Atoni Oan 992 Tuir Teste ! Rogerio : Atu Manan Buat Ruma Tenki Halo Sakrifisiu
SAPNewsTL, RAEOA : Presidente Autoridade Rejiaun Administrativa Espesiál Oé-Cusse Ambeno (RAEOA) Rogério Tiago de Fatima Lobato, hamutuk Sekretáriu Estadu ba Formasaun Profisionál no Empregu, Rogério Araújo Mendonça, no Koordenador Komisaun Zonna Ekonómia Dezenvolvimentu Espesiál Oé-Cusse Ambeno (ZEDOA) João Gonalves halo abertura teste ba Kandidatu Traballadór sira no estabelese kursu lian Inglês ho Koreia iha RAEOA.
Iha biban ne’e, Prezidente Autoridade RAEOA Rogério Tiago de Fatima Lobato fo bemvindu ba prezensa Sekretáriu Estadu ba Formasaun Profisionál no Empregu (SEFOPE) no simu ho laran sentimentu orgullu tanba SEFOPE prepara ona rekursu hodi haruka ba servisu iha li’ur.
“Ha’u hato’o bemvindu ba SEFOPE no simu ho laran kontente tanba SEFOPE prepara ona ema barak teb-tebes haruka ba servisu iha li’ur pur volta 14 míl e tal liu iha Australia la konta ba iha Koreia dó súl”. Tenik Presidente Autoridade Rejiaun Administrativa Espesiál Oé-Cusse Ambeno (RAEOA) Rogério Tiago de Fatima Lobato, iha RAEOA, 24/02/2024
Rogerio Lobato konsidera “Australia paiz ida di’ak maibé la’os aliadu, paiz amigu hamutuk ho ita iha susar no laran luak fó fatin ba ema rihun sanulu resin haat atu ba servisu iha ne’ebá, ho traballadór sira bele dehan Portugés são criadoores da riqueza, sira maka kria rikeza, tanba sira iha ne’e moris iha susar laran, família sira laiha osan, uma ladi’ak, sira halo sakrifísiu tuir formasaun iha ne’e ba servisu iha Australia haruka sira nia osan mai iha Timor, atu bele foti ita-nia rai. Ne’e ita bele dehan mós katak ita kria rikeza ba rai ida ne’e”.
Eis Ministru Interior mós konsidera programa sira ne’ebé SEFOPE organiza ne’e kria alternativa ba ema ne’ebé lahetan servisu iha estadu, sira bele hetan servisu iha rai liur atu hadia kualidade moris familia nian ho diak iha futuru.
Prezidente Autoriedade RAEOA ne’e afirma nia parte sei estabelese akordu ida atu muda situasaun Oé-cusse oan sira oinsa bele asesu kampu servisu iha rai liur tanba durante ne’e Oe-Cusse oan uituan mak hetan servisu.
“Ha’u sente katak tuir SEFOPE sira foin forma Oé-cusse fatin ida ne’ebé ema oituan liu maka ba servisu iha rai li’ur, ita tenke muda situasaun ida ne’e tanba ne’e ha’u horiseik hasoru malu ho Sekretáriu Estadu ba Formasaun Profisionál no Empregu, ami sei asina memorandum understand ida atu halo ligasaun entre SEFOPE sentrál ho RAEOA metin liután”.nia afirma
Lider RAEOA ne’e mos fo agradese ba SEFOPE tanba bele halo koperasaun diak ho formandu sira, nia mos husu ba kandidatu traballador sira atu aprende ho diak tanba atu manan buat ruma tenki halo sakrifisiu uluk.
“Agradese ba Sekretariu Estadu Profesional no Empregu (SEFOPE) ho formadu sira nia kooperasaun, no husu kandidatu sira aprende halo di’ak, aprende ho fuan halo sakrifísiu, atu manán buat ruma, tenke halo sakrifísiu hodi manán buat ida maka di’ak liu aprende lian Inglês”,dehan Prezidente Autoridade RAEOA.
Entretantu, abertura ba teste ba Kandidatu Traballadór ba Australia hosi Oé-cusse hamutuk na’in 992 mak liu ona selesaun dokumentu hosi online no estabelese ona kursu lian Inglês ho Koreia iha nivel Rejionál atu prepara no kapasita joven Oé-cusse oan aprende lian Inglês no Koreia hodi bele kompete iha kampu traballu rai laran no rai li’ur.
Enkuantu, Marka prezensa iha abertura seremonia ne’e maka Prezidente Autoridade RAEOA, SEFOPE, Membru Autoridade, reprezentante Komisaun B Parlamentu Nasional, reprezentante Embaixada Australia, Komandante PNTL Rejional Oe-Cusse, Komandante F-FDTL destakdu Oe-Cusse hosi komponente Naval ho Terrestre inklui Kandidatu sira.
Reportajem : Ariqui Crisanto Colo