![Atleta Amandio Ho Abilio Preparadu Kompete Sea Para Games 2023 Atleta Amandio Ho Abilio Preparadu Kompete Sea Para Games 2023](https://sapnewstl.com/wp-content/uploads/2023/04/IMG20230410105525-scaled.jpg)
Atleta Amandio Ho Abilio Preparadu Kompete Sea Para Games 2023
Imajen: Atleta Defisiente Amandio Martins Husi Modalidade Xadres Iha Kazerna Tasi Tolu, Dili Segunda (10/04/2023).
SAPNewsTL, Dili: Atleta Amandio Martins no Abilio de Araújo husi modalidade xadres preparadu lori Timor-Leste nia naran hodi kompete Sea Para Games iha Cambodia tinan 2023
“Ami prepara ona liu husi treinu atu ba kompete hasoru atleta sira husi nasaun seluk iha Sea Para Games iha Cambodia tinan 2023 nune’e ami sei esforsu tanba jogu xadres ne’e kakutak mak servisu makaas estuda oponente nia jogu tan ne’e hau nu’udar atleta sei jogu iha blind tenki iha kuñesimentu ba kaer aifuan ema nian ho ita nian, ida ne’e durante ne’e ami nia treinador treinu ba ami”, atleta Amandio Martins ba jornalista sira iha kazerna Tasi Tolu, Dili segunda (10/04/2023).
Amandio hatutan, durante preparasaun ne’e sira seidauk hetan difikuldade ruma tanba sira nia treinador akompaña nafatin sira treinu no treinu lao diak tebes.
Iha fatin hanesan atleta xadres Abilio de Araújo dehan, nia sente kontente lori Timor-Leste nia naran ba kompete iha Sea Para Games Cambodia tinan 2023 tanba sira nia preparasaun iha kazerna lao diak tebes
“Hau sente kontente tanba hau bele lori Timor-Leste nia naran ba kompete iha Sea Para Games Cambodia iha tinan ne’e liu husi federasaun xadres defisiente nian, durante ami halo preparasaun iha kazerna lao diak tebes ami sei hatudu jogu tuir treinamentu durante treinador fo treinu ne’e”, tenik Abilio
Abilio informa, esperansa ba joga iha Sea Para Games Cambodia tinan 2023 seidauk promete atu hetan medalla tanba jogu iha lakon ho manan karik lakon sei hetan esperensia ho tekniku no manan sei lori medalla mai Timor-Leste.
Iha sorin seluk treinador xadres Inocêncio Ximenes hatete, atleta nain rua ne’e sei joga iha blind no fiziku no sira prepradu ona kompete Sea Para Games Cambodia 2023
“Ita nia atleta nain rua, Amandio Martins sei joga iha blind no Abilio de Araújo sei joga iha fiziku nian, durante preparasaun iha kazerna sira seidauk hasoru difikuldade ruma, dalabarak ita nia atleta sira treinu kalan tanba hakarak evita ema barullu tanba jogu xadres uza kakutak mak makaas liu ne’ebe labele rona ema barullu no ita nia atleta nain rua ne’e preparadu ona para kompete iha Sea Para Games Cambodia 2023”, treinador hateten
Treinador haforsa tan, preparasaun Atleta nain rua husi xadres atu kompete Sea Para Games iha Cambodia tinan 2023 halo preparasaun durante semana rua ona iha kazerna Tasi Tolu, sira nia preparasaun lao diak tebes, sira treinu iha kazerna laran deit tanba sira tuur deit utiliza konsentrasaun makaas liu husi kakutak sira nia preparasaun iha kazerna durante fulan rua nia laran ne’e sente masimu ona ba atleta sira kompetente iha Sea Para Games tinan ne’e.
Inocêncio akresenta, nia sei la promete atleta nain rua ne’e hetan medalla maibe rezultadu mak sei determina liu kapasidade atleta nain rua ne’e iha maski SEJD iha tarjetu ba atleta sira kompete laos partisipa
Entretantu Atleta husi modalidade xadres ne’ebe mak sei kompete iha Sea Para Games 2023 iha Cambodia hamutuk nain rua, Amandio Martins no Abilio de Araújo ho treinador ida no ofisial ida, sira halo preparasaun iha kazerna durante fulan rua komesa iha loron 20 fulan marsu to’o 19 fulan maiu 2023.
Reportajen: Augusto dos Santos