Hasoru PR & PM, Governu Sei Apoia Trator Ba Fatumaka
Imajen : Padre Eligio Locateli hasoru Presidente Repúblika José Ramos Horta & Primeiru Ministru Kay Rala Xanana Gusmão.
SAPNewsTL, Dili : Prezidente Repúblika realiza enkontru semanal ho Primeiru-Ministru, Kay Rala Xanana Gusmão, ne’ebé hahú ho enkontru informal ida ho Padre Elígio Locatelli atu ko’alia kona-ba problema kiak sira liuliu iha área agrikultura, munisípiu Baucau.
Prezidente Repúblika Demokrátika Timor-Leste José Ramos-Horta hatete, kada semana iha quarta-feira tuku 07:00 dader iha uma Prezidente nian, Padre Locatelli sempre ba hasoru-malu ho Prezidente hodi ko’alia kona-ba dezafiu ne’ebe durante ne’e Padre Elígio Locateli hasoru.
“Prezidente Repúblika husu ba Primeiru Ministru atu ajuda rezolve problema trator sira iha Fatumaka, Baucau. Trator sira ne’e balun besik tinan 40 no presiza rekuperasaun”. Dehan Prezidente Repúblika José Ramos Horta iha Palásiu Prezidente Aitarak-Laran, Kuinta-Feira, 05/03/2026.
Ramos-Horta sublinha governu responde lalais ho material sira nesesáriu, agora material sira ne’e iha ona prosesu atu halo rekuperasaun ba trator 16 iha Fatumaka.
Prezidente mós uza osamentu prezidénsia nian entre USD 50.000 to’o USD 100.000 atu ajuda komunidade sira iha área ne’e atu aluga trator Fatumaka nian hodi prepara sira nia rai.
Horta haktuir, normalmente kustu kombustível karun, kada agrikultór presiza selu to’o USD 20 atu uza trator maibe ho apoiu Prezidénsia nian, agrikultór sira agora selu deit USD 5.
Iha parte seluk, iha mos kontribuisaun husi ema ida iha Malásia ne’ebé haruka fertilizante hamutuk tonelada 60 mai Timor-Leste. “Fertilizante ne’e produs husi Estadu Unidu no oferese ho forma doasaun”. Nia informa
Amu Locatelli sujere atu entrega fertilizante ne’e ba Ministériu Agrikultura atu halo uluk teste tékniku antes distribui ba agrikultór sira iha Timor-Leste.
Fertilizante refere oferese gratuitu, no parte doador sira mos selu ona ho kustu transportasaun husi Malásia mai Timor-Leste.
Foto : Média PR
