Laiha Atividade, CDTL Notifika Federasaun Desportivu 7
Imajem : Prezidente CDTL Macario F. Sanches ko’alia ho jornalista sira iha salaun JL Vila Fatuhada, Dili sabadu (01/05/2024).
SAPNewsTL, Dili: Konfederasaun Desportu Timor-Leste (sigla portuges CDTL) notifika ona federasaun desportiva hitu tanba durante la iha atividade iha organizasaun nian.
“Ita notifika ona federasaun sailing, teqball, Netball, Rama Hana, Tenis Meza, Kanoajen no Billiard tanba federasaun sira ne’e la iha atividade durante ne’e, federasaun sira ne’e la funsiona, sira nia atividade la iha, ita fo ona nofikasaun dahuluk ba loron 60 nian, sira informasaun negativu tanba federasaun sira ne’e seidauk halo buat ruma”.
“Entaun ita fo fali ona notifikasaun daruak tan ba loron 45 nian, husi notifikasaun daruak ne’e, federasaun balun halo ona movimentu inklui federasaun rama hana reorganiza fali estrutura foun liu husi asembleia jeral extraordinariu”, Prezidente CDTL Macario F. Sanches ba jornalista sira iha salaun JL Vila Fatuhada, Dili sabadu (01/05/2024).
Prezidente hatutan, iha mos federasaun tenis meza komesa reorganiza fila fali, notifikasaun daruak durante 45 mak federasaun la fo nafatin resposta pozitivu sira halo notifikasaun ikus ba loron 15 nian, federasaun nafatin la fo responde mak CDTL sei halo suspensaun ba federasaun sira ne’e, nune’e sira labele asesu fundu husi governu depois sira organiza fila fali federasaun mak submete aplikasaun fila fali mai CDTL hodi sai membru fali.
Macario hatutan, federasaun sira ne’e balun sei halo fali audiensia ho CDTL para atu hare’e didiak rekezitu sira nune’e ekipa CDTL prontu halo audiensia iha loron servisu nian, rekezitu importante ida mak halo kongresu nasional hanesan ohin loron 1 fulan juñu federasaun rama hana ho voleibol halo kongresu hili estrutura foun.
Reportajen: Augusto dos Santos