Asegura Inan no Labarik Feto !  MS-UNFPA Kontinua Lansa Uma Mahon Vítima Sira 

Imajem : Vice Ministru Saúde ba Operasionalizasaun Ospitál, Flávio Brandão de Araújo asina plaka iha Baucau,21/11/2024. Foto : Ermelinda Soares

SAPNewsTL, Baucau — United Nations Population Fund (UNFPA) kontinua implementa komprimisiu, apoiu Governu Timor-Leste redus numeru Violénsia Bazeia ba Jéneru (VBJ) iha territóriu nasionál, liu husi lansamentu Fatin seguru ba vitima sira iha Hospital Rejionál Eduardo Ximenes (HOREX) Baukau.

Vice Ministru Saúde ba Operasionalizasaun Ospitál, Flávio Brandão de Araújo informa, objetivu lansamentu uma seguru ba vitima VBJ, tamba Ministeriu Saúde (MS) serbisu hamutuk ho UNFPA no entidades sira, kria forsa trabalhu ida hodi bele reduz no fo asisténsia ba vítima VBJ ne’ebe akontese iha Timor-Leste.

“Inagurasaun fatin seguru hodi haree  violénsia bazeia ba jeneru, tanba violénsia bazeia ba jeneru ne’e la’os feto deit, maibé ba labarik feto no mane hotu, liu-liu inan ho oan, entaun ohin UNFPA koopera ho MS lansa tan fatin seguru ba vitima sira”. Dehan Vise Minstru MS Operasionalizasaun Ospitál Flávio Brandão iha Hospital Rejionál Baukau Qinta (21/11/2024)

Nia akresenta, fatin seguru ne’e rasik sai prioridade ida ne’ebé alinea mós ho programa Governu nian, tanba iha tinan 2016 halo estudu ida kona-ba peskiza demografia hatudu katak 32% hetan violénsia bazeia ba jeneru, husi ne’eba kedas, Governu liu husi MS halo esforsu hamutuk ho parseiru estratejiku dezenvolvimentu sira, oinsá fó resposta ida kona-ba violénsia ne’ebé mak sai baze ba jeneru entre feto no mane.

“Ita hotu-hotu tenke hatene, tanba violénsia la’os deit fisiku, maibé psikolojikamente mós bele violénsia no mós ekonomikamente violénsia, aleinde né’e mós violénsia fisiku ne’e parte ida husi ita nia resposta, tanba ne’e Governu liu husi MS halo esforsu hamutuk ho parseiru estratejiku dezenvolvimentu sira, implementa uma seguru, entaun ita nia papel atu halo tratamentu ba vitima ne’ebe sofre violensia fisiku, no psikolojikamente”.

Flávio hatutan, Parseiru sira servisu hamutuk ho Governu hodi minimiza númeru ne’ebé mak iha, maibé oinsá mak bele elimina númeru hirak ne’ebe idenfika ona, tanba violénsia ne’e mosu husi ema ida-idak nia mentalidade, no abilidade atu halo kontrolu ba nia postura, nune’e labele enkuadra nia an hanesan vitima ba VJB.

“Ita nia mentalidade kiak ho riku ita la uza, tanba mentalidade ida kiak la’os sukat ho osan ka sasan ne’ebé mak ita iha, maibé bainhira ita iha mentalidade riku signifika katak ita iha abilidade atu halo buat ruma, hanoin saudavel hodi hadok ita husi depresaun psikolojika iha nia servisu fatin ka komunidade, tanba ne’e mak ita tenke halo transformasaun mentalidade ida ne’ebé saudavel”.nia sublina

Imajem : Uma Mahon Ba Vítima Violénsia Bazeia ba Jéneru

Reprezentante  Prezidente Autoridade Munisípiu Baucau, (PAM) Maria Celestina  Viegas, hateten, Munisipiu Baucau nu’udar Munisipiu bo’ot ne’ebe reprezenta 10% husi total populasaun Timor-Leste nian, iha mos risku a’as ba problema sosial oioin, inklui, VBJ tanba ne’e esensial tebes atu asegura ambiente ne’ebe seguru ba ema hotu, liu-liu ambiente ne’ebe seguru ba inan feto no labarik feto sira ne’ebe hetan Violensia Bazeia ba Jéneru.

