Atleta TL Nain-4 Konfirmadu Hetan Wildcard Kompete Jogu Olimpiade 2024

SAPNewsTL, Dili – Atleta Timor-Leste (TL) husi modalidade taekwondo, atletizmu no natasaun konfirmadu hetan wildcard kompete jogu olimpiade 2024 iha sidade Paris, Fransa.

“Lista foin tama ikus mak atleta husi federasaun taekwondo, nune’e lista atleta definitivu ita iha ona atleta nain haat, atleta natasaun nain rua, atletizmu ida no taekwondo ida mak sei kompete jogu olimpiade 2024 iha sidade Paris, Fransa”, dehan Vise Prezidente CONTL Vicente Carvalho ba jornalista sira iha salaun JL Vila Fatuhada, Dili sabadu (01/06/2024).

Vise Prezidente hatutan, tempu badak CONTL sei aprezenta lista atleta ba governu kona ba partisipasaun atleta Timor-Leste ba jogu olimpiku iha nasaun Fransa tinan ne’e, atleta nain haat deit mak hetan wildcard hodi partisipa jogu olimpiku 2024 iha Fransa ne’e tanba atleta sira ne’e la pasa iha jogu kualifikasaun.

Vicente informa tan, Timor-Leste iha atleta nain lima husi federasaun lima mak hetan apoiu husi olimpiku solidariedade nian maibe atleta sira ne’e IOC la aprova tanba sira nia rekor kiik demais iha jogu kualifikasaun nian.

“Tanba atleta husi nasaun barak mak aplika ba kouta wildcard nian, nune’e Timor-Leste atleta nain haat deit mak hetan wildcard hodi partisipa jogu olimpiku tinan ne’e”.nia informa

Entretantu, Atleta Timor-Leste durante ne’e partisipa iha jogu kualifikasaun mak atleta husi federasaun taekwondo, halterofilizmu, karate-do, atletizmu no natasaun.

Reportajen: Augusto dos Santos