Reitor UNPAZ Konsidera PN La Tau Interese Ba Povu
![](https://sapnewstl.com/wp-content/uploads/2022/11/Adolmando-Amaral.jpg)
Imajen Diskursu Reitor UNPAZ Adolmando Amaral iha Kampus Sentral UNTL, 15/11/2022
SAPNewsTL,DILI – Reitor Univeridade da Paz Adolmando Amaral hateten PN la tau interese ba povu maibe interese nia ann tanba ne’e estudante no Universitariu sira sei nafatin halo asaun pasifiku hasoru PN ne’ebe mak atu sosa kareta no laptop ba deputadu sira inklui lei pensaun vitalisia husi OJE 2023
“Imi hakarak ita nia alin estudante sira respeita no tane ita bo’ot sira sai forsa ida deit, imi retira hola kareta Prado no laptop, tanba ne’e ita labele halo separasun entre alin estudante sira, ha’u husu ba nai deputadu no deputada sira, ita bo’ot sira ba tur iha Parlamentu Nasional ne’e reprezenta povu tanba ne’e tau uluk interese povu nian aas liu labele interese uluk imi nia aan,” dehan Reitor Universidade da Paz Adolmando Amaral iha nia diskursu banhira halo manifestasaun hasoru PN,Tersa-feira (15/11/2022)
Reitor UNPAZ ne’e akresenta alin estudante AMN nia Manifestasaun ne’e atu hapara korupsaun liu husi hola kareta no laptop ba deputadu no sira tenke interese povu ne’e as liu labele interes uluk imi nia aan
“Ita hotu hatene, ita boot sira ba halo fiskalizasaun presiza transporte, maibe ida ne’e la nesesariu la tempu ona atu hola kareta tanba ne’e mak ami husu ba ita bo’ot sira orsamentu ne’e aloka ba programa prioridade sira seluk ne’ebé nesesariu no efeitu tebes atu responde no hatan ba povu sira iha teritoriu Timor laran tomak tanba oras ne’e povu halerik hela, Husu mos ba nai deputado deputada sira atu aselera lalais lei pensaun vitalisia ne’e tanba ita boot sira promete tinan barak ona, ita boot sira labele alergia”. nia sublinha
Nia akresenta, estudante mai laos atu kontra Deputadu sira maibe mai hodi defende povu ne’ebe la hatene hakerek, lee no ko’alia
“Estudante sira mai ne’e atu halo inspirasaun laos atu kritika no kontra ita boot sira, maibe sira defende povu sira ne’ebé lahatene hakerek, le’e no ko’alia tanba deputadu no deputada sira halo programa ba povu laos ba imi nia aan rasik husu mos ba deputadu sira ne’ebé oras ne’e dadaun tur iha Parlamentu Nasional halo programa karik halo nesesariu atu responde no aloka orsamentu ba povu ne’ebé nesesariu no presiza tau, interese povu nia as liu,” nia fundamenta
![](https://sapnewstl.com/wp-content/uploads/2022/11/Reitor-UNTL.jpg)
Imajen Komunikadu Impirensa husi Estrutura UNTL ne’ebe lidera direita husi Reitor UNTL, iha Auditorium FECT-UNTL
Iha sorin seluk, Liu husi Komunikadu Imprensa, Magnifiku Reitor UNTL, João Soares Martins haktuir, nia parte laiha kunhesimentu kona ba prezensa Reitor UNPAZ ho estudante sira iha resintu Kampus Sentral UNTL
“Ami Lamenta teb-tebes ho atetude Magnifiku Reitor Universidade da Paz (UNPAZ) Adolmando Amaral ho estudante sira ne’ebe mak mai utiliza kampus UNTL halo manifestasaun, tanba nia la fo kunhesimentu atu mai iha halo Manisfestasaun iha resintu UNTL, ami respeitu liberdade expresaun, maibe ami la kontente tanba sira uza ami nia fatin”. Tenik Reitor UNTL iha Auditorium FECT-UNTL Hera, 15/11/2022
![](https://sapnewstl.com/wp-content/uploads/2022/11/Unpaz.jpg)
Asaun Pasifiku husi Estudante UNPAZ iha resintu UNTL. Foto : Marcela da Costa
Enkuantu, Politika Sosa Kareta no Laptop foun ba Deputadu sira, Parlamentu Nasional liu husi Debate Espesialidade kansela ona orsamentu ne’ebe aloka ba sosa kareta no laptop, entretantu, Lei Pensaun Vitalisia PN seidauk iha resposta kona-ba ida ne’e
Tuir Informasaun ne’ebe SAP News asesu katak autoriedade seguransa (PNTL) kaptura ona manifestante ruanulu resin, agora daudaun iha ona sele detensaun hodi tuir prosesa tuir prosesu investigasaun, tanba Manifestasaun ne’ebe hala’o iha resintu UNTL konsege harahun vidru odamatan universidade nian inklui fatin demostrasaun refere la prense rekezitus 100 metrus, maske nune’e, maibe Presidente Parlamentu Nasional Aniceto Guterres promete sei hasoru malu ho representante manifestante sira iha kuarta-feira semana oin, hafoin debate OJE remata
Jornalista : Marcela Mery da Costa
Editor : Ekipa Editorial