Australia Konsulta TL, Posibilidade Sei Haruka Timor Oan Ba Servisu
SAPNewsTL,Dili: Sekretáriu Estadu Formasaun Profisional no Empregu (SEFOPE) hetan vizita ofisial husi Ministru Negosiu Traballu Formasaun Australia ko’alia kona-ba Traballador ne’ebé sei ba servisu iha nasaun Australia.
Tuir Sekretáriu Estadu Formasaun Profisional no Empregu katak enkontru ida ohin espesial teb-tebes ba Timor oan, governu husi Australia, husi Norte enkarega hanesan Ministru ba Traballu no Turizmu, oinsa Timor Leste ho Australia servisu hamutuk haree liu ba oin
“Agora sira la’os atu rekruta maibé sira mai halo konsultasaun, oinsa ba futuru ne’e ita bele prepara ita nia alin sira joven sira bele hetan oportunidade bele aumenta servisu iha Darwin”. Dehan Sekretáriu Estadu Formasaun Profisional no Empregu (SEFOPE) iha nia Edifisiu SEFOPE Caicoli, Kinta-Feira,08/09/2022.
Governante ne’e akresenta, sira mai buka dalan tanba iha ajénsia lubuk ida mak atu servisu hamutuk ho governu Darwin, sira mai hodi hatene tuir, haruka Timor oan ba Australia tanba ne’e mak sira mai halo konsultasaun.
“Sira sei vizita ita nia fatin sira to’o Maubisse, Aileu haree kuda modo, haree Ermera liu-liu ba iha kafé, haree ba sira ku’u ai-fuan sira ne’e halo nusa, sira ba halo kalkulasaun, loron ida sira sei trasa planu sira iha ne’eba, sira mai rekruta timoroan ba servisu”. Tenik nia
Entretantu, Sekretáriu Estadu ne’e prontu kopera ho Ministru oinsa Timoroan sira bele desloka ba servisu iha Darwin liliu iha Agrikultor no Hospitalidade.
Iha fatin hanesan, Ministru Negosiu Traballu Formasaun Paul Kirby MLA fundamenta nia konsulta ho SEFOPE atu oinsa fasilita Timor oan sira ba servisu iha Australia.
“Mai konsulta ho SEFOPE, posibilidade haruka Timoroan ba servisu iha Australia, maibé liu-liu koba-ba arendamentu kona-ba viza nian atu simplifika oinsa bele ajuda Timoroan sira ba servisu iha Australia, mai atu konsulta ho SEFOPE, setor ne’ebé mak ohin temi iha hospitalidade konstrusaun agrikultor nian ida ne’e hanesan faze konsultasaun nian”. Nia hatete
Jornalista: Esmeralda da Silva & Aquelina Magalhães
Editor: Ekipa Editorial