Atinji Kualidade Informasaun, Xanana : FDCH Sei Ajuda Fomasaun Ba Jornalista Sira

Imajem : Primeiru Ministru Kayrala Xanana Gusmão hamutuk ho Jornalista SAPNews iha Salaun CNE Laline Larigutu,05/10/2024. Foto : Dircia Baptista Belo

SAPNewsTL, Díli — Primeiru-Ministru (PM) Kay Rala Xanana Gusmão informa Fundu Dezenvolvimentu Kapitál Humanu sei atu ajuda formasaun rekursu humanu ne’ebe bele halo jestaun ba atividade hotu-hotu hodi hasa’e kualidade produtu jornalistika iha Timor-Leste.

Primeiru-Ministru informa, Fundu Dezenvolvimentu Kapitál Humanu (FDCH) sei ajuda formasaun rekursu humanu ne’ebe bele halo jestaun ba atividade hotu-hotu, bele apoiu formasaun sientifika ba jornalista no média sira hodi aumenta kualidade informasaun.

“Ba politika la’os imi tenki tama ba partidu sira, maibé imi tenki hatene katak ita nia nasaun hari’i dadauk ona husi baze, mai sentral sai uma boot, ne’e duni Fundu Dezenvolvimentu Kapitál Humanu atu ajuda formasaun rekursu humanu ne’ebe bele halo jestaun ba atividade hotu-hotu”. Dehan PM Xanana Gusmão liu husi nia diskursu. Hafoin partisipa iha serimónia atribuisaun sertifikadu apresiasaun ba média nasionál sira, Sabadu, (05/10/2024)

Xefi Governu hatutan, iha Estadu Direitu Demokratiku, liberdade buras iha Timor-Leste, maibé la signifika katak numeru jornalista aumenta, asuntu liberdade la’o diak ona, maibé jestor média sira tenki buka hadia produsaun ba notisia liu-liu area oin-oin.

“Jornalista barak, ita nia imprensa la’o diak ona, imi tenki hadia nafatin, haka’as an nafatin, kona-ba diplomasia jornalista buka aprende, atu nune’e plataforma barak tebe-tebes ne’ebé akumula iha media, balun iha koiñesementu iha area finansas, diplomasia, balun bele preparadu liu iha politika, no balun iha seguransa, selae ita ko’alia mais ita sai asal buni (informasaun falsa ka laiha dadus/faktus), ida ne’e mak ita tenki prepara rekursu umanu ne’ebe kualifikadu iha area oin-oin hodi halo kobertura kobre aspetu hotu-hotu”.

Governu aprofunda nia konfiansa ba média sira katak, papel média importante ba imprensa ne’e hodi bele halo analiza kritika molok lansa informasaun, tamba konstrusaun nasaun laos de’it halo lansamentu, maibé liu husi prosesu.

“Ida ne’e apelu ida ba imi laos de’it atu fó informasaun mai hakilar, halo analiza molok lansa informasaun ba públiku ho koiñesementu sientífiku no tékniku, halo analiza hakerek, tamba Fundu Dezenvolvimentu Capitál Humanu prontu atu simu kanditu husi kada instituisaun média sira, lalika hanoin atu ba buat oin-oin, maibé importante liu média sira iha intelijente politika redasaun nian hodi verifika notisia sira ho balansu”.deklara Xanana

Xanana afirma katak, Governu iha planu estratéjiku atu oferese bolsa kandidatu ba média sira ne’ebe interese hodi hasa’e abilidade média nian no hasa’e numeru rekursu humanu iha Timor-Leste, nune’e média sira bele aumenta kbiit opiniaun no informasaun hodi apoiu atividade média nian.

Portantu Primeiru-Ministru prefere ba SECOMS atu bele kria komisaun ida hodi halo kontrolu ba ramo atividade jornalistiku ne’ebe kada tinan média sira halo produsaun, hodi nune’e bele limita informasaun falsa no hadia imprensa iha Timor-Leste.

Entretantu, Governu liu husi Sekretáriu Estadu Comunicão Sosiál (SECOMS) distribui sertifikadu apresiasaun ba média nasionál hanesan SAPNews, Radio Televizaun Timor-Leste (RTTL), GMN, jornal Timor Post, Jornal Díli Post, Jornal Independente, Lafaek News, G-News, Média Mudansa, Labeh TV, MFTV, Média ONE Timor, SMNews, Loluari, VIP TV, STL, inklui parseiru sira hanesan Telkomcel, Telemor, TIC Timor, no seluk tan.

Jornalista : Dircia Baptista Belo