Assanami Kongratula SAPNews, Dejeza Lori Informasaun Los, “Resiste Hodi Manan”

SAPNewsTL, Dili : Vise Primeiru Ministru, Ministru Koordenador Asuntu Sosiais, Ministru Dezenvolvimentu Rural no Habitasaun Komunitária (VPM-MKAS-MDRHC), Mariano Assanami Sabino kongratula SAPNews tanba bele eziste no tahan to’o ohin loron hodi selebra existênsia ba tinan haat.

Marciana Conceição – SAPNewsTL

“Parabéns ba SAPNews ne’ebé maka hari’i husi juventude inovativu ne’ebe maka kreativu. Parabéns tanba konsege la’o ona to’o tinan haat, tinan haat tempu ida ne’ebé mak imi bele aprende, esforsu no hakaas aan”. Hateten Vise Primeiru Ministru Mariano Assanami Sabino ba SAPNews iha Palasiu Governu, 26/02/2026

Assanami Sabino hateten papel mídia krusial tebes hodi fahe informasaun ba povu tanba konsagra ona iha konstituisaun RDTL artigu 40° kona-ba liberdade imprensa no 41° kona-ba liberdade expressaun.

“Imi-nia kontribuisaun ba média sosial, kontribuisaun fahe informasaun ba povu ne’e importante tebtebes. Ne’e direitu konstituisional povu nian para hatene lolos informasaun iha rai ida ne’e”.

Assanami hatutan, “imi-nia liberdade para atu bele hetan informasaun, esperansa no garante deveres, ne’e direitu ne’ebe konsagradu iha luta resistensia nian. Tanba ne’e mantein no kontinua la’o ba oin, kontinua servisu ho hakas an”.

“Dala ruma imi hasoru dezafiu no difikuldade maibe atu orienta nafatin imi atu kaer nafatin lema resistensia nian katak ‘resistir para vencer’, imi sei resiste no esforsu, imi sei manan, manan esperiénsia, reforsa instituisaun no imi sei maduru ho esperiénsia, instituisaun SAPNews sei forte”.

Vise Primeiru Ministru ne’e mós kongratula jornalista no fundador sira ne’ebe iha SAP News tanba bele firme no asegura média refere to’o ohin loron.

“Parabéns ba SAPNews no Parabéns ba fundadór hotu no foinsa’e sira, imi-nia kontribuisaun importante ,saida maka imi halo no papel ne’ebe tenke halo no halo duni, uta kontinua”.

Assanami dezeja Sapnews.com ne’ebe forte, metin no sustentavel liutan hodi lori informasaun ne’ebe los no kredível ba povu iha mundu.

“Esperansa ba SAPNews sei sai media ida ne’ebe forte, média ne’ebe fo informasaun ne’ebe los no hola parte garante nafatin prosesu demokratizasaun no garante liberdade espresaun ba ema hotu”.

Mídia SAPNews kompleta tinan 4 iha espasu informasaun, komunikasaun no konsientizasaun, durante tinan haat SAPNews sai lian ba komunidade, fo espasu ba verdade, transparénsia no partisipasaun sidadania nu’udar média juvenil (jovens), akadémiku (graduadu sira) no estudantil (estudante universitáriu) sira-nian.

SAPNews nu’udar mídia online ne’ebe hari’i hosi jovens, estudante universitáriu, formandu profissional jornalismu no graduadu sira ho prinsípiu informativu, inspirativu & konstrutivu ho misaun hametin no haburas konstrusaun estadu de direitu no demokrátiku hodi atinji sosiedade ida justu, prósperu, & solidáriu.

Iha prosesu konstrusaun estadu no nasaun, imprensa hala’o papel importante krusial ba dezenvolvimentu nasionál, SAPNews kontinua hatudu kompromissiu atu servi ho verdade, hakraik an, profesionalizmu, independente, objetividade no responsabilidade.

Tinan 4 la’ós deit kona-ba selebrasaun, maibé mos kona-ba refleksaun no renovasaun promesa atu kontinua fó notísia ne’ebé kredível, edukativu no konstrutivu ba povu no nasaun.

