Difisil Hetan Apoiu Husi Patrosinador, LFTL Sei Ko’alia Ho FFTL
SAPNewsTL,DIli: Orgaun Liga Futebol Timor Leste (LFTL) halo ona enkontru ho klube divizaun dahuluk no daruak hamutuk 18 ne’ebé semana oin sira sei hasoru malu ho Federasaun Futebol Timor Leste (FFTL) hodi diskute ba realizasaun Liga Timorense Epoka 2022.
“Ohin ami halo reuniaun ho klube sira, ami atu rona klube sira nia hanoin tanba tinan ida ne’e tama ona fulan setembru maibe liga seidauk la’o ne’ebe no ami loke rejistrasaun iha fulan abril maibe klube ida mos seidauk rejistu tan ne’e ami mos sei halo reuniaun ho FFTL iha loron 12 fulan setembru semana oin, ohin ami tau hamutuk hanoin sira ne’e sei lori to’o FFTL para tetu hamutuk ita nia liga ba oin ne’e sei la’o oinsa”. dehan Prezidente LFTL Nílton Gusmão ba jornalista sira iha JL Villa, Fatuhada, Segunda-Feira,5/09/2022.
Prezidente ne’e akresenta difisil ba klube atu hetan apoiu husi patrosinador tanba ne’e sei hamutuk ho FFTL atu bele apoiu nune’e liga ne’e bele realiza atu labele impede futebol sira tanba husi sira mak bele halo selesaun ne’ebé di’ak.
“Tanba situsaun ekonomia iha Timor Leste ne’ebé klube la fasil hetan apoiu husi patrosinador sira, tan ne’e klube sira nia situasaun hanesan fo salariu ba jogador, treinador no ofisial sira mak sira sei lori hasoru FFTL para dalan saida mak foti hamutuk para ajuda klube sira ne’e atu realiza liga futebol Timor Leste epoka ne’e no tenki rona lamentasaun husi klube sira para labele impede futebol rai laran”. Tenik nia
Iha fatin hanesan fundador Zebra Rogério Moc hateten, tuir lolos liga ne’e la’o ona maibé tanba iha dezentendimentu entre FFTL ho LFTL, nune’e husu orgaun rua ne’e atu fo liman ba malu hodi realiza jogu ne’e.
“Ami husu orgaun FFTL no LFTL atu organiza liga ne’e tenki fo liman ba malu para realiza liga iha tinan ne’e, ne’ebe tuir lolos liga la’o ona iha fulan Agostu tanba orgaun rua ne’e mosu dezentendimentu ne’ebé liga ne’e mak la la’o sei fo impaktu tanba FIFA iha kestaun tanba saída liga futebol Timor Leste seida’uk la’o tuir orariu no ami nia preokupasaun mak liga la la’o fo tristeza bo’ot ba povu Timor Leste hadomi futebol”.Nia hatete
Entretantu, Klube ne’e agora iha divizaun dahuluk mak AD SLB Laulara, AS Ponta Leste, Assalam FC, Aitana FC, Karketu Dili FC, Academica FC, Atlético Ultramar FC, FC Porto Taibesi ho Emmanuel FC no klube sira iha divizaun daruak mak Santa Cruz FC, Nagarjo FC, As Marca, Zebra FC, Kablake FC, Fitun Estudante FC, LicaLica Lemorai FC, DIT FC no Boavista Clube de Timor.
Jornalista: Augusto dos Santos
Editor: Ekipa Editorial