Pe. José Konta Frei Aventino Firme Luta Ba Vokasaun & Fiel Iha Maromak
Imajem : Edital
SAPNewsTL, Likisa : Durante missa funeral ba maktoban Pe. Aventino Alves Gusmão iha Tibar, Pe. José Consega SDB hateten ohin loron familia sira hasoru ho realidade moruk ne’e maibe Jesus fo korajem nafatin ho familia sira hotu atu keta tanis, Jesus bolu Frei Aventino hader hodi la’o hamutuk ho Jesus Kristu.
Pe. José Consega haktuir Padre. Aventino hetan dezastre hodi remata nia jornada moris iha mundu, iha hospital Baucau, viajem tuku ida (1) ba Ossu madrugada tuku 03 maibe sarani sira nafatin hamriik fo presta homenajem to’o Ossu, orseik lokraik viajem mai fali Tibar Likisa iha dalan sarani sira nafatin hamri’ik kaer lilin ho ai-funan fo homenajem no fo solidaridade sentimentu sentidu kondolénsia ba Amu Aventino Alves Gusmão.
“Evajellu ohin, Jesus Kristu ho nia eskolante sira ba sidade, ema lubun boot hein iha dala-dalan to’o iha sidade, realidade ne’ebe hasoru mak ida ne’e duni, joven ida hakotu iis ho mate, moruk ne’ebe ita Na’in Jesus Kristu hatutu ba joven ida ne’e hatudu uluk ba ninia familia liuliu ba ninia papa no mama ne’ebe hatudu espresa sentimentu ho tanis”.Hateten Pe. José Consega iha Likisa, 01/09/2026.
Jesus hakbesik ba ninia mama ho fuan ne’ebe simples maibe fo korajem no esperansa hodi dehan “keta tanis”. Jesus lapara deit ho nia liafuan keta tanis, maibe hakbesik ho paixaun hodi hateten “ha’u haruka o hamri’ik” hodi hatudu katak iha paixaun laos dalan ikus maibe dalan ba iha resureisaun.
“Ida ne’e ita la toba ba nafatin, laos fatin ikus atu toba maibe dalan ita hader atu ita hasoru Maromak, realidade ida ne’e moruk hatudu hahu husi familia sira, inan ida ne’ebe sente lakon tebe-tebes hamutuk ho familia sira lakon sira-nia oan”. Nia sublina
Evanjelu hatuir mós feto faluk iha oan mane mesak ida, Amu Aventino iha alin nain tolu maibe nia mak oan mane bo’ot, kulturalmente nia oan dahuluk ne’ebe iha responsabolidade boot, hanesan mos feto faluk ida iha oan mane boot responsavel ba ninia mama rasik no familia. “Amu Aventino asume responsabilidade ba espiritualidade iha familia nian”.
“Amu Aventino hala’o ninia misaun misionáriu iha Cabo-Verde, mai halo missa agradesimentu ba ninia familia no sarani sira iha dia 15/08/2026, realidade ne’ebe ita hasoru fila fali ninia missa agradesimentu la’os tanba nia atu ba fali hala’o ninia misaun iha Cabo-Verde maibé nia missa agradese ho ita atu remata ninia jornada iha mundu ne’e”.
Padre selebrante ne’e fo sasin, Amu Aventino Alves Gusmão ema ida ne’ebe iha vontade ba ninia vokasaun rasik, nia teste iha Seminário Menor Balide hahu hasoru dezafiu, hafoin nia tama kongregasaun OFM Irmãos de Capuchinhos nian, nia hasoru dezafiu lubuk ida maibe nia lalakon nia esperansa iha maromak.
“Husi ne’e ba Indonesia no Portugal, dezafiu bo’ot ne’ebe nia hasoru iha Diakonadu tanba tinan haat mak ordena fila fali ba na’in lulik, ami semana rua iha Ossu nia konta ninia esperiénsia konaba luta ba nia vokasaun”.
“Ikus mai nia simu ordenasaun iha Cabo-Verde, na’i lulik tinan ida fulan tolu, nia musika ida ne’ebe nia gosta kanta titulu lian bahasa, “Perjalanan ini sangat menyedihkan, jauh-jauh datang untuk mendengar apa jawabannya. (Viajen ida-ne’e triste tebes, mai husi dook atu rona saida mak nia sei hatán)”. Nia konta
Nia hatutan, “Aventino konta rasik nia istoria mai teste iha Seminário Menor Balide nia la liu, fila fali ba Ossu nia kolega sira goza nia dehan, hare’e to’ok Aventino ne’e kaan los atu sai Amu-Lulik ne’e mak agora nia estres los ona, hemu tua lakoi, toka kanta no missa deit, maibe nia nonok matein nafatin nia prinsípiu.”
Iha Ossu Pe. Aventino nia mama sempre vizita santisimu, “wainhira ha’u atu halo missa nia sempre iha santisimu oin hodi reza. Aventino Alves Gusmãos hanesan ai-funan di’ak ida iha maromak, ohin loron ita hasoru ho realidade moruk ida ne’e maibe”.
Frei Pe. Aventino Alves Gusmão, simu ordenasaun saserdotal iha loron 25 fulan Maiu 2025 iha Cabo Verde, durante passa ferias iha Timor-Leste, nia aproveita hala’o mós misa agradesimentu iha loron 15 Agusto 2026, liu tihan loron loron 14, ohin (29/08/2026) hetan asidente ho motor CRF U-6064 iha area Lanut, postu administrativu Baucau Villa, munisipiu Baucau to’o rezulta lakon vida tanba hetan kanek grave.
Maktoban Padre Aventino Gusmão moris iha loron 20 Abril 1985, origem hosi Suku Uabubo, Postu Administrativu Ossu, munisipiu Viqueque, hakotu iis ho idade 41 iha loron 29 Agustu 2026.
Família hamutuk ho igreja katólika no Representante hosi Irmãos Capuchinhos de cabo Verde halot ona Padre Aventino Gusmão iha Resintu São Francisco de Ais Tibar Likisa, iha loron 1 fulan Setembru tinan 2026.
