Assosiasaun Parteira Sei Prevene Violénsia Bazeia Ba Jéneru Iha Setor Saúde

SAPNewsTL, Díli – Ministériu saúde,(MS) servisu hamutuk ho Asosiasaun Parteira Timor-Leste (APTL), ne’ebe apoia husi Fundu Populasaun Nasaun Unida (UNFPA, sigla Inglés), realiza sensibilizasaun kona bá violénsia bazeia bá jéneru iha sétor saúde bá parteira munisípiu Díli.

Prezidente Assosiasaun Parteira Timor-Leste Munisipiu Díli (APTL-MD) Joaquina Francisca Belo hateten, objetivu hala’o sensibilizasaun ne’e atu hasa’e koñesimentu no abilidasde profisaun parteira liuliu iha saúde inan ho oan ba bem estar família nian, no tulun governu iha dezenvolvimentu nasional hodi hadia nivel saúde públika no hadia dezenvolvimentu servisu parteira nian.

“APTL-MD hala’o sensibilizasaun ne’e atu hasa’e membru sira nia koñesimentu no abilidade iha profisaun parteira liuliu iha saúde inan ho oan no bem estar familia nian. Tulun governu iha dezenvolvimentu nasional hodi hadia nivel saúde públika no hadia dezenvolvimentu parteira sira nian iha sosiedade nia le’et”. Tenik Prezidente APTL Joaquina Francisca Belo iha Salaun City8 Dili, 15/08/2024.

“Assosiasaun Parteira Timor-Leste hanesan sumbriña ida, koko atu halibur nia membru sira hotu, kada tinan Parteira foun aumenta ba bebeik, balun foin remata estudu no balun kontinua sira nia estudu iha rai laran no rai liur, nune’e bele servisu ho kualidade di’ak liu tan no fó atendimentu saúde ne’ebe kualidade hodi bele redus númeru moras no mate ba inan ho oan sira”. Joaquina Francisca Belo hateten

Lider APTL Joaquina hatutan papel parteira iha pilar 4 mak implementador, dezenvolvimentu, edukador no peskizador.

“Papel Parteira iha pilar 4 mak implementador, dezemvolvementu, edukador, no peskizador, parteira nafatin hakarak kapasita an liu husi programa oin-oin, APTL-MD la’o ba oin nafatin ho lema: kultura servisu, matenek, ativu, konfortavel, inovativu no kompromisiu hodi servisu hamutuk, promove unidade no fraternidade entre parteira no feto sira hodi bele hametin unidade nasional”.Nia Salienta

Joaquina husu atu tau atensaun hodi hamutuk ba salva vida família nian no vida pasiente sira nian iha ne’ebe deit no bainhira deit.

“Filozofia Parteira neʼebé ita presiza tau atensaun hamutuk, maka parteira hotu-hotu hanesan eroi ida,erói ida ba nia an rasik, ba nia família, ba nia belun sira, ba nia pasiente sira no heroi bá associasaun, ami sente orgullu tanba hetan selesaun atu sai parteira no sai Membru APTL” nia fundamenta

Presidente APTL, deklara APTL sei fahe konesemeñtu bá estrutura foun,liliu kona bá violénsia bazeia bá jéneru hodi fo atendimentu ne’ebe diak bá kliente sira iha sétor saúde.

“APTL foin eleitu iha dia 27 de Jullu 24 ne’e, ami iha ona planu kurtu prazu no longu prazu, APTL Munisipiu Díli, oinsa atu fó koñesimentu ba estrutura APTL eleitu ho parteira sira hotu hodi fo atendementu ho diak ba kliente sira ne’ebé ho problema Violénsia bazeia bá jéneru (VBJ)”Nia informa

Lider APTL ne’e mós agradese bá parseiru UNFPA ne’ebe apoio sensibilizasaun kona bá violénsia bazeia bá jéneru bá parteira sira.

Enkuantu, Parteira ne’ebe hala’o servisu iha Munisípiu Díli hamutuk atus-tolu-esin(300). Iha sensibilizasaun ne’e hetan partisipasaun maximu husi parteira sira hamutuk atus-rua neen-nulu (260), kompostu husi HNGV, SMS DÍLI, UNTL, CRISTAL NO ICS.

Jornalista: Conzita Mota & Marçiana da Conceição