Asegura Igualdade Jéneru ! SEI Halo Diálogu Ho Parseria Sira

Imajem : SEI Elvina Sousa & SEFOPE Rogério Araújo Mendonça iha Salaun Novu Turismo, 30/09/2025. Foto : Média SEI

SAPNewsTL, Dili : Sekretária Estadu Igualidade (SEI), hamutuk ho Sekretáriu Estadu Formasaun Profesional no Empregu (SEFOPE) realiza konsultasaun nasional kona-ba kuidadu ekonomia iha Timor-Leste hodi hadia no hamenus servisu domestika ne’ebe mak sem lukru.

Sekretária de Estadu da Igualidade (SEI), Elvina Sousa hateten konsultasaun nasional kona-ba ekonomia kuidadu iha Timor-Leste ne’e servisu hamutuk ho SEFOPE no sosiedade sivil sira atu promove dialogu ho parseiru sira hodi dezenvolve politika estratéjia hamenus no hadia servisu domestika ne’ebe la selu.

“Konsultasaun Nasionál kona-ba Ekonomia Kuidadu iha Timor-Leste ho Objetivu atu promove diálogu entre parte interesada sira inklui Governu, Sosiedade Sivíl, no Parseiru Dezenvolvimentu sira, atu dezenvolve polítika no estratéjia sira atu rekoñese, hamenus no hadi’a fali kuidadu no servisu doméstiku ne’ebé la selu, hodi promove igualdade jéneru” Dehan Sekretária de Estadu da Igualidade (SEI), Elvina Sousa ba jornalista sira iha Salaun Novu Turizmu, Terça-feira(30/09/2025).

Sekretária Estadu Igualidade ne’e haktuir iha sosiedade ne’ebé mak fo todan liu ba feto hodi halo servisu, ne’e hanesan bareira ba feto atu hakat ba oin no esplora sira-nia pontensial tanba ne’e liu husi konsultasaun nasional atu bele introduz care ekonomia iha Timor-Leste hodi redistribui servisu ne’ebé hanesan ba feto sira.

“Intensaun halo konsultasaun nasional atu bele introduz care ekonomia iha Timor-Leste, tanba ita presiza tebes redistribui servisu ne’ebé hanesan, presiza mos valoriza kolen ne’ebé feto maluk sira iha durante ne’e, tanba ne’e governu iha resposabilidade atu kria politika sira hodi hamenus no hasa’e koñesimentu ema nian atu bele muda hahalok ou tendênsia sira ne’ebé maka hatodan feto maluk sira”.

Iha Fatin hanesan, Sekretariu Estadu Formasaun Profisional no Empregu (SEFOPE), Rogério Araujo Mendonça haktuir
empodera feto iha servisu fatin, SEFOPE iha lei ne’ebe relasaun servisu ho SEI nian liuliu servisu domestika ne’ebé sei lori ba konsellu ministru.

“Ko’alia kona-ba empodera feto iha area rural espesifiku liu mak oinsa kuidadu ferik, katuas, labarik, inan-aman liu-liu feto sira iha servisu fatin, iha lei balun ne’ebé parte SEFOPE to’o agora mos seidauk lori ba konsellu ministru, relasaun servisu ho SEI nian kona ba servisu domestika, asediu seksual iha fatin servisu”.

SEFOPE salienta kona-ba ekonomia ko’alia jeral husi SEFOPE nian katak iha balansu parte traballador servisu iha rai liur no iha rai laran balansu husi 60% no 40%.

“Ita bele hateten katak Timor mos bele hanesan nasaun sira seluk no kumpri ona lei sira ne’ebé promove feto hola partisipasaun iha dezenvolvimentu, hasa’e ekonomia rai laran ita iha programa empregu temporária, iha grupu balun feto mak lidera hotu hatudu katak partisipasaun feto iha area rural sira ne’e importante tebes”.

Enkuantu, iha konsultasaun nasional kona-ba ekonomia kuidadu iha Timor-Leste ne’e partisipasaun husi Sekretária de Estadu da Igualidade (SEI), Elvina Sousa, Sekretariu Estadu Formasaun Profisional no Empregu (SEFOPE), Rogério Araujo Mendonça no Xefe-Seksaun Igualdade Jeneru no Inkluzaun Sosial UN ESCAP Cai Cai, Reprezentante UNICEF iha Timor-Leste, Koordenadór Rezidente ONU Interinu Patrizia DiGiovanni