Sarani : Pe. Anibal Nunka Kolen Halo “Orasaun & Partilha” Maromak Nia Liafuan

SAPNewsTL : Frater Ezequiel de Jesus sente triste lakon Padre diak ida ne’ebe sempre oferese an ba servi Maromak nia povu, maibe nia mós agradese tanba konsege aprende buat barak hosi matebian Anibal da Costa Miranda Saserdote.

Daniel da Silva & Dircia Belo – SAP News TL

“Parokia Turiscai sente lakon Padre di’ak ida, Padre simples, servisu makaas, halo ami aprende buat di’ak barak husi nia kona ba misaun oferese an totál ba maromak, ita hanesan instrumentu de’it maibé buat hotu sempre ba maromak”.

Frater ne’e sublinha Padre Anibal nia mensagem xave sira liliu kona ba devosaun sarani nian ba Santíssimu Sakramentu ne’ebe sei fasilita sarani tuir Kristu Jesus nia hanorin.

“Nia liafuan furak ne’ebé ami sei lembra maka ‘se ita halo devogasaun Santíssimo Sacramento, lorloron ita sei lori ema barak ba Kristu nia kreda’, ho nia mate ne’e ami sente lakon tebes maibé iha parte ida mós agradese ba maromak tanba bele halo ami hasoru ema ida hanesan ne’e hodi aprende mós buat barak ho esperiénsia di’ak ne’ebé nia husik hela”. Nia konta

Ezequiel hatutan sarani Turiscai koñese di’ak Padre Anibal buat ne’ebé sarani sira sempre ko’alia mak Padre nia simplisidade, Padre nia espíritu ba akollamentu katak nia hatur buat hotu tuir nia tempu no sempre hakbesik an ba sarani sira.

“Husi ida-ne’e sarani Turiscai barak liu sempre ko’alia no rekunhese katak husi Padre Anibal nia hahalok ita haree Kristu nia domin ne’ebé inkondisional ba ema hotu-hotu, ema kiik ka ema boot, joven no katuas sira”.

“Sarani sira aprende espíritu orasaun, Padre Anibal nunka kolen ba orasaun kada oras loron iha tuku 5 dader no tuku 5 lokraik, hahalok ida ne’e sempre motiva sarani sira atu aprende liutan, hahalok ne’e la para iha nia maibé halo sarani sira hotu antes partilla maromak nia liafuan sempre reza tersu no adorasaun, esperiénsia ne’ebé nia husik ne’e mak sarani sira sempre la’o tuir to’o agora”.

Wainhira sei moris, Padre Anibal sempre motiva sarani sira atu nafatin moris tuir sakramentu sira no prepara an nafatin tanba mate mai hanesan naukten ida ne’ebe ema ida la hatene.

“Padre mós dehan, ita sarani di’ak tenke hamoris sakramentu loroloron no Padre mós sempre fó ezemplu dehan rate sira ne’e komesa nakonu ona, mate ne’e hanesan naok teen ida maibé oinsá atu prepara aan mak ita selebra sakramentu sira hanesan konfesa lorloron, konvida sarani sira hotu hodi tuir misa no selebra sakramentu sira ne’e hotu.

“Nune’e wainhira ita-nia tempu Jesus Kristu hiit aan ba dala rua, ne’e ita la tarde tanba ita preparadu ona atu simu duni ida ne’e, hahalok ida ne’e mós iha hotu Padre Anibal, nia mate hamutuk ho kristu no moris hias ho Kristu”.

Ezequiel haktuir sarani Turiscai hadomi tebes Padre Anibal no Padre mós hadomi sarani Turiscai, wainhira Padre muda husi Turiscai sarani barak tanis.

“Padre dehan nune’e, ha’u sei lori sarani sira-nia mata-ween ba hato’o loron no kalan iha santisima sakramentu nia oin, sarani sira nafatin reza ba Padre Anibal tanba ita hadomi nia no husu ba maromak hodi perdua nia sala ne’ebé nia halo ona”.

