Ai-moruk Iha Maubisse Sufisiente, Epifania : “Maibe Stok Balun Laiha, Labele Halo Buat Ida”.
Imajem : Diretora Servisu Apoiu Dionostiku Terapeutiku Epifania Jose Moniz da Silva
SAP News TL, Ainaro : Diretór Ezekutivu Ospitál Referál Maubisse Virgilio Mendonca Pereira hateten, Ospitál Referál Maubisse iha stok out ai-moruk 6,2% ka item 24, nune’e kategoria sufisiente halo tratamentu ba pasiente sira.
“Medikamentu stok ai-moruk nia sei tama hela estandar normal tanba 6,2%, kuandu mais 10% maka dalaruma iha problema. Mais durante tinan ida nia laran, fulan neen ikus no iha fulan Jullu ne’e estoke tama hela estandar normal signifiká ai-moruk sira ne’e bele lori atende hela”. Dehan Diretór Ezekutivu Virgilio Mendonca Pereira bá jornalista sira iha nia knaar fatin Ospitál Referál Maubisse, 11/08/2025.
Iha fatin hanesan, Diretora Servisu Apoiu Dionostiku Terapeutiku Epifania Jose Moniz da Silva afirma, wainhira ai-moruk stok out Unidade Farmásia sempre halo pedidu ba Farmasia Nasionál bazeia ba ai-moruk ne’ebe hotu, iha item tolu hanesan vitál, esensial no nesesáriu.
“Ami daudaun ne’e rejistu ona ai-moruk ne’ebe stok out hamutuk 6,2% ka 24 item, maka hanesan vitál, esensial no nesesáriu, no ami hatama ona pedidu bazeia ba stok out ai-moruk”.
Nia hateten wainhira pasiente sira ba halo tratamentu no stok ai-moruk ne’ebe sira presiza laiha, sira nia parte sempre esforsu hodi halo pedidu ba parte Nasionál tanba depende mos ba farmasia iha Nasionál.
“Ami sempre haree kona-bá ai-moruk sira ne’ebé maka laiha, ami sempre esforsu no depende hotu bá farmasia nasionál, ami halo pedidu iha oin tolu maka reguler, extra no emerjénsia hodi bele garante stok out. Wainhira ai-moruk item tolu vitál esensial no nesesáriu ne’e ida deit mak laiha signifiká nafatin iha problema.”
Nia afirma Ospitál Referál Maubisse dalaruma halo transferénsia pasiénte bá Ospitál Nasionál Guido Valadares (HNGV) tanba kauza husi estoke ai-moruk no ekipamentu menus.
“Bainhira ai-moruk laiha, ami la transfere pasiente ba klinik sira tanba ami ne’e Ospitál Referál entaun sira transfere mai iha referal, hafoin ba ospital Nasionál, bainhira stok ai-moruk hotu no menus ekipamentus”.
Bainhira sira hato’o pedidu ba Ospitál Nasionál maka ai-moruk laiha, labele halo buat ida tanba sira laos produtor ai-moruk, atu garante disponibilidade ba ai-moruk sira bazeia deit ba pedidu ne’ebe sira hato’o.
“Maibé dalaruma ami husu stok ai-moruk iha Nasionál mak laiha, ami labele halo buat ida, atu garante ba disponibilidade ba stok, ami bazeia ba pedidu emerjénsia atu taka, maibé kuandu stok balun ne’ebé laiha, ami labele halo buat ida tanba ami la’os produtor”.
Nia informa, kona-bá stok ne’ebé maka Ospitál Referál Maubisse hasoru durante tempu naruk maka hanesan dizepan injeksaun ho tán konsumaveis, plastiku ba esterilinjeksi nian maka durante 2024 ate agora seidauk iha atu esteril bá ekipamentu sira halo operasaun sira ne’e maka plástiku laiha. Maibé ida ne’e lasai bareira no sira iha alternativu seluk maka uza fali APD no vistidu hodi kontinua halo operasaun bá pasiénte sira.