Autoriedade Bobonaro Rekonese La Fasil Realiza Festival
SAPNewsTL, Bobonaro: Autoriedade Munisipiu Bobonaro rekonese la fasil sai uma nain ba realizasaun Festival Fronteira 2023 ho tema interkambiu kultural ba hametin rekonsiliasaun tanba nu’udar eventu internasional tanba konvida povu Nusa Tengara Timur (NTT).
“Ita realiza eventu boot saida deit ne’e sempre hetan difikuldade, nune’e realizasaun Festival Fronteira 2023 ne’e festa internasional mezmu realiza iha Munisipiu Bobonaro hodi naran Timor-Leste, la fasil tanba sira halo preparasaun fulan ida nia laran deit”.
“Nune’e ami hetan failansu preparasaun fatin ba bainaka sira no konsumu tanba han hemu la tuir oras determina iha ajenda, halo ita nia kompania (catering) prepara hahan okupadu tebes ba matabisu ho han meudia” dehan Prezidente Autoriedade munispiu Bobonaro Ernesto de Oliveira Barreto ba jornalista sira iha resintu jinajiu munispal Maliana, Bobonaro sabadu (18/11/2023).
Prezidente hatutan, festival ne’e maski sira hetan difikuldade maibe sira kontinua lao ba oin to’o susesu tanba ne’e festival ba dahuluk iha Timor-Lest, nune’e sempre la ses husi failansu kiik sira.
Tan ne’e Prezidente Autoriedade ne’e hakarak rekomenda ba governu katak tinan oin karik realiza tan iha RAEOA ka munisipiu Covalima tenki lao diak duke festival ida agora ne’e tanba difikuldade agora hetan ne’e sai referensia.
Ernesto informa tan, hakarak fo mensajen ba sosiedade sira hotu liuliu sira la marka prezensa iha interkambiu kultural ba hametin rekonsiliasaun entre povu Timor-Leste ho NTT hahu iha loron 15 to’o 18 fulan novembru 2023 katak akontesimentu uluk liu ona iha 1999 ne’e soe ona ba kotuk.
Tanba ho konflitu ohin goza ukun an ida ne’e nune’e hakarak ka lakoi tenki simu malu fali, dame tanba povu Timor-Leste ho NTT kultura ida deit.
Reportajen: Augusto dos Santos