Refleta Loron Referendu ! Assanami Husu Jovens Luta Ho Kakutak Hari’i TL Ne’ebé Forte, Dignu & Prósperu
Imajem : Vise Primeiru Ministru Mariano Assanami Sabino. Foto : Media VPM
SAPNewsTL, Dili : Loron 30 fulan Agustu 2026, Timor-Leste selebra loron referendum ba dala-27, Vise Primeiru Ministru Mariano Assanami Sabino hateten hateke ba pasadu ne’ebe nakonu ho sofrimentu oioin, uluk aswa’in sira no inan aman sira luta ho kilat ba ukun an, maibé ohin jovens tenki luta ho kakutak no lapizeira hari’i estadu ne’ebe forte, dignu no prósperu.
Vise Primeiru-Ministru Mariano Assanami Sabino haktuir, Timor-Leste ukun aan ona maibe tenke la’o hamutuk ho espiritu ida-deit hodi luta ba diak-idak nia liberdade iha nasaun demokratiku ida-ne’e.
“Ha’u nia hako’ak boot ba imi hotu, ita la’o hamutuk, ita-nia espiritu ida de’it tenke esforsu no luta nafatin, luta para dignifika malu, luta para ida-idak iha liberdade,” dehan Vice-Primeiro-Ministro Mariano Assanami Sabino iha Dili, 30/08/2026. Sita media Vise PM
Loron 30 fulan augustu nu’udar loron espesial ba povu Maubere hodi hakotu korente ukun kolonial nian liu husi eleisaun, ohin Timor sai ona nasaun soberanu ida ne’ebe hahu ona ninia dezenvolvimentu nasional ho livre no Independete.
“Ohin, ita iha ona jornada foun ukun rasik aan nian, mai ita nafatin fileira ida ba vizaun ida hodi hari’i Timor-Leste ne’ebe rejiliente no sustentavel”. Assanami Sublinha
Assanami rekunhese dezenvolvimentu infraestrutura, dezenvolvimentu ekonomia no sira seluk tan seidauk la’o máximu, maibé dezenvolvimentu humanu, dezenvolvimentu demokrasia iha mudansa pozitivu iha rejiaun no mundu.
Governante ne’e hatutan, “ita-nia luta atu hetan liberdade no demokrasia, ita sosa ho fakar ran, tanba ne’e ita hotu depois tinan 27 ita halo refleksaun katak, ita ida-idak tenke respeitu, fó onra ba sira ho ita nia konsisténsia luta hodi garante nafatin liberdade, demokrasia, sosiedade ida ne’ebé justu no sivilizadu”.
Demokrasia fó opsaun ba sidadaun atu ida-idak bele hato’o opiniaun ne’ebé oi-oin, demokrasia fó opsaun ba ita iha multipartidaria, demokrasia fó opsaun ba ita iha multiorganizasaun, maibé sira ne’e hotu labele hamihis dignifika malu no respeita malu.
“Kakutak rasiosinu labele satan, labele hamihis fali ita-nia fuan no neon ne’ebé ita tenke nafatin respeitu malu, ita tenke sai nafatin ida de’it ba Timor-Leste ida ne’ebé forte, Timor-Leste ida ne’ebé buras”.
Assanami Sabino apresia ba traballador sira iha estranjeira tanba bele apoia ekonomia família no fasilita oan sira ba eskola.
“Ba joven sira, inan-aman sira, ba maun alin sira ne’ebé mak iha Irlandia, Inglatera, Korea Sul, Australia, Nova Zelandia, imi hotu iha selebrasaun 27 anos dook husi familia, maibé imi lutador ne’ebé mak hatama osan mai fali iha familia atu bele fó eskola fali ba imi-nia alin sira no ba familia, governu fo onra no respeitu ba imi-nia determinasaun”.
Ba imi hotu nia esforsu, servisu boot ka ki’ik, maibé servisu ne’e nafatin dignu, maske servisu ki’ik, fase bikan ka hamos toos karik, maibé ita nia dignidade ne’e sosa ho fakar ran, tanba ne’e servisu ki’ik ka boot nafatin agradese.
“Ha’u nia hako’ak boot ba imi hotu, ita la’o hamutuk ita-nia espiritu ida de’it tenke esforsu no luta nafatin, luta para dignifika malu, luta para ida-idak iha liberdade,” dehan V-PM.
Ba joven sira ne’ebé eskola, “uluk ita nia aman sira, ita-nia maun sira luta ho kilat, ohin imi luta ho kakutak ho lapizera, husu atu aprende, estuda tanba luta sei kontinua nafatin, imi hotu tenke sai ajente transformador, imi hotu tenke As’wain nafatin para luta hodi konstrui estadu ida ne’ebé forte, dignu no prósperu”.
Parabéns ba Povu Maubere, Parabens ba Timor-Leste hamutuk ita konstrui Timor-Leste ne’ebe forte no rejiliente.
