SEKomS Lansa Programa Espasu Dialétiku Hosi SAP News ! Nakloke Ba Públiku
Imajen : Sekretáriu Estadu Komunikasaun Sosiál (SEKOMS) Expedito Loro Dias Ximenes ho Xefe redasaun SAPNews Ermelinda Soares, lansa programa Espasu Dialétiku iha sekretariadu SAPNews, Fatuhada Díli, 06/03/2026. Foto : Daniel da Silva
SAPNewsTL, Dili : Sekretáriu Estadu Komunikasaun Sosial (SEKomS), Expedito Loro Dias Ximenes apresia & agradese bele lansa programa espasu dialétika hosi SAPNews hodi fo biban ba públiku hodi kontinua krítiku konstrutivu ba dezenvolvimentu estadu direitu no demokrátiku.
Programa Espasu Dialétika ne’e hanesan inisiativa edukativu no intelektual ida ne’ebé fó espasu ba diskusaun kritiku kona-ba asuntu polítika, sosiál, ekonomia, kultural no edukasionál iha sosiedade.
Espasu Dialétika funsiona hanesan plataforma atu promove pensamentu kritiku, analize akadémiku, no partisipasaun públika iha debate intelektual.
Objetivu prinsipal programa ida-ne’e mak atu dezenvolve kultura diskusaun ne’ebé bazeia ba argumentu rasionál no evidénsia akademika. Liuhosi diálogu entre estudante, akademiku, peskizadór no membru sosiedade sivíl, programa ne’e buka atu halo ligasaun entre teoria no prátika iha dezenvolvimentu sosiedade.
Espasu Dialétika ne’e sei fo espasu ba jovens, akadémiku, sosiedade sivil no polítiku sira hodi fahe hanoin no responsabilidade hodi kontribui ba formasaun konsiénsia kritika iha komunidade.
SEKomS Expedito parabeniza direjente sira iha Sapnews.com tanba asegura média ne’e halo ona tinan 4 no hetan ona visibilidade hosi sosiedade, média mak pilar demokrasia no unidade nasionál ne’ebe kontinua defende lialos no hatudu dalan los ba povu.
“Lori IX governu nia naran hato’o parabéns ba SAPNews bele eziste no halo tinan haat, agradese tanba bele lansa tan programa espasu dialétiku iha média ne’e, espera bele kontinua ba oin hodi fo espasu ba dialogu no forma opiniaun públiku ne’ebe haburas krítiku konstrutivu”.
“Krítika konstrutivu ne’ebe la’os atu hatun maibe krítika atu hadia, média ne’ebe kontinua imparsial, no hadia ninia kualidade iha tékniku, profesional no intelektual hodi lori informasaun ba sosiedade”. Hateten SEKomS Expedito Loro Dias Ximenes durante vizita iha estúdio SAPNews Fatuhada, 06/03/2026.
Expedito afirma governu sei kontinua apoia média hothotu tuir ninia bele hodi lori informasaun ba povu no hatutan povu nian lian.
Presidente SAPNews Clementino Bragança Machado fo agradese ba SEKomS tanba bele vizita SAPNews no lansa programa Espasu Dialétiku ba públiku.
“Obrigadu barak ba SEKomS tanba bele mai ami nia fatin no lansa programa Espasu Dialétiku iha SAPNews”.
Diskusaun sira ne’ebé mosu iha programa ne’e bele sai hanesan prosesu aprendizajen kolektivu ne’ebé ajuda sidadaun sira komprende fenomenu sosiál ho maneira sistemátika no reflesiva iha eskalaun nasional, rejional no internasional. Programa promove literasia intelektual, partisipasaun demokratika ho forma apresenta teze, anti teze no sínteze.
Iha abertura ne’e, SEKomS prense espasu dialétiku iha edisaun dahuluk ho tema ; “Inteligência Artificial, Entre Dejafiu, Ameaça No Oportunidade”.
Durante dada lia, Expedito sublinha kona ba vantagens, desvantagens husi inteligênsia artifisial no papel governu kona ba dada google mai Timor-Leste.
