Papa : Ita Presiza Jesus Nia Ezemplu Atu Aprende Hadomi & Eduka Malu
Imagem : Papa Leão XIV. Foto : Vatican News
SAPNewsTL, Internasionál : Durante misa Kinta-Feira Santa, Papa Leão XIV fase apostolu sira-nia ain hodi lembra Kristu Jesus nia ezemplu ne’ebe halo molok hetan kastigu no mate.
Papa Leão XIV haktuir Jesús purifika umanidade nu’udar imajen Maromak nian husi idolatria no blasfémia sira ne’ebé hafoer nia.
“Jesus mak Maromak loos no ema loos, Kristu fó mai ita, ezemplu ida dedikasaun, servisu no domin nian. Ita presiza nia ezemplu atu aprende hadomi, la’ós tanba ita la iha kapasidade, maibé atu eduka ita-nia an rasik no
eduka malu iha domin loos”. Hateten Papa Leão XIV iha Vaticano, 02/04/2026. Segundu Vatican News
Leão XIV hatutan, aprende atu banati tuir Jesús, “sinál ne’ebé Maromak fo sai iha istória mundu nian, nu’udar knaar ida ba moris tomak”.
Iha selebrasaun Misa Kinta-Feira Santa, “Na’i nia Han-Kalan”, Amu-Papa Leão XIV mós hala’o ritu fase-ain nian ba sarani hodi hatudu sinal humildade, servi malu no hamoos an iha festa paskoa.
Jesus Kristu fase apostolu sira-nia ain iha Evangelhu João kapítulu 13 mak momentu ida ne’ebé importante tebes iha Última Ceia. Iha momentu ne’e, Jesus hatudu nia domin no responsabilidade hanesan Mestre ida ne’ebé la’ós deit hanorin, maibé mos halo asaun real hodi fo ezemplu ba nia dxípulu sira.
Iha tempu ne’ebá, fase ain mak servisu ida ne’ebé normalmente ba servente sira halo, maibé Jesus, maski hanesan Senhor no Mestre halo ida ne’e hodi hatudu katak dignidade la’ós depende ba pozisaun, maibé depende ba atitude no humildade.
Wainhira Jesus hahú fase ain, apostolu sira hakfodak, liu-liu São Pedro ne’ebé la hakarak simu buat ne’e iha uluk. Pedro sente katak la apropriadu Mestre fase nia ain, maibé Jesus hatán katak se la simu, nia la hola parte ho Nia.
Asaun Jesus nian la’ós deit kona ba hamos isin, maibé simboliza hamos espiritu. Nia hakarak hatudu katak ema tenki moos iha fuan husi sala no egoizmu, atu bele moris iha unidade no domin ho malu.
Hafoin fase hotu, Jesus esplika katak buat ne’ebé Nia halo sai ezemplu ida. Nia bolu apostolu sira atu halo asaun hanesan, servi malu ho laran nakloke no la buka onra ka poder.
Ema hotu, maski iha pozisaun aas ka ki’ik, tenki iha humildade no servi malu liu husi ezemplu Jesus Kristu halo ema hotu aprende katak dalan atu sai boot mak liu husi servisu ho domin no laran diak.
Foto : Vatican News