 “Asegura dezenvolvimentu inkluzivu, protege direitos humanos, no kria ambiente ba sosiedade ne’ebe livre husi violénsia, seguru no saudável, ema hotu tenki sente seguru wainhira vizita ka hela iha Baucau,  sente onradu tebes bele sai sasin ba inagurasaun fatin seguru ida ne’e, tamba ho ezistensia fatin seguru, vitima violénsia doméstika no VBJ sira bele iha ona oportunidade hodi asesu ba servisus saúde essensial ne’ebe importante”.

Nia salienta, prevensaun ba violensia no kria espasu ne’ebe seguru ba ema hotu liu-liu feto no inan feto sira hodi partisipa ho diak, seguru iha dezenvolvimentu lokal no sosio ekonómiku nasaun Timor-Leste nian.

“Munispiu Baucau tenki sai munisipiu ne’ebe seguru ba ema hotu hodi bele partisipa ho diak ba Baucau ida ne’ebe dezenvolvidu, moos, no sivilizadu, ita bo’ot sira nia esforsu tomak ba prevene violénsia no kria espasu no sidade Baucau ne’ebe seguru no livre husi violénsia ba ita hotu”  Hakotu nia.

Iha fatin hanesan, reprezentante UNFPA Domingas Bernardo afirma, lansamentu fatin seguru iha HOREX Baucau marka istoria ida, mai husi esforsus koletivu, atu kria espasu ida ne’ebe seguru ba feto no inan feto sira hotu, no apoia fasilidade saúde sira ho kondisaun diak hodi bele prevene no responde ba VBJ diak no efetivu.

“Violênsia Bazeia Ba Jêneru sai ona hanesan assuntu/problema saúde públika, entaun ita esforsu hamutuk marka tan istoria ida, kontribui ba elimina VBJ, tanba problema VBJ sai ona hanesan violasaun komum ba problema direitus umanus iha nasaun joven, Timor-Leste”.

Nia fundamenta, espesialmente iha munisipiu Baucau, 21% husi feto sira ho idade tinan 15-49 esperiensia ona violénsia fíziku husi kedas wainhira sira sei idade 15, ida ne’e kazu ida ke seriu tebes no presiza ema hotu nia kontribuisaun serbisu hamutuk hodi asegura katak sidade Baucau sai modelu no espasu ne’ebe feto no labarik feto sira serbisu livre husi violénsia.

“Estabelesimentu fatin seguru iha fasilidade saúde nia laran, importante tebes atu fornese apoiu linha dahuluk no komponentes sira seluk husi pakote servisu essensial saúde ba sobrevivente sira hodi asegura mós privasidade no konfidensialidade ba vítima sira, iha ita nia sosiedade”.

Aleinde ne’e reprezenta UNFPA Timor-Leste, hato’o apresiasaun bo’ot ba Ministériu Saúde espesialmente Diresaun Jeral Kuidadu Saúde Primaria no Diresaun Nasional Saúde Maternal infantil, PAM Baucau, servisu saúde Munisípiu Baucau, Sekretaria Estadu Igualdade, no Ajensia  KOICA ne’ebe fó apoiu finanseriu, serbisu makas hodi tulun sosiedade iha Timor-Leste.

Entertantu, orsamentu ne’ebe gastu hodi finansia ba fatin seguru iha Ospitál Rejional Baucau hetan apoiu husi Governu Corea iha Timor-Leste liu husi ajensia KOICA ho total orsamentu $ 53,518.08.

Jornalista : Ermelinda Soares