Alkatiri Fo Mensajem 3 Ba SAPNews, Expedito Kongratula

SAPNewsTL, Díli : Iha ámbitu selebrasaun aniversáriu média online SAPNewsTL ba dala-III, Eis Primeiru Ministru Mari Alkatiri husu SAPNews hodi foku ba problema saúde,edukasaun no desenvolvimentu sustentável ho imparsialidade no defende lialos.

Eis Primeiru Ministru Marí Alkatiri hateten ba espiritu joven iha média juvenil SAPNews fanun nia iha momentu luta iha funu laran atu liberta povu Timor-Leste sai independente no demokrátiku.

Iha aniversáriu refere, Eis PM Mari Alkatiri parabeniza média juvenil no estudantil SAPNews aumezmu tempu ko’alia kona-ba tempu uluk sei luta iha ema balun eskolle hodi servi aan rasik ho Familia, balun fó aan ba mate atu serví kauza boot povu no pátria nian hodi fó aan ba mate laos tanba lakoi moris naruk.

“Balu eskolle nia aan rasik atu servi nia aan rasik no nia familia ne’e mak nia kauza, balun fali fó aan ba mate atu servi kauza boot ida, kauza povu no pátria nian, tanba ne’e sira fó aan ba mate laos tanba lakoi moris naruk, sira fó aan ba mate tanba hakarak hodi sira nia mate bele liberta pátria no liberta povu, tanba ne’e sira fó aan ba mate”.

Mari Alkatiri salienta, luta nain sira fó aan ba mate atu luta ne’e buras ba beibeik ho sira nia mate, nune’e ho espiritu luta joven sira nian iha média juvenil SAPNews fanun nia hodi hanoin fila fali iha tempu resistênsia ka luta nian.

“Sira fó aan ba mate atu luta ne’e buras ba beibeik ho sira nia mate, Nicolau Lobato mate ho 33 anos sira seluk tuir nia mate, balun katuas liu ona, balun sei joven, tanba ne’e ita bele dehan katak bainhira hahu ho espiritu, ha’u nia beioan sira ne’e fanu fali ha’u hanoin fali uluk ami sei luta”. Nia lembra.

Lider politiku ne’e mos hateten, buat hotu sempre hahu ho mehi ida, maske dala barak ema dehan mehi ne’e sei la realiza, mehi ba mate maibe mehi ne’e sei realiza.

“Hahú ho mehi ida, antes hahú ho mehi, dala barak ema dehan mehi ne’e sira sei la realiza mais ami dehan ami mehi no sei mate ba mehi ne’e maibe ami sei realiza. Tanba ne’e uma kauza, uma vida e uma jornada, ohin ita ko’alia jornada ida, jornada ne’e saida ? Jornada ne’e dalan ida atu la’o tuir, prosesu ida ne’ebe ita rasik aseita atu tuir”.

“Jornada ne’e dalan naruk bainhira iha kauza ida, kauza komun, ha’u bele dehan iha ami nia tempu, FRETILIN sai ita nia dalan ba moris atu servi kauza ne’e, FRETILIN hanesan dalan ba ita nia moris atu servi kauza”. Nia hatutan.

Mari Alkatiri akresenta kauza hirak ne’e ultrapasa ona no agora ko’alia kona-ba kauza jornalista nian, no sira nia kauza maka serví, serví buat ne’ebe importante.

“Maibe importante maka kauza jornalista sira nian, kauza jornalista sira nian ne’e maka ida ne’ebe? Servi ! Servi saida ne’e maka importante”.

Nia hatutan “Ohin ha’u rona, ha’u kontente tanba moris ho inisiativa joven sira nian, ema barak uluk ami kuandu hahú, balun bainhira la’o ba rai liur ema haree ami, imi ne’e se mak atu fiar imi? Imi kiikoan hanesan ne’e foin tinan 20 resin, se mak atu fiar imi”.

“Ha’u hatene katak ha’u nia beioan sira pernah hanoin hanesan ne’e, maibe importante ita atu define didiak ita nia kauza. Jornalista ohin dehan imparsial, imparsialidade ne’e labele retira ba ita, tenke dehan klaru saida maka ita hanoin dehan los, ita labele sai imparsial entre buat ida ne’ebe sala ho buat seluk ne’ebe los”.Nia sublinha

Jornalista hakarak dehan deit katak imparsial maibe tenke hatene no fó informasaun ida ne’ebe loos tuir dalan loos.

“Ita agora moris iha tempu ida ne’ebe susar tebes, iha lider sira balun mos hakribi ema nia kritika, lider sira balun mos lakoi opozisaun atu krítika. Ha’u hakribi sira nia sala maibe ha’u husu ba Nai Maromak atu perdua nafatin sira”.

Lider Nasionál ne’e husu ba ezekutivu SAP News TL hodi kontinua hamrik metin halo kobertura no foku ba problema saúde, edukasaun no desenvolvimentu sustentável.

“Ha’u nia beioan sira, imi kontinua hamrik metin, ba oin nafatin, halo kobertura ba saúde, edukasaun no desenvolvimentu sustentável, parabéns ba imi hotu, imi fanun tebes ha’u hodi hanoin fila fali ba tempu uluk wainhira ami hahú luta”. Alkatiri husu

Alkatiri konsidera SAPNews hatudu balun forte tanba ninia publikasaun barak liu hosi Facebook, Tiktok, YouTube no Website.

“SAPNews iha balansu ne’ebe ita bele dehan forte tebes, halo notísia iha facebook, tiktok, no website, ohin sira mós hetan apoiu ekipamentu hosi traballador timoroan iha Inglaterra, ha’u apreciação ba traballador ida ne’e, parabéns ba beioan sira hotu”. Alkatiri hakotu

Iha fatin hanesan, Sekretariu Estadu Komunikasaun Sosial (SEKomS) Expedito Dias Ximenes parabeniza SAP News tanba halo ona tinan tolu ne’ebé hamrik hanesan plataforma média online ida ne’ebé kontribui ba desenvolvimentu komunikasaun sosial iha Timor-Leste.

“Ha’u lori IX Governu Konstituisional nia naran hato’o parabéns ba SAPNews ne’ebé halo tinan III, ha’u husu katak nafatin kaer metin lei komunikasaun sosial no kódigu konduta jornalismu tanba save husi lei ne’e mak imparsialidade”.

Governante ne’e fundamenta, “Karik iha notísia ne’ebé la balansu no hetan atake husi públiku, lei komunikasaun sosial no kode étika jornalismu fo dalan hodi halo direitu de resposta ka halo retifikasaun, parabéns no parabéns ba SAP News TL “.

Presidente Konsellu Imprensa Otelio Ote parabeniza mos SAPNews tanba bele hakat liu dejafiu barak no halo tinan tolu.

“Ba SAPNews ha’u fo parabéns, normalmente média ida hari’i nia teste maka fulan tolu, se nia hakat entaun nia hakat dejafiu ida, teste tinan ida ne’e iha faze hari’i, halo tinan 2 ne’e hametin no halo tinan tolu ne’e iha faze atu haburas, imi halo tinan tolu ne’e katak imi hakat liu ona dejafiu “.

Otelio konta, “Kona ba SAPNews konta mós ho ha’u tanba la pasa iha plenária Konsellu Imprensa dala rua, ikus mai ha’u mak defende hodi rejistu tanba iha padre balun iha laran”. Nia dehan

Iha oportunidade ne’e Mídia Sapnews lansa revista visita Papa Francisco iha Timor-Leste, simu ekipamentu live streaming no lansa filmagem istoria susesu SAPNews.

Jornalista : Marciana da Conceição