UNTL Gradua Finalista Hamutuk 1.461 Iha Semestre Dahuluk
Imajem: Magnífiku Reitor UNTL Joviano António da Costa, iha salaun CCD Dili Quarta-feira 24/06/2026. Foto: SAPNewsTL.
SAPNewsTL, Díli : Universidade Nacional Timor Lorosa’e (UNTL) informa ba públiku katak programa graduasaun ne’ebé marka ona ba loron 25 no 26 Junhu 2026 hetan mudansa ba parte loron daruak, tamba situasaun lutu nasionál ba falesimentu Saudozu Doutór Francisco Guterres Lu-Olo.
Reitor UNTL Joviano António da Costa, hateten iha semana ida ne’e nasaun Timor-Leste lakon lider históriku ida, Saudozu Francisco Guterres Lu-Olo, ne’ebé husik hela povu no nasaun.
“Bazeia ba falesimentu Saudozu Doutór Francisco Guterres Lu-Olo, Governu fó sai Dekretu Governu Nú. 4/2026 kona-ba lutu nasionál hodi fó omenajen ba nia.” Dehan reitor UNTL ba jornalista sira iha salaun CCD Dili Quarta-feira 24/06/2026.
Reitor hatutan, programa graduasaun ba loron primeiru, iha quinta-feira, 25 Junhu 2026, sei la’o tuir programa ne’ebé prepara ona. Entretantu, graduasaun ba loron daruak, ne’ebé marka ba sexta-feira, 26 Junhu 2026, sei muda ba segunda-feira, 29 Junhu 2026.
“Ha’u husu deskulpa ba graduandu sira hotu, liu-liu sira ne’ebé sei partisipa iha graduasaun loron daruak, tanba mudansa oráriu ida ne’e.” Reitor sublinha.
Reitor esplika mudansa ne’e la’ós tanba situasaun ordináriu, maibé rezultadu husi desizaun nivel nasionál tuir dekretu governu no koordenasaun entre universidade ho autoridade kompetente sira.
“Ne’e la’ós situasaun ne’ebé akontese loroloron. Tamba ne’e, liu husi koordenasaun regular ho Governu, ami deside muda programa graduasaun loron daruak ba segunda-feira.” Reitor esplika
Reitor husu ba graduandu no família sira atu fó komprensaun ba desizaun ida ne’e no hein to’o data foun ne’ebé determina ona.
“Ba graduandu sira ne’ebé sei gradua iha loron daruak, maski iha mudansa ida ne’e, ami husu atu nafatin hakmatek no kalma. Labele husik situasaun ida ne’e sai impedimentu ba imi nia prosesu graduasaun ne’ebé importante ba imi nia futuru.” Nia husu
Iha Fatin hanesan, Kandidatu graduadu Cristóvão de Araújo ne’ebé planeia atu simu nia diploma iha serimónia graduasaun iha loron 26 Juñu 2026, nia konkorda ho desizaun Magnífiku Reitór Universidade Nasional Timor Lorosa’e (UNTL) no estrutura relevante sira ne’ebé deside atu muda serimónia graduasaun ne’e ba loron segunda-feira.
“Ha’u konkorda ho desizaun ne’e tanba iha sentidu ida atu fó omenajen ba ita-nia erói boot no saudozu Francisco Guterres Lu-Olo. Ita hotu hatene katak nia nu’udar figura ida ne’ebé luta iha frente armada ba ukun-an durante tinan 24″ Cristovao Salienta
Tuir nia, depois Timor-Leste hetan independénsia, saudozu Lu-Olo kontinua dedika nia an tomak ba prosesu konstrusaun estadu no dezenvolvimentu nasaun.
“Saudozu Lu-Olo mos asume responsabilidade importante sira iha Estadu. Nia sai Prezidente Asembleia Konstituinte ne’ebé aprova Konstituisaun RDTL, depois sai Prezidente Parlamentu Nasionál no ikusmai asume kargu hanesan Prezidente Repúblika.” Nia esplika.
Kandidatu ne’e konsidera saudozu Lu-Olo nu’udar figura importante ida iha istória no dezenvolvimentu Estadu Timor-Leste. Tan ne’e, nia husu ba komunidade akadémika no povu tomak atu fó tempu no respeitu hodi akompaña prosesu funerál saudozu ne’e.
“Iha loron 26 Juñu, ita hotu presiza fó ita-nia tempu atu akompaña prosesu funerál saudozu Francisco Guterres Lu-Olo. Ida-ne’e nu’udar obrigasaun moral no forma respeitu ida ba erói sira ne’ebé dedika sira-nia moris no sakrifika sira-nia an ba libertasaun pátria.”Nia husu.
Entretantu, programa graduasaun UNTL sei kontinua aban ho total graduadu hamutuk ema nain 727, iha loron Segunda feira 29/06/2026 graduadu hamutuk ema nain 734.
