Partisipa Forum GPPAD ! Assanami : Reduz Ki’ak Tenki Sai Responsabilidade Hamutuk Ba Komunidade Internasionál
Imajem: Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária Mariano Assanami Sabino iha Beijing, 28/05/2026.Foto : Media V-PM.
SAPNewsTL, Beijing : Timor-Leste partisipa Forum Global ba Desenvolvimentu no Redusaun Pobreza (GPPAD) hamutuk ho nasaun 59 no organizasaun internasional hodi ko’alia estratejia no kooperasaun global ba hamenuz kiak no desenvolvimentu sustentavel.
Vise-Primeiru Ministru, Ministru Koordenadór Asuntu Sosiál no Ministru Dezenvolvimentu Rural no Habitasaun Komunitária Mariano Assanami Sabino representa Timor-Leste no ko’alia kona-ba monitorizasaun, asisténsia dezenvolvimentu, seguransa aihan no estratéjia ba dezenvolvimentu sustentável.
Mariano Assanami hato’o agradeseimentu ba Governu Repúblika Popular Xina no Sentru Internasionál Redusaun Pobreza iha Xina tanba organiza fórum importante ida-ne’e ho tema “The Global Partnership for Poverty Alleviation and Development (GPPAD)” ne’ebe refleta nesesidade atu hametin solidariedade no kooperasaun entre nasaun sira hodi responde ba dezafiu global sira ne’ebé afeta komunidade global.
“Pobreza la’ós deit problema ekonomia nian, maibé mós relasiona ho dignidade umana, estabilidade sosiál no dezenvolvimentu sustentável. Tanba ne’e, esforsu atu reduz pobreza tenke sai responsabilidade hamutuk ba komunidade internasionál nian”. Hateten Vise Primeiru Ministru, MDRHC Mariano Assanami iha Beijing, 28/05/2026. Segundu Media Vise PM
Governu Timor-Leste konsidera seguransa alimentar hanesan pilar fundamentál ida ba estabilidade sosiál, dignidade povu no kresimentu ekonomia nasional, hanesan nasaun ida ne’ebé dezenvolve hela no membru foun ASEAN.
“Timor-Leste kontinua fó prioridade ba dezenvolvimentu rural, modernizasaun agrikultura, kriasaun empregu ba juventude, haburas habitasaun komunitária no dezenvolvimentu rekursu umanu”. Assanami sublinha
Nia hatutan, papel estratéjiku setor peskas nian iha kombate pobreza, promove inkluzaun sosiál, kria oportunidade servisu no fortalese seguransa aihan iha nível lokal no nasional.
Iha fórum internasional ne’e, Vise-Primeiru Ministru mós fó rekonesimentu ba susesu Xina iha reduza pobreza extrema. Susesu Xina nian iha hasa’e ema besik millaun 800 sai husi pobreza extrema representa susesu istóriku ida ne’ebé hatudu katak pobreza bele reduz liu hosi lideransa forte, polítika konsistente no planeamentu estratéjiku ba tempu naruk.
Assanami mós hato’o apresiasaun ba apoiu kontinuadu ne’ebé Xina fó ba Timor-Leste durante luta ba independénsia no iha prosesu dezenvolvimentu nasional. Apoiu ne’e inklui infraestrutura, agrikultura, edukasaun, saúde no dezenvolvimentu kapasidade institusionál.
Relasiona ho estabelesimentu Parceria Global ba Aliviu Pobreza no Dezenvolvimentu (GPPAD), Timor-Leste simu inisiativa ida-ne’e hanesan plataforma importante ba kooperasaun internasionál, partilla koñesimentu no fortalese kapasidade nasaun sira atu responde ba dezafiu dezenvolvimentu.
Timor-Leste kontinua reafirma nia prontidaun atu partisipa ativamente iha atividade no programa sira ne’ebé sei dezenvolve liu husi parseria global no kontinua servisu hamutuk ho parseiru internasionál sira hodi promove dezenvolvimentu inkluzivu no sustentável.
Fórum Global ba Dezenvolvimentu no Redusaun Pobreza 2026 remata ho apelu ba komunidade internasionál atu hametin solidariedade, parseria no kooperasaun pratika hodi hari’i futuru ida ne’ebé inkluzivu, prósperu no livre husi pobreza ba povu sira iha mundu tomak.
