orsamentu ne’ebe apoiu ba grupu produtor sira ne’e la’os apoiu gratuita maibe modellu hanesan kreditu ne’ebe la iha funan, grupu sira bele asesu osan ne’e halo atividade bainhira la’o di’ak ona iha ona rendimentu mak sei selu neneik, nune’e osan sira ne’e bele fo fila fali ba aldeia seluk iha suku ne’e rasik.
“Husu ba grupu benefisiariu sira atu mantein servisu makas, disiplina hodi halo produsaun hodi reforsa ekonomia familia nian iha baze, grupu atual ne’e sei sai save bainhira susesu mak atividade ne’e sei alarga tan ba aldeia seluk”. Assanami husu
Vizita traballu Ministru MDRHC nian ne’e hetan akompañamentu husi Prezidente Autoridade RAEOA, Koordenador Jeral ZEDO, Komandante PNTL RAEOA, Xefe Gabinete MDRHC, Diretor Jeral MDRHC, kargu xefia sira no populasaun sira.