FVTL Sei Realiza Divizaun Datoluk Liga Voleibol Iha Fulan Novembru

Prezidente FVTL Inocêncio Araújo

DILI : Federasaun Voleibol Timor-Leste (FVTL) sei realiza divizaun datoluk liga voleibol iha fulan novembru iha munisipiu sanulu hodi promove talentu juvenil sira iha kada ministériu sira, nune’e iha tinan rua ka tolu mai iha tiha ona jogador husi baze ne’ebe ho nia prestasaun diak no kompetitivu

“Liga Voleibol ami sei hahu iha fulan novembru depois loron finadu tanba antes ne’e ami hala’o formasaun iha munisipiu sira ne’ebe divizaun datoluk liga voleibol sei hahu iha munisipiu sanulu Lautem, Baucau, Manatuto, Viqueque, Aileu, Bobonaro, Likisa, Covalima no  RAEOA  tanba hakarak promove talentu juvenil sira iha baze atu nune’e ba futuru produs ona jogador mai husi munisipiu sira depois kampiaun iha munisipiu mai tuir divizaun daruak liga voleibol iha Dili iha fulan dezembru ba Divizaun dahuluk liga voleibol ami sei hahu iha tinan oin”, Dehan Prezidente FVTL Inocêncio Araújo ba jornalista sira iha Jinaziu Desportu Caicoli, Díli tersa (25/10).

Prezidente ne’e akresenta, daudauk ne’e asosiasaun voleibol munisipiu sira halo ona rejistrasaun ba klube sira kompete iha divizaun datoluk no manda ona mai ekipa teknika federasaun nian ne’ebe hein para realiza.

Inocêncio hatutan, orsamentu ba liga ne’e federasaun hetan apoiu husi SEJD sei fahe hotu munisipiu sira ba jogu feto no mane.

“Orsamentu apoiu ba liga ne’e mai husi ita nia governu liu husi SEJD ho montante 50,000 USD ba  jogu rua divizaun daruak no datoluk liga voleibol ba Feto ho mane ne’ebe orsamentu ami halo estimasaun ba divizaun datoluk iha munisipiu sira ami sei fo orsamentu montante 3,000 ba kada munisipiu hodi realiza divizaun datoluk liga voleibol ne’e”.Nia hakotu

Reportajen : Augusto dos Santos