Aero Dili Simu Konvite Voo Dili-Kupang, Loureço Afirma Presiza Aumenta Aviaun Iha Futuru

Imajem : Edital

SAPNewsTL, Dili – Diretor Empreza Aero Dili, Lourenço de Oliveira, simu konvite hosi Governador Nusa Tenggara Timur (NTT), Emanuel Melkiades Laka Lena, atu konsidera possibilidade Aero Dili hala’o voo entre Dili no Kupang, Indonézia.

‎Diretor Empreza Aero Dili, Lourenço de Oliveira hateten, konvite ne’e mai diretamente hosi Governador NTT ho objetivu atu hametin koneksaun entre Nasaun rua.

‎‎“Governador maka bolu ha’u, sira-nia intensaun, se bele karik Aero Dili semo ba Kupang, Dili no Dili ba Darwin. Bele karik nasaun tolu ne’e Aero Dili bele semo hotu.” Dehan Diretor Empreza Aero Dili, Lourenço de Oliveira ba jornalista sira iha Timor Plaza,Terça-Feira,18/08/2026.

Lourenço hatutan, Aero Dili seidauk bele garante atu hahú voo ba Kupang tanba kompanha sei iha limitasaun iha númeru aviaun, kumpri regra no lisensa aviasaun ne’ebé aplika.

“Iha momentu ne’e ha’u dehan mos ba senhor Governador, ami-nia aviaun nia slot la iha ona. Se atu semo, karik hein ba tinan oin bainhira ami aumenta tan aviaun. Maibé la’ós urgente hanesan ne’e.” Nia Informa.

‎Nia esplika, Voo internasionál entre nasaun rua presiza iha akordu bilateral no mekanizmu reguladór antes kompanha  bele hahú operasaun regulár.

‎“Agora sira semo Citilink mai loro-loron, ita mos semo Aero Dili loro-loron. Maibé, atu aumenta tan destinasaun seluk, ita tenke iha akordu bilateral no mekanizmu reguladór antes kompanha  bele hahú operasaun regulár, entre nasaun rua.”Esplika Lourenço.

‎Diretor Aero Dili ne’e argumenta, kompanhia sei kontinua haree possibilidade atu aumenta destinasaun internasionál bainhira kapasidade aviaun aumenta iha futuru.

‎“Ami foin iha aviaun rua atu jere ba nasaun barak, tanba ne’e kapasidade seidauk to’o. Ba Kupang NTT, ita hein ba tinan oin bainhira Aero Dili aumenta aviaun hodi bele hala’o voo ba ne’ebá.”