Admira Ho Dixiplina F-FDTL & PNTL ! PR Husu Kontinua Serví Ho Domin & Respeitu
![](https://sapnewstl.com/wp-content/uploads/2024/08/1724276040875.jpg)
Imajem : Prezidente Repúblika José Ramos Horta
SAPNewsTL, Dili – Selebra loron Forsa Armada Libertasaun Nasionál Timor-Leste (FALINTIL) ba dala XLIX, Prezidente Republica José Ramos Horta husu F-FDT no PNTL hodi servisu maka’as no hatudu dixiplina hodi asegura nasaun no tane aas sosiedade.
Komandante Supremu Forsa Armada, Xefe Estadu José Ramos Horta hateten presiza aumenta formandu ofisial superior barak liután tanba luta na’in sira ne’ebe idade liu ona limanulu presiza atu deskansa.
“Uluk rekursu laiha liu buat hot-hotu duador ruma mak fó, mais agora ita nia forsa iha formasaun ofisial ne’ebé formadu iha Timor- Leste, Indonésia, Austrália no America maibé ne’e sei presiza barak liután, ofisial superior nivel maijor kapital tanba komandante sira ne’ebe ho autoridade nivel Tanente Koronel, Koronel sira ne’ebe mai husi luta ne’e tanba idade tinan limanulu ba leten ona, sira mós iha direitu atu deskansa”. Tenik Prezidente Repúblika José Ramos Horta ba Jornalista sira iha eventu komemorasaun loron Falintil iha Kuartel-Jeral Fatuhada, 20/08/2024.
Xefe Estadu ne’e hatutan, “Forsa armada tenki aselera formasaun ofisial iha nivel hot-hotu, ofisial ba operasional, jestaun planeamentu, forsa armada modernu ne’e la’os simples tenki iha sistema manutensaun barak”. Prezidente Repúblika Ramos Horta hateten
Xefe Estadu Ramos Horta konsidera F-FDTL & PNTL hatudu komportamentu diak, respeitu povu no hadomi sidadaun sira. Tan ne’e nia parte admira ho prestasaun no obediénsia ba lei ne’ebe vigora iha nasaun ne’e.
“Ita haree tinan ruanulu nia laran kestaun ida mak dixiplina F-FDTL, kuaze ita nunka rona iis iha problema, PNTL instituisaun ne’ebe komportamentu diak, respeita povu, respeitu sidadaun la tiru mate ema arbiru, no hadomi sidadaun”.
“Dala ruma akontese violénsia ruma tinan ida bele akontese dala ida, wainhira elementu ida ba festa ruma, ha’u admira tebe-tebes iha forsa armada ne’ebe iha dixiplina, respeita povu no lei. Ha’u espera katak F-FDTL no PNTL sei asegura ho diak iha ita nia nasaun hodi simu Sua Santidade Papa Francisco nia vizita”. Nia sublinha
![](https://sapnewstl.com/wp-content/uploads/2024/08/IMG-20240820-WA00392.jpg)
Imajem : Xefe Estadu Maijor Jeneral Domingos Falur Rate Laek iha Quartel Jeral Fatuhada,20/08/2024. Foto : Marciana da Conceição
Iha sorin seluk, Xefe Estadu Maiór-Jeneral F-FDTL, ne’e felisita prestasaun servisu ne’ebe militar sira halo iha luta hasoru ki’ak, desigualdade, violénsia bazeia ba jéneru no krime sira ne’ebe mosu iha sosiedade.
“Ha’u louva servisu di’ak ne’ebé ita-nia militár sira halo no ha’u afirma katak F-FDTL iha vontade atu halo parte iha solusaun ba dezafiu hotu-hotu ne’ebé ita-nia sosiedade, governu no estadu hasoru, ne’ebé mak luta hasoru kiak, dezigualdade, violénsia bazeia ba jéneru no krime. Forsas Armadas sempre atensaun hodi defende ita nia soberania no ordem konstitusional demokrátiku, no hakarak kontribui ativamente ba dezenvolvimentu sosiál no ekonómiku nasaun nian”. Nia deklara
“Ita boot sira-nia profisionalizmu, enerjia no aprosimasaun konxiénsioza ba ita-boot sira-nia servisu mak garantia ba seguransa ita-nia rain no garantia ba ita-nia sidadaun sira kona-ba moris hakmatek no oportunidade atu kria no hari’i sira-nia futuru. Atu Forsa Armada sira bele responde ba dezafiu no ameasa sira ne’e, tenke prepara sira nia kapasidade, inklui formasaun kontínua, ekipamentu no infraestrutura ne’ebé adekuadu ba ambiente servisu no moris di’ak ba sira nia família”.
Sai Forsa Armada ne’ebé kontribui ba misaun tulun nian iha tempu katástrofe, ne’ebé harii ponte bainhira iha nesesidade urjente, reabilita eskola sira, obra sosiál sira, no iha prezensa ativu iha populasaun sira nia leet.
F-FDTL apoia la ho rezerva kualkér inisiativa diplomasia militár ne’ebé pás no estabilidade nu’udar nia objetivu sentrál.
“Ita hakarak sai parseiru ho ema hotu, la hili sorin, tanba ita fiar katak dezafiu sira sékulu ida-ne’e nian boot liu duké diferensa sira, tanba ne’e maka hili atu kombina esforsu sira no sai interdependente iha kapasidade resposta. Ita-nia knaar atu halo buat hotu ne’ebé presiza atu ita-nia Forsa Armada bele adapta no hatán ba ezijénsia sira tempu ohin loron nian no natureza dezafiu sira-ne’e nian ho maneira nakloke, transparente no liu husi diálogu”.Falur deklara
Enkuantu, komemorasaun loron FALITIL ne’e hetan partisipasaun maksimu husi Membru Governu, Membru Parlamentu Nasionál, Veteranu sira, Membru F-FDTL no populasaun sira.
Jornalista : Genoveva Lopes Sarmento