Atualiza Servisu Ba Assanami, Rede Feto Sei Realiza Kongresu Iha Fulan Ne’e
Imajem : Prezidente Rede Feto ho estrutura hala’o sorumutu ho Vise Primeiru Ministru Mariano Assanami Sabino iha Palasiu Governu Dili, 09/12/2024.
SAPNewsTL, Dili : Lideransa Rede Feto Timor-Leste (RD-TL) hala’o sorumutu ho Vise Primeiru Ministru, Kordenador Asuntu Sosiais, MDRHC Mariano Assanami Sabino hodi atualiza servisu durante ne’e no apresenta kalendáriu kongressu rede feto ne’ebé sei realiza iha Dezembru 2024.
Objetivu hosi sorumutu ne’e hodi ko’alia kona ba kolaborasaun servisu, kalendáriu kongresu nasionál rede feto, no konvida hodi sai orador iha kongresu mai.
Vise Primeiru Ministru, Kordenador Asuntu Sosiais, Ministru Dezenvolvimentu Rural no Habitasaun Komunitáriu (MDRHC) Mariano Assanami Sabino apresia ba servisu no kontribuisaun hotu ne’ebé rede feto dedika ba feto sira hotu iha Timor-Leste.
Vise Primeiru Ministru ne’e afirma nia parte sei kontinua apoia ba Rede Feto ninia ezisténsia no desenvolvimentu ba futuru inklui sei sai orador iha kongresu tuir mai tanba partisipasaun feto importante tebes ba prosesu kontrusaun estadu no konstrusaun nasaun.
“Ha’u prontu ba partisipa hodi sai orador tanba papel feto importante tebes ba sivilizasaun no sai ajente ba dezenvolvimentu”.Tenik Vise PM Mariano Assanami Sabino iha Palasiu Governu Dili, 09/12/2024
Prezidente Rede Feto Zelia Fernandes agradese ba Vise Primeiru Ministru Mariano Assanami tanba bele simu audiénsia hodi atualiza servisu sira no fahe hanoin malu kona ba dezenvolvimentu feto inklui kongresu rede feto ne’ebé sei hala’o iha loron 17-20 fulan dezembru tinan ne’e.
“Ohin rede feto mai atu atualiza informasaun ba Sua Ekselénsia depoizde finaliza Konferénsia Feto Munisipál iha Munisípiu 12 no RAEOA, Aprezenta ajenda ba VI Kongresu Feto Nasionál ne’ebé sei hala’o iha loron 17-20 Novembru 2024 no konvida Vise PM atu sai oradór hodi ko’alia kona-bá “Erradikasaun Pobreza no Dezenvolvimentu Sustentável”.
Nia hatutan, Vise Primeiru Ministru prontu atu partisipa tanba konsidera feto nia prezensa no feto nia papél iha sosiedade liuliu ba ajente sivilizadora no ajente ba dezenvolvimentu importante ba futuru.
Durante sorumutu, parte rua kompartilla ba malu esforsu ne’ebé parte rua sei halo hodi asegura direitu, dignidade no dezenvolvimentu feto sira nian iha presente no futuru.
Jornalista : Dircia Baptista Belo & Eleonora Fátima dos Santos