“Ita reza ba nia no ita fiar mós katak Padre Anibal sei reza nafatin ba ita sarani Turiscai tomak, tanba ne’e keta haluha hasa’e ita-nia orasaun ba Padre Anibal, ita mós iha esperansa katak Padre mós sei reza ba ita atu buras nafatin iha fiar no preparadu hodi moris tuir maromak nia ukun fuan, selebra nafatin sakramentu hanesan Padre sei moris”. Nia realsa

Na’i-Lulik Residencial iha Estação Missionária do Sagrado Coração de Jesus Fahinehan, Paróquia Fatuberlio, Pe. Anibal da Costa Miranda, hakotu iis iha ospital Same, wainhira hala’o hela tratamentu ba nia saúde iha loron 06/05/2026 madrugada 05:30 iha Ospital Same, munisípiu Manufahi.

Tuir agenda, aban dader (09:00) sei halo misa ikus ba maktoban iha Sé Katedral Dili, Hafoin sei halot Matebian Saserdote Anibal da Costa Miranda ba nia deskansa fatin ikus iha Cemitério dos Padres de Maloa, Ailok-Laran, Dili, iha loron 08 Abril 2026.

Matebian Saserdote Anibal da Costa Miranda origem hosi postu administrativu Same, munisipiu Manufahi, hahu ordena sai Padre iha tinan 2007, desde simu ordenasaun saserdotal nia hala’o misaun nu’udar amu-lulik durante tinan 19, hafoin hakotu nia jornada moris iha mundu iha loron 6 fulan Abril 2026.

Matebian Saserdote Anibal da Costa ba hamutuk ho Maromak, la’o ho Maromak, hela ho Maromak iha nia naroman no nabilan rohan laek. Adeus no adeus. Obrigado barak ba dedikasaun tomak.

Biodata – Rev. Pe. Anibal da Costa Miranda

Naran completo : Anibal Da Costa Miranda
Fatin Moris : Letefoho, Same
Data Moris : 20 de fevereiro 1975
Aman Naran : António Miranda
Inan Naran : Fernanda da Costa

Educação, Formação no Pastoral:

1983-1989: Escola Primária Católica, Santa Maria Gorete, Viqueque
1989-1992: Escola Pré-Secundária Católica, São Miguel Arcanjo, Same
1992-1995: Escola Secundária Católica Santa Maria, Ainaro

1995-1997: Seminário Menor Nossa Senhora de Fátima, Balide-Dili
1997-1998: Ano Espiritualidade de Dare
1998-1999: Seminário Maior Malang-Indonesia
1999-2000: Tanba situação Política Timor nian, Fr. Anibal da Costa Miranda, tenke hala’o pastoral iha Paróquia Imaculada Conceição Balide

2000-2003: hala’o estudo Filosofia iha Seminário Maior São Pedro e São Paulo, FatumetaDili
2003-2004: hala’o estágio Pastoral iha Paróquia São João de Brito, Liquiça
2004-2005: hala’o estudo Teologia iha Seminário Maior São Pedro e São Paulo, FatumetaDili.
2005: hala’o Pastoral iha Paróquia Santa Cruz, Maliana.

Knaar sira:

2007-2008: Vigário Paroquial de Same
2008-2011: Vigário Paroquial de Letefoho e Atsabe
2011-2023: Pároco da Paróquia de Turiscai
2023-2026: Nudar Padre residencial iha Estação Missionária de Sagrado Coração de Jesus, Fahinehan, Paróquia Fatuberliu-Same, too nia hakotu iis iha Segunda-feira, 06 de abril 2026, iha dader san 05:30, iha Hospital Luak, Same.

Pe. Anibal da Costa Miranda, na’ilulik diocesano ida Arquidiocese Dili nian, nebé iha espírito serviço pastoral nebé forte tebes, belun ho ema hotu, obidiente, orante, disciplina, hadomi tebes serviço sira hotu nebe confia ba nia. Tanba nia hadomi serviço, fo nia-an tomak ba nia missão too mate iha rai missão.