UNTL Atribui Sertifikadu Rekunhesimentu Ba Eis Senadu Na’in-2 ! Cristóvão Fo “Agradese”
Imagem : Atribuisaun Sertifikadu Rekunhesimentu hosi UNTL ba estudante na’in 2 iha Auditóriu FECT Hera, 27/03/2026
SAP News TL, Dili : Iha ámbitu orientasaun akadémika Universidade Nasional Timor Lorosa’e (UNTL), Fakuldade Engenharia Ciência no Tecnologia (FECT) atribui sertifikasaun apresiasaun ba Diretor SAP News TL Sérgio Alves da Costa & Eis Senadu Jeral UNTL Cristóvão de Araújo tanba hola parte ativa servisu kontrolu sosial no kontribui ba desenvolvimentu.
Iha diskursu, Dekanu FECT Adalfredo da Silva Ximenes hateten sertifikadu apresiasaun ne’e fo nu’udar símbolu agradesimentu ne’ebe klean ba responsabilidade, transparênsia no integralidade iha komunidade akadémika.
“Sertifikadu ida ne’e ita fo hodi apresia ba Sérgio nu’udar Eis Senadu FECT, Fundador SAPNews, Jornalista ne’ebe desempenhu funsaun iha servisu kontrolu sosial ho responsabilidade, transparênsia no integridade iha komunidade akadémika”.
“Nune’e mós ba Cristóvão de Araújo hanesan eis Senadu Jeral UNTL, autor ba manufestasaun no hola parte ativa iha desenvolvimentu kontrolu sosial ne’ebe forte iha UNTL, parabéns no agradese ba sira nain rua”.Hateten Dekanu FECT Adalfredo da Silva Ximenes iha Auditóriu FECT Hera, 27/03/2026
Diretor SAPNews Sérgio Alves da Costa fo agradese ba UNTL tanba bele fo rekunhese no apresia ninia produtu sira ne’ebe kompetitivu, ativu iha sosiedade no kontinua valoriza ninia rekursu ne’ebe produz hosi UNTL.
“Orgullu tebes ba rekunhesimentu ne’ebe oferese husi UNTL ba ha’u nu’udar eis senadu no jornalista iha Sapnews, sertifikadu ne’e kontinua ke’e ha’u-nia responsabilidade, seriedade, honestidade, humildade no simplesidade atu kontinua luta ba justisa, lialos, liberdade, direitos humanos no demokrasia, luta seidauk remata, ita luta kontinua nafatin”. Sérgio sublinha.
Eis Senadu FECT ne’e hatutan, estudante ne’ebe tama iha FECT, hetan espasu no kondisaun ne’ebe adekuadu no avansadu tanba ne’e tenki esforçu, estuda, aprende no aprende hodi servi, hadomi no tane aas rai doben ida ne’ebe ita hotu hadomi.
“Ohin, imi tama ho xapeu akadiru, aban bainrua imi tenki sai fali ho xapeu metan iha ulun leten, mai ho mamuk tenki sai ho matenek nakonu, iha kunhesimentu, atetude diak no abilidade naton”.
“Estuda iha ensinu superior ne’ebe ho fasilidade adekuadu tenki estuda makaas no aprende barak atu bele servi, kontribui no tane aas rai doben ne’ebe ita hotu hadomi no preokupa ninia futuru”. Nia sublinha
Sérgio dehan, presiza, “Hamutuk hodi hadia no hametin ita-nia UNTL sai modelu, espellu no ezemplu ba universidade sira liu hosi digitalizasaun, kualidade ensinu, jestaun, kooperasaun, inklui hamutuk ho hanoin no hahalok hodi dezenvolve UNTL sai diak liu”.
Eis Senadu Jeral UNTL Cristóvão de Araújo fo agradese ba UNTL ne’ebe rekunhese no fo sertifikadu apresiasaun, nia parte kontinua husu estudante sira sai ajende ba kontrolu sosial ne’ebe forte, responsivu no brani defende lialos.
“Ha’u fo agradese ba UNTL ne’ebe fo sertifikadu apresiasaun no rekunhesimentu ne’e mai ha’u hanesan eis Senadu Jeral UNTL no estudante ida ne’ebe hola parte ativa iha manifestasaun sira”.
“Bainhira ita defende buat los, ita bele lakon ita-nia kargu no oportunidade maibe ita sei la lakon ita-nia dignidade, integridade no nasionalidade nu’udar timoroan. ita bele estuda engenharia maibe ita tenki hola parte ativa tanba servisu kontrolu sosial ne’e responsabilidade ita hotu nian, futuru ita hotu mak sei enfrenta hamutuk”. Cristóvão akresenta.
Cristóvão realsa luta kontra injustiça, desigualdade no korupsaun ne’e presiza ema hotu nia kontribuisaun, dedikasaun no sakrifisiu mak bele evita no hamenuz. “Ita hotu iha dever no obrigasaun hodi halakon injustiça”. Nia dehan
Orador joven resistênsia João Choque husu ba jerasaun foun no foinsa’e sira atu brani defende lialos, eskola didiak hodi halo buat ne’ebe to’o agora Timor-Leste seidauk bele halo, estuda barak, sai jovens kreativu hodi kontribui ba nasaun ne’e.
“Jovens tenki prontu, ba Timor-Leste, ha’u mak ne’e, nasaun ne’e ema rihun atus rua mak mate hodi liberta no hetan ukun rasik an, ita hotu iha tusan husi sira ne’ebe mate ona, jovens agora tenki eskola, estuda no sai kreativu hodi servi nasaun ne’e”. João Choque husu
Choque mós husu ba joven na’in rua ne’ebe hetan sertifikadu rekunhesimentu atu brani nafatin, luta kontinua ba defende lialos, prontu sakrifika an ba ema barak nia interesse no nasaun nia desenvolvimentu.
“Parabéns ba imi, kontinua hatudu aten brani hodi defende lialos, ita-nia rain presiza jovens ne’ebe brani no prontu hodi kontra injustiça, servisu lalos no la tuir interesse povu tomak nian”. Nia husu
Senadu FECT Rivaldo Tilman Cardoso representa fakuldade fo parabéns no agradese ba orador sira ne’ebe disponível hodi partisipa hodi fahe matenek ba joven sira iha UNTL, agradese mós ba Eis Senadu na’in rua ne’ebe bele hola parte hodi simu rekunhesimentu husi UNTL ba diak no kontribuisaun tomak ne’ebe fo durante ne’e.
“Parabéns no apresia ba orador sira hotu ne’ebe ohin fahe matenek ba ami no estudante foun sira, agradese mós ba eis Senadu Jeral UNTL no eis Senadu FECT ne’ebe disponível mai no simu sertifikadu rekunhesimentu husi UNTL”. nia agradese….
