AJTL, TLPU & SAPNews Deklara Keixa Estudante UNDIL Halo Agresaun Fíziku Ba Jornalista

Imajem : AJTL, TLPU & SAPNews halo konferénsia imprensa hodi kondena agresaun fíziku hosi estudante UNDIL iha Sede AJTL, 22/10/2025. Foto : Daniel da Silva

SAPNewsTL, Díli : Relasiona ho agresaun fizika entre onkum estudante Universidade Díli (UNDIL) balun, hasoru jornalista média SAPNews Marino Pinto, Asosiasaun Jornalista Timor Lorosa’e (AJTL) hamutuk ho Timor-Leste Press Union (TLPU) no instituisaun média SAPNews deklara, la tolera aktu violentu ne’ebe komete husi estudante hasoru jornalista.

𝐆𝐮𝐢𝐥𝐡𝐞𝐫𝐦𝐢𝐧𝐨 𝐑𝐚𝐦𝐨𝐬 𝐝𝐚 𝐂𝐫𝐮𝐳 – 𝐒𝐀𝐏𝐍𝐞𝐰𝐬𝐓𝐋

Prezidente AJTL, Zeovonia Viera hatete, AJTL kondena maka’as aktu violentu no bullying hasoru jornalista, tanba estudante balun pratika brutalismu hasoru jornalista iha area kampus UNDIL.

“Ami husi AJTL sei foti asaun legál hasoru ema sira ne’ebé komete agresaun fiziku hasoru jornalista sira tuir Lei Komunikasaun Sosiál, Artigu 4”.Dehan Prezidente AJTL Zeovonia Viera, liu husi Konferénsia Imprensa iha salaun AJTL Fatuhada, Quarta-Feira, (22/10/2025)

Lideransa AJTL ne’e fundamenta, AJTL husu ba akadémiku no universitáriu sira atu respeita kanál mídia no respeita jornalista, bainhira sira hala’o atividade jornalístiku iha terenu ba kualker asuntu ne’ebé iha ligasaun ho interese públiku.

“Ami husi AJTL prontu fó apoiu ba vitima jornalista ne’ebe hetan agresaun fizika. Ami prontu kolabora ho SAPNews prosesa kazu ne’e ba Ministeiru Publiku tuir dalan legal” Tenik Zevonia.

AJTL Ezjije ba Conselho de Imprensa nu’udar instituisaun independente estadu nian ne’ebé defende no asegura liberdade imprensa no liberdade espresaun atu foti asaun ruma kona-ba aktu violentu hasoru jornalista sira.

Husu mós ba jornalista sira atu mantein kumpri Kódigu Étika Jornalizmu no prinsípiu universal jornalizmu nian nu’udar padraun étika no matadalan morál iha kontestu kobertura no publikasaun notísia.

AJTL mós husu ba jornalista no kanál mídia hotu-hotu atu evita halo live streaming ba asuntu sensitivu sira, hanesan asedu no violénsia seksuál atu garante no asegura nafatin prinsípiu prezunsaun inosénsia ka azas praduga tak bersalah no asegura dignidade umana sobrevivente sira-nian.

Husu ba Kanál mídia sira bele halo deit offline news, nune’e fasil atu halo konfirmasaun ho parte sira hodi halo notísia justu no balánsu.

Iha fatin hanesan, Prezidente TLPU Candido Alves afirma, nia parte sente triste tanba liberdade imprensa Timor-Leste nian, laos ema seluk mak harahun maibé, estudante universitariu sira mak hatudu hahalok brutalismu hasoru jornalista, hodi harahun liberdade imprensa.

“Ha’u triste tebes tanba Liberdade Imprensa la’os harahun husi ema seluk, maibé harahun rasik husi estudante universitariu sira, hahalok ida ne’e TLPU triste tebes, tanba ne’e TLPU hamutuk ho vitima no AJTL hakarak afirma katak ami la tolera hahalok ida ne’e”.

Nia haktuir Konstituisaun RDTL garantia liberdade ba jornalista hodi hala’o kobertura, sein limitasaun husi grupu ka individu balun, ne’ebe tenta impede servisu jornalista nian.

“Ita-nia konstituisaun fó dalan ba jornalista sira atu halo kobertura ba asuntu ne’ebe sai preokupasaun ba públiku, karik públiku ne’ebe la aseita ho produtu jornalista nian, bele hato’o keixa ba Konsellu Imprensa tanba Lei komunikasaun sosial fo dalan, maibé laos hatudu jagoan hasoru jornalista”.

Enkuantu vitima Marino Pinto, deklara katak, nia parte hetan agresaun fizika direita husi estudante UNDIL balun, nune’e nia hili dalan nonok, maske estudante balun ho emosional hakilar no dudu nia atu sai husi resintu UNDIL nian.

“Ha’u ho ekipa ba kampus UNDIL tanba ami hetan konvite husi vitima asediu sexual, maibé ami to’o iha ne’eba estudante sira, hakilar ha’u dehan duni nia sai husi ne’e, se mak haruka nia mai, sira konsege buti ha’u nia faru iha kakorok, dudu ha’u, sira barak hobur mai ha’u atu baku ha’u” Dehan Mariano

Vitima hatutan, aktu ne’ebe estudante sira komete, dalaruma estudante sira la kompriende papel jornalista nian, tanba ne’e sira impede kobertura jornalista nian.

“Kazu ne’e ha’u senti ofendidu, entaun ha’u hamutuk ho AJTL no TLPU sei lori kazu ne’e ba oin tuir dalan legal, tanba ha’u agresaun fisika husi estudante sira”.

