APA Iliomar Orgullu KFFL Fasilita Formasaun Ba Foinsa’e 121 Ho Susesu
Imajem : Administrador Postu Administrativu Iliomar, Fernando Cardoso de Deus “Teky”, iha Salaun Parokia Iliomar,29/09/2024.
SAPNewsTL, Lautém – Klibur Foinsa’e Fini Lautém (KFFL) sertifika foinsa’e hamutuk atus ida ruanulu resin-ida (121), hafoin tuir formasaun diskursu públiku iha Iliomar durante fulan rua.
Iha diskursu Administrador Postu Administrativu Iliomar, Fernando Cardoso de Deus “Teky” fo agradese ba KFFL tanba bele iha boa vontade no foti responsabilidade hodi fasilita formasaun ba joven sira iha Iliomar tanba primeira vez imi bele fo materia diskursu públiku ba joven sira.
“Ha’u apresia no agradese tebes ba KFFL, imi bele ho laran badinas mai rai Iliomar hodi fo hanoin, hatene no fahe matenek ba imi nia maluk sira iha rai ida ne’e, imi iha duni domin, hanoin diak no vizaun ba oin, parabens imi hotu”.Tenik Administrador Postu Administrativu Iliomar Fernando Cardoso de Deus “Teky” iha Salaun Parokia Iliomar,29/09/2024.
APA Iliomar Fernando Cardoso de Deus “Teky”
Lider Postu Iliomar ne’e husu ba Klibur Foinsa’e Fini Lautém hamutuk ho Koordenador postu hodi kontinua fasilita formasaun diskursu públiku no materia importante sira ba joven sira iha Iliomar.
“Nu’udár Autoridade Lokal ami konsiente katak formasaun diskursu ne’e importante, tantu formasaun sira seluk ne’ebe liga ba jovens ne’e presiza kontinua ba oin, ami sei kontinua apoia tanba foinsa’e sira mak futuru sosiedade nian, foinsa’e sira presiza aprende barak hodi prepara an ba futuru”. Fernando Cardoso de Deus “Teky” sublinha
Iha fatin hanesan, Padre Paroku Nossa Senhora do Rosário de Fátima Iliomar,Atual Konseleiru KFFL Luis Pedro Claver Barros dehan foinsa’e nia tempu atu aprende mak agora, diak tebes tanba KFFL bele ajuda fo formasaun, foinsa’e sira tenki aproveita hodi aprende no hasa’e kuñesimentu ida-idak nian.
“Ha’u hanoin katak diak tebes formasaun ba foinsa’e, ha’u agradese ba estrutura KFFL no KFF-TL husi Munisipiu no Nasionál hodi fo formasaun ba foinsa’e sira, parabens ba foinsa’e sira ne’ebe partisipa ona formasaun, espera bele kontinua halo ba futuru no formandu sira bele aplika ba futuru”. Hateten Padre Paroku
Prezidente KFFL Jorge Alves da Costa apresia tebes ba autoriedade lokal sira iha Iliomar tanba bele apoia KFFL hodi fo formasaun diskursu públiku, liliu bele aseita sai konseleiru, oferese fatin ba KFFL.
“KFFL orgullu, louva no agradese ba Administrador Iliomar, Padre Paroku Iliomar no Xefe Suku Iliomar Primeiru ne’ebe aseita ami nia pedidu sai ami nia konseleiru KFFL”.
“Ami mós agradese tanba bele oferese fatin ba ami hodi hela, hala’o formasaun no realiza serimónia sertifikasaun ba formandu hamutuk 121, hafoin tuir formasaun diskursu públiku, obrigadu barak tebes ba imi hotu ne’ebe ohinbelepartisipaserimónia ne’e”. Jorge Alves da Costa hateten
Imajem : Formandu Diskursu Públiku hamutuk 121 ne’ebé partisipa serimónia sertifikasaun iha Salaun Parokia Iliomar.
Lider KFFL ne’e afirma KFF-TL iha ona Koordenador Iliomar, Luro, Lautém, Lospalos, KFFL sei kontinua formasaun ho materia ne’ebe diferente hodi tulun foinsa’e sira Lautém.
“KFFL sei kontinua fo formasaun ba foinsa’e sira iha Iliomar tanba iha ona kordenador husi Postu Luro, Iliomar, Lautém, Lospalos no sei expanda tan ba postu Tutuala no Lore iha tinan 2024”. Jorge afirma
Klibur Foinsa’e Fini Lautém nu’udar sanak ida husi Klibur Foinsa’e Fini Timor-Leste (KFF-TL) ne’ebe hari’i ho vizaun atinji sosiedade Timor ne’ebé demokrátiku, sivilizadu, fraternu, sólidu, únidu, krítiku, justu no laiha obstákulu ba jerasaun foun sira iha futuru.
Vizaun ne’e sei konkretiza liu hosi misaun :
1. Promove no kapasita foinsa’e Timor oan sira hodi partisipa ativa no kontribui direta iha prosesu dezenvolvimentu nasionál liu hosi formasaun, edukasaun sívika, sidatu husi Timoroan sira, tulun iha area kapasitasaun rekursus hotu-hotu hosi Timoroan sira hodi tane malu iha vida polítika. sosial, kultural, ekonomia no humanitaria nian.
3. Halibur Timoroan sira hodi hametin unidade tuir mahon kultura noidentidade Timor nian hodi hamutuk iha abut ida rai Timor ida deit.
4. Halibur ideia, kbiit no matenek oin-oin hodi haburas desenvolvimentu iha area hotu-hotu iha Timor-Leste. Buka matenek, fahe matenek no sai matenek hodi servi povu no dezenvolve Timor-Leste.
Iha serimónia ne’e Prezidente KFF-TL fo mos tomada de posse ba estrutura husi Postu Iliomar no Luro hamutuk sanulu resin-haat (14).
Enkuantu, partisipa iha serimónia ne’e maka autoriedade lokal, inan-aman formandu, formandu sira, Estrutura KFF-TL no KFFL.
Jornalista : Leonel Alves & Denilia Soares