Asidente Aviaun Iha Ecuador, Rezulta Timoroan Pe. Enio Fila Hikas Ba Aman Maromak

Foto : Espesial

SAPNewsTL : Ligadu ho asidente trájiku aviaun C172 HCBAN ne’ebe monu iha Wishim, Kanton Taisha, Provínsia Morona Santiago rezulta ema na’in tolu lakon vida inklui Timoroan Padre Enio Esteves iha Ecuador.

Tuir publikasaun hosi eluniversu.com haktuir katak ema relijiozu ida no tripulante aviaun nian hamutuk na’in 3 mate iha dezastre aviaun ne’ebe akontese iha Provínsia Morona Santiago, Ecuador.

“Ema na’in tolu lakon vida iha lorokraik, loron 26 Janeiru 2026, tanba dezastre aviaun ne’ebé akontese iha Wishim, parte husi Kanton Taisha, iha provínsia Morona Santiago”. Sita eluniversu.com. Ecuador, 26/01/2026.

Tuir informasaun aviaun ne’e husi Wishim halo viajen ba Wasakentsa ho objetivu atu halo atividade serbisu komunidade nian mak hetan asidente.

“Dezastre ne’e akontese iha oras 18:10, bainhira aviaun husi kompañia Aero Morona husik pista iha Wishim”.

Vítima sira ne’ebe identifika mak hanesan Padre Enio Esteves SDB. (Pastor Parokia Zona Achuar), Kapitaun Danny Patricio López (Pilotu no jerente kompañia Aero Morona) no Roberto Wisum Tsamaraint (Sekretáriu Misaun Wasakentsa).

Vítima sira ne’ebé mate, komunidade sira konsidera sira ativu tebes iha atividade sosiál no relijiozu iha Provínsia Morona Santiago.

Hafoin dezastre, komunidade sira to’o lalais ba fatin akontesimentu hodi ajuda vítima maibe la konsege salva tanba esplozaun aviaun nian makaas.

Bispu Vikariatu Apostóliku Méndez, Nestor Montesdeoca, sente tristu tanba Padre Enio Esteves mós lakon vida iha asidente refere.

“Ami iha lutu. Ami-nia sentidu pésames ba sira ne’ebé mai ba Vikariatu Apostóliku Méndez no família Salesiana sira” Líder relijiozu ne’e hakerek.

Insidente ne’e sai tristeza boot ba komunidade Taisha no provínsia Morona Santiago tomak tanba vítima sira iha dedikasaun no kompromisu ba komunidade Amazónia.

Padre Enio nu’udar misionáriu ida, Timor nia oan mane ida ne’ebe sai servidór fiél Evanjellu nian iha Ucuador, ema ida ne’ebé dedika an tomak ba povu Achuar no Shuar.

Nia saran nia moris ho haraik-an, empeñu, no espíritu servisu nian ne’ebé loos. Nia sai sasin fiar nian ne’ebe sempre besik ba sira ne’ebé haraik-an, serbisu la kolen ba povu Amazónia.

Ohin, lalehan simu misionáriu ne’e no mundu despede bibi-atan di’ak ida ne’ebe sempre kuda valor esperansa, dame no domin ba komunidade sira.

Povu Achuar no Shuar hato’o sira-nia kondolénsia sinseru ba nia família, belun sira, komunidade sira, no ema hotu ne’ebé fahe nia misaun. Atu Maromak simu nia iha Nia glória no nia ezemplu kontinua fó naroman ba ita-nia dalan.

Tuir informasaun ne’ebe SAP News TL asesu katak Padre Enio Esteves husi kongregasaun Salesianu Dom Bosco (SDB) no orijem hosi postu administrativu Iliomar, munisípiu Lautém.

https://www.eluniverso.com/noticias/ecuador/un-sacerdote-y-dos-personas-mas-fallecen-en-accidente-de-avioneta-en-morona-santiago-nota/?outputType=amp