Atake Iha Ukránia ! Papa Leão: “Buat Aat só Bele Manan ho Buat Di’ak”.
Foto : Vatican News
SAPNewsTL : Ligadu ho atake ne’ebé akontese iha Ukránia, Papa Leão XIV subliña katak nia parte “akompaña ho tristeza saida maka akontese iha Ukránia, ha’u reza ba sira ne’ebé sofre.”
Papa Leão XIV fo nia apelu dame ba mundu tanba povu ukranianu sira iha loron hirak ikus ne’e sofre bombardeamentu ba infraestrutura enerjétiku sira, halo ema liu millaun ida laiha eletrisidade, bee no akesimentu iha temperatura.
“Iha mós loron hirak ikus ne’e, Ukránia hetan atake sira ne’ebé la para, hodi husik populasaun tomak hetan espozisaun ba malirin invernu nian. Ha’u akompaña ho tristeza saida maka akontese, ha’u reza ba sira ne’ebé sofre.” Hateten Amu-Papa Leão XIV iha Sidade Vatikanu, 26/01/2026. Sita hosi Notísia Vatikanu
Ostilidade sira ne’ebé prolongadu, ho konsekuénsia sira ne’ebé grave beibeik ba ema sivíl sira, habelar divizaun entre povu sira no hadook dame ida ne’ebé justu no dura. “Ha’u konvida ema hotu atu intensifika liután sira-nia esforsu hodi hakotu funu ida-ne’e.”
Leão XIV dirije ba foin-sa’e barak husi Asaun Katólika iha Roma, ne’ebé prezente iha Angelus iha Prasa S. Pedro hodi tau importánsia no fó sasin ba fraternidade.
“Labarik no foin-sa’e sira, ha’u agradese ba imi tanba ajuda ami adultu sira atu haree mundu hosi perspetiva ida ne’ebé diferente, katak kolaborasaun entre ema sira no nasaun sira ne’ebé diferente. Sai ema ne’ebé haburas dame iha uma, eskola, iha desportu, iha fatin hotu-hotu.”
Santu Padre hatutan, labele sai violentu, “buat aat só bele manán de’it ho buat di’ak. Hamutuk ho joven sira-ne’e, mai ita reza ba dame iha Ukránia, iha Médiu Oriente, no iha rejiaun hotu-hotu ne’ebé, infelizmente, konflitu sira akontese tanba interese sira ne’ebé la’ós povu nian. Dame hari’i liuhosi respeitu ba povu hotu-hotu.”
Amu-Papa fo nia hanoin kona-ba Loron Mundiál Lepra hodi enkoraja Assosiasaun Italiana AIFO no ema hotu ne’ebé tau matan ba sira ne’ebé afetadu atu “kompromete sira-nia an hodi proteje sira-nia dignidade”.