Atleta Pascoela Prontu Kompete Iha Sea Para Games 2023
Imajen: Atleta Pascoela dos Santos Pereira Husi Modalidade Tenis Meja Iha Hato'o hela Infomasaun Preparasaun Nian Ba Sea Para Games 2023 Iha Kazerna Tasi Tolu, Dili Segunda (10/04/2023).
SAPNewsTL, Dili: Atleta Pascoela dos Santos Pereira husi modalidade tenis meja prontu ona atu kompete iha Sea Para Games 2023 iha Cambodia.
“Durante ne’e ami halo preparasaun iha kazerna hau prontu ona atu kompete iha Sea Para Games 2023 iha Cambodia maibe hau seidauk promete atu manan medalla tanba adversariu sira husi nasaun sira seluk mos hakarak manan maibe hau sei esforsu hodi aplika jogu ne’ebe durante hau hetan iha preparasaun husi hau nia treinador”, dehan atleta Pascoela dos Santos Pereira ba jornalista sira iha kazerna Tasi Tolu, Dili segunda (10/04/2023).
Atleta ne’e hatutan, durante halo preparasaun iha kazerna semana rua liu ona sira seidauk hetan difikuldade ruma, sira halo treinu kada loron iha dader no loraik no sira hala’o sira nia treinu ne’e iha kazerna laran deit.
Pascoela informa, sira halo preparasaun iha kazerna ne’e durante fulan rua no sira sente durasaun ne’e masimu ona ba sira para kompete iha Sea Para Games 2023 iha Cambodia.
Entretantu atleta husi modalidade tenis meja hamutuk nain haat mane rua ho feto rua mak sei kompete iha Sea Para Games iha Cambodia tinan ne’e ho treinador ida no ofisial ida, sira hala’o preparasaun iha kazerna komesa iha loron 20 fulan marsu to’o loron 19 fulan maiu 2023.
Reportajen: Augusto dos Santos