CCF Aprova Rezolusaun 8 & Deklara La Apresenta Kandidatu Rasik Iha Eleisaun Presidensial
Imajem : Sekretariu Jerál no Prezidente Interinu FRETILIN nian, Dr. Mari Alkatiri no Lider Troika Jeneral Lere Anan Timur iha CCF Fatuhada,29/08/2026. Foto : Media FRETILIN
Sapnews Pro, Dili : Komite Central FRETILIN (CCF) realiza reuniaun hodi halo analiza klean ba situasaun polítika Timor-Leste atuál, reuniaun ne’e rezulta rezolusaun 8 hodi define polítika partidu ba eleisaun ne’ebé sei mai.
Tuir komunikadu ne’ebé SAP News TL asesu hosi FRETILIN Timor-Leste haktuir katak FRETILIN sei la apresenta nia kandidatura rasik iha eleisaun presidensial 2027.
“Rezolusaun Nú. 03/CCF-5°/VIII/2026 ne’ebé deklara FRETILIN sei fo prioridade ba Partidu no Povu Timor-Leste no ba ida ne’e sei la aprezenta kandidatura rasik ba eleisaun Prezidensiál tinan-2027”. Sita iha Komumikadu Imprensa. Dili,29/08/2026.
Sekretariu Jerál no Prezidente Interinu FRETILIN nian, Dr. Mari Alkatiri esplika, “reuniaun Komite Central ida ne’e hala’o iha momentu ida ne’ebé krítiku tebes iha Nasaun no partidu nia vida.”
“FRETILIN hakat iha dalan no tempu ida ne’ebé naruk tebes ona no liuhosi mudansa oin-oin iha tempu oin-oin iha faze diferente vida Timor-Leste nian en termus estrutura no polítika sira,” Dr. Mari Alkatiri hatutan.
Mari Alkatiri hatutan, “ho mudansa iha realidade ohin loron, Komite Central presiza atu diskute no hare oinsa mak FRETILIN bele moderniza an hodi responde ba mudansa dezafiu hosi ne’e ba oin atu bele kumpriende diak liu povu no nasaun nia problema sira no fo resposta ne’ebé adekuadu,” Dr. Mari Alkatiri hatete.
Durante reuniaun membru sira Komite Central FRETILIN nian halo diskusaun klean no nota ho preokupasaun boot katak Timor-Leste monu ona iha pegada krimi organizadu internasionál tamba ne’e presiza atu harii konsiensia komum ida kona-ba importansia no urjensia atu salva Timor-Leste hosi situasaun ida ne’e molok sindikatu krimi organizadu sira halo State Capture ka domina Estadu Timor-Leste nia orgaun soberania sira.
Alein de halo analiza, Komite Central FRETILIN mós aprova rezolusaun 8 ne’ebé sei tulun FRETILIN hala’o diak liu no foku ba prioridade sira prosesu modernizasaun partidu nian. Rezolusaun sira ne’e mak;
1. Rezolusaun Nú. 01/CCF-5°/VIII/2026 hodi fo omenajen póstumu ba Saudozu Kamarada Presidente Francisco Guterres “Lú-Olo.”
2. Rezolusaun Nú. 02/CCF-5°/VIII/2026 ne’ebé marka data ba FRETILIN nia Kongresu Nasionál ba da-6.
3. Rezolusaun Nú. 03/CCF-5°/VIII/2026 ne’ebé deklara FRETILIN sei fo prioridade ba Partidu no Povu Timor-Leste no ba ida ne’e sei la aprezenta kandidatura rasik ba eleisaun Prezidensiál tinan-2027
4. Rezolusaun Nú. 04/CCF-5°/VIII/2026 ne’ebé harii Komisaun Nasionál Preparasaun no Organizasaun ba VI Kongres Nasionál FRETILIN nian no Eleisaun Jerál Dahitu.
5. Rezolusaun Nú. 05/CCF-5°/VIII/2026 ne’ebé lansa kampaña “Militante Nu’udar Baze Apoiu Luta nian” no hahu kontribuisaun solidariu no ho konsiensia hodi militante sira tuir sira nia kbiit atu reforsa FRETILIN.
6. Rezolusaun Nú. 06/CCF-5°/VIII/2026 ne’ebé aprova Regulamentu Disiplinár FRETILIN nian.
7. Rezolusaun Nú. 07/CCF-5°/VIII/2026 kona-ba paridade demokrátika no kuota reprezentasaun feto nian, ne’ebé deside hodi hasa’e reprezentasaun feto nian ba 40% iha kargu eletivu hotu-hotu iha FRETILIN nia laran.
8. Rezolusaun Nú. 08/CCF-5°/VIII/2026 kona-ba Transladasaun Restus Mortais Bispu sira nian mai Timor-Leste hodi saúda inisiativa transladasaun ba saudozu Amu Bispu sira; Dom Jaime Garcia Goulart, Dom José Joaquim Ribeiro, Monsiñor Martinho da Costa Lopes no Dom Alberto Ricardo da Silva.
Reuniaun ne’e partisipa hosi Sekretariu Jeral Partidu FRETILIN Mari Alkatiri, Lider Troika Lere Anan Timur, Membru CCF no kuadru sira.
