RDO FIFA Fo Formasaun Ba Arbitrajen 30

SAPNewsTL,Dili: Arbitrajen futebol Timor Leste nain tolu nulu (30) tuir formasaun ba regulamentu jogu 2023 husi ekipa  Referee Development Officer (RDO)  FIFA  nian, objetivu husi formasaun ne’e aumenta arbitrajen sira nia kapasidade  hodi diriji jogu ho kualidade no neutralidade.

“Ohin ekipa tekniku sira husi Referee Develpment Officer (RDO) FIFA nian ne’ebé mai fo kursu ba ita nia arbitrajen sira hamutuk nain 30, hafoun regulamentu jogu ba 2023 nian hodi aumenta sira nia kapasidade sai arbitrajen ne’ebé  kualidade iha Timor Leste, formasaun ne’e nu’udar programa husi FIFA nian ne’ebé kada tinan nasaun sira sempre hetan oportunidade hotu”. Dehan Diretor arbitrajen FFTL Nivio Fernandes da Costa ba jornalista sira iha Xanana Sport Center Bairro Formosa, Kinta-Feira,08/09/2022.

Diretor ne’e akresenta  tan, formasaun iha tinan ne’e sira halo diferente ho tinan sira uluk tanba agora halo selesaun ba arbitrajen sira husi munisipiu sira ne’ebé hamutuk nain-30 hodi update tan regulamentu  jogu 2023 nian ne’ebe sira mai tuir kursu ne’e sira prense kriteria husi RDO FIFA nian ne’ebe sira ne’e liu iha fiziku nian, fo promosaun ba arbitrajen sira ne’ebe para sai kualidade.

“Ita nia arbitrajen ne’ebe tuir hamutuk nain-30 inklui ita nia arbitrajen nain rua level AFF nian ne’ebé ita nia arbitrajen sira ne’e mai husi munisipiu Manufahi, Aileu, Ermera, Lautem no Dili no ami nia formasaun sei la’o durante loron lima komesa iha loron 8 remata iha loron 12 fulan Setembru tinan ne’e”. Tenik Nivio

Iha fatin hanesan RDO FIFA Muhammad Rojali hatete, objetivu husi formasaun ne’e aumenta kuñesimentu arbitrajen Timor Leste atu sai kualidade liu tan no tuir nia  observasaun arbitrajen simu materia ho di’ak maibé sei haree sira nia rezultadu arbitrajen ida-idak.

“Objetivu husi kursu ida ne’e atu aumenta kuñesimentu arbitrajen Timor Leste sai kualidade liu tan tanba hafoun sira nia skill, tuir hau nia observasaun sira simu materia di’ak, fo rezultadu pozitivu tebes ne’ebe ohin foin loron dahuluk ne’ebé ha’u sei haree sira nia rezultadu formasaun nian iha loron ikus tanba arbitrajen sira ne’e  sei simu teoria no sei pratika iha kampu tan,  ne’e ha’u sei haree skill arbitrajen ida-idak iha ne’eba”. Nia hatete

Entretantu, arbitrajen Timor Leste Romario S. dos Santos Teti agradese no kontente tebes tanba bele hetan tan kursu update ida ne’e, fiar katak sira sei aplika regulamentu foun iha kampu ho kualidade.

“Ha’u agradese no kontente tebes tanba bele hetan tan kursu ida ne’e mai husi RDO  FIFA nian atu update regulamentu jogu 2022 nian ba 2023 ne’ebé ha’u fiar katak ba oin ami sei aplika  regra foun sira ne’e ho rezultadu ne’ebé mak di’ak iha kampu”. Romario subliña

Jornalista: Augusto dos Santos

Editor: Ekipa Editorial