Ho sentimento orgullu no gratidaun, ohin SAPNews kompleta tinan 4 ninia existênsia nu’udar plataforma informasaun ne’ebé kontinua kontribui ba dezenvolvimentu komunikasaun no konsolidasaun demokrasia iha sosiedade.

Iha kontextu mundu digital ne’ebé muda lalais, SAPNews permanese hanesan valor informasaun ne’ebé fó informasaun no haklaken lialos ba komunidade. Tinan 4 la’ós deit marka ida hosi tempu, maibé prova ida hosi perseveransa, integridade no servisu makas hosi ekipa jornalístiku, editor sira no konselleiru sira hotu. Sira-nia dedikasaun mak halo SAPNews sai fonte notísia ne’ebé kredível, konfiavel no respeitadu.

SAPNews sei kontinua hametin nia papel hanesan lian povu nian, promove transparénsia no boa governasaun, direitos humanos, justiça sosial no unidade nasional.

Tinan haat la’ós tempu naruk iha istória, maibé sufisiente atu prova determinasaun, vizaun no servisu makas ne’ebe bele transforma inisiativa ida sai institusaun ne’ebé iha kredibilidade no fo impaktu real ba sosiedade. SAPNews la’o iha dalan ne’ebé la fasil. Iha tempu mudansa digital ne’ebé lalais, desinformasaun ne’ebé espalla barak, no dezafiu ekonomiku ne’ebé imprensa hotu-hotu hasoru, SAPNews hili hamrik metin iha prinsípiu verdade, independénsia no responsabilidade.

Jornalizmu mak rin ida ba demokrasia, liberdade no direitos humanos, Bainhira informasaun loos no balansu hetan fatin, povu bele halo desizaun ho konsiensia no responsabilidade. SAPNews hola nia papel hodi kontribui kiik la’ós deit relata eventu sira, maibé mos ajuda forma opiniaun públika ne’ebé saudável no konstrutivu (promove pensamento lógico e decisão racional)

SAPNews rekonhese katak susesu ida ne’e la mai hosi ema ida deit maibe sinergia katak rezultadu hosi ekipa ne’ebé servisu ho dedikasaun loron no kalan, editor sira ne’ebé tau prioridade ba etika profesional, kolaborador no leitor fiel sira ne’ebé kontinua fó konfiansa.

Iha tinan 4 ne’e, SAPNews la’ós deit selebra pasadu, maibé mos haree ba oin. Futuru mídia iha Timor-Leste presiza inovasaun, adaptasaun teknolojia, no kapasidade atu atinji nível internasional. SAPNews esforsu atu sai ponte informasaun entre Timor-Leste ho rejiaun ASEAN no komunidade CPLP, lori lian Timor ba mundu no lori mundu ba Timor.

Joven sira iha SAPNews fiar katak ho vizaun klaru, lideransa forte no kompromisu ba qualidade, SAPNews sei kontinua sai referénsia iha área komunikasaun sosial ho kompromisu hametin independénsia editorial, investe iha inovasaun digital, eleva padraun profesionalizmu, estabelese rede kooperasaun iha nível nasional no internasional.

Evangelhu João 8:32, “Lia-loos sei halo ita livre.” Iha tinan 4 nia laran, SAPNews hatudu katak informasaun loos mak dalan ba liberdade no konsientizasaun sosiedade ba justisa, prosperidade no desenvolvimentu. Servisu jornalístiku la’ós deit profisaun, maibé mos misaun atu fó naroman iha fatin ne’ebé mosu dúvida, preokupasaun no inserteza.

Hafoin Tinan haat SAP News TL rejista followers hamutuk 23.500 iha Tiktok, 3.430 seguidores (571.700 viewers) iha YouTube, no 67.900 seguidores (20.000.000 viewers) iha Facebook.

SAPNews agradese ba Maromak ba dalan ne’ebé hakat to’o ohin, laran-metin katak SAPNews sei kontinua sai instrumentu ba verdade, paz no unidade iha Timor-Leste.

Parabéns ba ekipa SAPNews no família boot SAPNews ne’ebe namkari iha rai-laran no rai-liur. Obrigadu barak ba seguidores, leitores no vizualizadores hotu iha mundu inteiru. Maromak sei tulun ita hotu. Luta Kontinua, Luta Naruk Ba Ita Hotu

#sapnewstl #assanami #sapnews #timorleste