Assassinatu Ba Ema Na’in 22 ! Familia Martires Husu Guvernu Valoriza Masakre Baigua
Imajem : Autoridade lokal & komunidade komemora loron proklamasaun liu hosi vizita fatin masakre Baigua iha Luro, 26/11/2025
SAPNews, Lautem: Durante vizita fatin istóriku Masakre Baigua iha Postu Administrativu Luro Munisípiu Lautem, familia martires Andre Dias Hornay husu ba guvernu hodi valoriza no tau matan ba fatin historiku Masakre Baigua ne’ebe ema ruanulu resin rua mate tanba hetan assassinatu husi forsa Indonesia sira iha 1980.
Iha intrevista ho familia martires Andre Dias Hornay ba jornalista SAPNewsTL hateten parte familia sente triste tanba lakon nia familia ne’ebe barak mate tanba hetan tiru husi forsa Indonesia sira.
“Ami familia matebian sente laran triste tanba lakon ami-nia ema maibe ami konsiente ida ne’e mak konsekuensia funu nian ne’ebe ami tenke simu tanba ne’e akontese iha funu nia laran”. Haktuir familia martires Andre Dias Quintas iha fatin akontesementu Masakre Baigua iha Suku Lacawa Postu Luro Munisípiu Lautem, 26/11/2025
Andre mos husu ba parte relevante sira atu tau matan no valoriza mos ba fatin Masakre Baigua liu-liu loke estrada no halo monumentu iha fatin masakre atu ema bele vizita no jerasaun foun sira labele haluha.
“Se bele karik guvernu liu-liu Ministeriu relevante agora ne’e bele tau matan no valoriza ba fatin ida ne’e tanba fatin ne’e masakre katak ema barak mate iha fatin ida ne’e, husu halo netik monumentu ruma no loke dalan mai fatin ne’e atu iha loron bo’ot sira bele asesu hodi mai vizita fatin ne’e” Tenik Andre
Iha fatin hanesan, Xefe Suku Lacawa Abilio do Rosario hateten parte autoriedade Suku iha ona planu atu liu husi Programa Nasional Dezenvolvimentu Suku hodi halo estrada no ba oin kontinua halo pedidu hodi hari’i monumentu.
“Ami iha planu ona atu loke estrada mai iha fatin Baigua ne’e liu husi Programa Nasional Dezenvolvimentu Suku (PNDS) nian ami hatama ona pedidu no ha’u konfirma ona nain ba Rai husi lisan Sure nian, ami koordena ona, ne’e ami tau importansia hodi halo estrada betaun mai iha area masakre Baigua nomos ba futuru ita sei halo pedidu ba CCLN atu hari’i monumentu ligadu ho familia sira ruanulu resin rua ne’ebe mate iha fatin ida ne’e, ita tenke valoriza sira atu iha nia loron, ita mos mai komemora iha ne’e” Informa Xefe Suku
Nune’e mos António dos Santos nu’udar nain ba rai Baigua ba fatin Masakre informa iha Postu Luro Masakre uniku mak Baigua tanba ne’e ba oin hakarak halo netik monumentu ruma ka loke estrada to’o fatin Baigua hodi enkuadra nu’udar fatin turizmu historiku ida, Nune’e ema bele vizita.
“Karik ba oin halo monumentu ka halo buat ruma iha ne’e ami bele oferese mas pelumenus iha intervensaun husi estadu nian liu-liu kestaun indiminizasaun oituan hodi oferese tanba rai ne’e kuandu sai ona estadu ba oin to’o iha ne’ebe mos nafatin estadu tanba ne’e hakarak iha indiminizasaun ka osan oituan hodi oferese para ba oin rai ne’e bele utiliza tanba rai ne’e la’os oituan ne’e deit maibe ba oin sei haluan tan hodi bele halo monumentu ida iha ne’e”. Antonio hato’o
Entretantu, tuir sasin akontesementu Masakre Baigua konfirma masakre Baigua akontese iha 15 Agusto 1980 no ema sira ne’ebe mate iha masakre Baigua ne’e hamutuk nain ruanulu resin rua ne’ebe mai husi Suku Lacawa, Wairoque no Baricafa.