AHDMTL Kritika PNTL Labele Asegura Malu

SAPNewsTL, Dili: Asosiasaun Halibur Defisiensia Matan Timor Leste (AHDMTL) hala’o konferensia imprensa ejize ba Komandu PNTL atu ezonera membru nain ualu husi sira nia kargu  tanba deskonfia envolve iha kazu joven ida ne’ebé tara an iha sela PNTL Caicoli Dili.

Tuir portavoz, Cárceres Nunes Arca Tura katak públiku hakfodak José Bernado nia mate iha sela laran dehan tara an ne’e la lojika tanba sela detensaun hanesan fatin ne’ebé  proibidu, atu ema ne’ebé detein la ho atributu ka armas brankas ruma

“Haree ba kazu José Bernado nia mate iha sela laran ne’ebé deskonfia tara an, halo sosiedade  dúvida ho akontensementu ida ne’e maske autoridade Polisia Nasional Timor Leste (PNTL) suspende ona ajente polisia nain 8 ne’ebé deskonfia envolve iha kazu ne’e maibé nafatin ezije ba autoridade PNTL no liu-liu ba komandante jeral PNTL Komisiariu Faustino da Costa atu foti medidas rigorozu ba kazu ne’e”. Dehan Portavoz ne’e ba jornalista sira iha Manleuana Dili, Kuarta-Feira,7/09/2022.

Portavoz ne’e mos husu ba Komandu PNTL atu ezonera membru sira ne’ebé involve iha kazu ne’e no prosesa tuir dalan legal. 

“Husu atu ezonera husi sira nia kargu ka husi polisia no husu autoridade PNTL atu kolabora ho PCIC hodi halo investigasaun klean ba ajente polisia hirak ne’ebé mak halo servisu ou piketi iha loron ne’ebé kaptura José Bernardo hodi ba detein iha sela to’o hakotu iis hodi prosesa sira tuir dalan legal”. Tenik nia

Entretantu, AHMDTL dezafia PNTL atu halo deklarasaun ho lolos atu nafatin  hetan konfiansa husi povu

“PNTL mak imajen ba paz iha povu nia le’et, maka sira dejafia nafatin PNTL atu halo deklarasaun ne’ebé lolos koko atu labele asegura malu ba lia los iha istituisaun públiku ne’ebé ho prinsipiu igualdade no neutralidade hanesan PNTL”. Nia hatutan

Enkuantu, Portavoz ne’e mos husu ba Prezidente Repúblika, Parlamentu Nasiaonal,Tribunal Rekursu no Primeru Minstru hanesan Ministeru Interior tau antensaun sériu ba kazu ida ne’e atu povu la bele moris iha pániku nia laran no husu ba Komisaun B parlamentu nasional ne’ebé trata asuntu defeza no seguransa hanesan reprezentante povu no hatutan povu nia lian labele nonok ba kazu refere.

Jornalista: Justino Soriano

Editor: Ekipa Editorial