Porta voz Mídia Sapnews Ermelinda Soares hateten desentendimentu ne’ebe akontese iha resintu kampus Universidade Dili (UNDIL) iha loron 21 Outubru 2025 maiz ou menuz haleu tuku 10 liu, iha ne’ebe estudante vítima asédiu seksuál konvida mídia atu halo kobertura kona ba konferénsia imprensa kontra dosente inisial MLS, maibe infelizmente konferénsia imprensa ne’e hetan impedimentu tanba la hetan autorizasaun ba fatin.

“Hafoin simu konvite kobertura, wainhira jornalista sira hosi mídia to’o iha resintu Kampus UNDIL, estudante sira husu ba jornalista SAPNews dehan “se mak haruka imi mai, konvite iha ne’ebe, hatudu se mak assina”, nune’e hatudu konvite ba sira, hafoin sira nonok hodi fila kotuk. Bainhira laiha ona desizaun atu halo konferénsia iha resintu UNDIL, jornalista sira deside atu husik fatin, estudante sira hatudu expertu, hakilar hodi dudu, duni no hakilar jornalista sira hodi sai hosi resintu UNDIL” Dehan Porta voz Ermelinda Soares

Porta Voz konta antes husik resintu UNDIL, hatan ba reasaun hosi dosente no estudante UNDIL, Jornalista Mídia SAPNews Marino de Deus Pinto dehan “ami mai tanba hetan konvite atu halo kobertura kona-ba konferénsia imprensa hosi vítima asédiu sexual iha UNDIL”, no iha momentu ne’e estudante sira ba kaer Jornalista Marino ninia faru gola no rasta besik ba kakorok no dudu hodi sai hosi kampus, nune’e vítima ne’e hili nonok hodi husik fatin.

“Durante dezentendimentu, Estudante UNDIL sira dehan, “Ami la presiza, imi jornalista mai halo saida.” iha tempu hanesan, Estudante balun mós husi kotuk dehan “tau no duni sai tiha”, nune’e jornalista ne’ebe presente iha fatin akontesimentu sente tauk no nonok deside sai hosi fatin no kontinua ba Farol hodi halo kobertura ba konferénsia imprensa hosi vítima sira tanba estrutura UNDIL la aseita halo iha resintu kampus”.

Nia haktuir bainhira estudante kaer faru gola jornalista Marino de Deus Pinto hodi rasta sa’e ba kakorok no hakilar dehan, “labele arogánsia iha ne’e, rona ka lae”, nune’e Jornalista Marino hatan, “ha’u mai kobertura”, estudante sira hakilar tan, “kartaun iha ne’ebé”, vítima seidauk hatudu kartaun, sira dudu lisuk, nune’e jornalista Marino deside ses an tanba hetan presaun makaas.

“Ami solidariza kolega jornalista Marino de Deus Pinto no kolega jornalista sira hotu ne’ebé mak simu liafuan insultu, maltrata no sente traumátiku husi Sivitas Akademiku UNDIL nian, ne’ebé la komprende no la hatene serbisu jornalista nian iha estadu direito no demokratiku”

Porta voz SAP News TL ne’e reafirma liu hosi konferénsia imprensa ne’e hateten :

1. Ami hamutuk ho vítima sei prosesa kazu ne’e ba iha konsellu imprensa no Polisia Nasional Timor-Leste hodi enkamiña ba ministeriu públiku hodi hetan justisa no naran di’ak knar lulik jornalista nian.

2. Ami husu ba Prezidente Fundasaun Boacril atual Primeiro Ministro Kay Rala Xanana Gusmão no Reitor UNDIL Sr. José Belo atual Prezidente CNE atu klarifika no foti medidas ruma hasoru oknum sira ne’ebé halo agresaun fiziku hasoru Jornalista Marino de Deus Pinto no jornalista sira ne’ebé marka prezente iha fatin akontese.

3. Husu ba Dekanu fakuldades, diretores departamentu, dosentes no estudante sira hotu iha UNDIL atu respeita serbisu jornalista nian ba liberdade imprensa no expressão tanba ita hotu moris iha estadu direitu no demokrátiku, ita tenki komunga valor demokrasia, prinsipiu direitus humanos no hatur justiça iha instituisaun hotu-hotu. Tanba atividade ne’e planeadu no organizadu husi vitima sira laos jornalista sira mak ba.

4. Husu ba sosiedade no akademikas tomak atu labele sai portavoz ka guardiaun ba kriminozu sira hodi taka dalan ba mídia atu halo notisia investigativu hodi fo sai lialos, justiça no halian lian laek sira lian liliu feto, labarik no ema vulnerável sira ne’ebe sai vítima iha sosiedade inklui instituisaun sira privadu no públiku.

5. Husu ba sosiedade tomak tantu sivis no militares, akademiku sira no públiku enjerál atu respeita no fo espasu ba jornalista sira hodi hala’o ninian knaar, basa jornalista mak sai matan, tilun no ibun no sai lian ba lian lae sira.

6. Ikus liu, husu ba vitima no familia vitima sira atu labele tauk koalia sai lia los, tanba lialos la mate, lialos sempre manan no lialos mak dalan ba sivilizasaun, assegura direitos humanos no igualdade.

Enkuantu, ligadu ho akontesimentu desrespeitu ba liberdade imprensa no tenta ameasa jornalista ne’e, Estrutura Mídia SAPNewsTL hamutuk ho AJTL & TLPU hola desizaun hodi keisa autor sira ba Ministériu Publiku iha loron aban (23/10/2025) hodi prosesa tuir dalan legal no buka justiça ba vítima agresaun fíziku.