Abertura Kopa FFTL, Relay Laleia La Hakfodak Kontra DIT FC

SAPNewsTL, Dili: Klube Relay Laleia la hakfodak kontra klube DIT FC iha jogu abertura Kopa FFTL 2024 maski klube DIT FC rejistadu iha Liga Timorense.

“Klube Relay Laleia ho jogador lokal hotu maibe iha espiritu forte prontu kontra DIT FC iha jogu abertura maski ami hatene DIT FC nu’udar klube rejistadu iha Liga Timorense”, dehan reprezentante klube Relay Laleia dada sorteiu Ponciano da Costa Ribeiro ba jornalista sira iha Xanana Sport Center Bairro Formosa, Dili sabadu (04/05/2024).

Reprezentante ne’e hatutan, iha dada sorteiu sira mak sei hala’o jogu abertura kontra DIT FC, nune’e fo hela presaun boot mai sira maibe Relay Laleia FC prontu kontra DIT FC.

Iha jogu ida ekipa hotu hakarak manan maibe tenki prepara mos atu simu lakon, nune’e jogu remata mak foin hatene se mak manan no se mak lakon, ema hotu hatene antes atu kompete jogu ida tenki halo preparasaun ho nune’e klube Relay Laleia halo ona preparasaun.

Iha sorin hanesan ofisial DIT FC Jacinto Freitas hatete, sira sei hala’o jogu abertura kontra Relay Laleia.

“Ami sei kontra Relay Laleia FC iha jogu abertura iha Kopa FFTL 2024, ami mos halo ona preparasaun durante fulan tolu, durante ne’e ami halo preparasaun ba tekniku ho tatiku, ami sei aplika iha jogu maski DIT FC reforsa ho jogador lokal ho treinador lokal hotu”, tenik Jacinto

Jacinto salienta tan, Relay Laleia ekipa foun nune’e sira seidauk kunese nia jogador keta sira bolu jogador rejistadu iha liga ka bolu jogador estranjeiru tanba klube rejistadu iha liga barak mak lakoi tuir Kopa FFTL.

“Tan ne’e sira laos la sura klube maibe ami sei esforsu jogador para kontra Relay Laleia ho diak depois jogu remata mak hare’e rezultadu”. Nia konklui

---

Reportajen: Augusto dos Santos