Alcino : Juventude Bobonaro Maioria Partisipa Festival Fronteira
SAPNewsTL, Bobonaro: Diretor Ezekutivu Juventude Munisipiu Bobonaro Alcino Lopes hatete, juventude maioria husi munisipiu Bobonaro partisipa Festival Fronteira 2023 ho tema interkambiu kultural ba hametin rekonsiliasaun tanba hakarak asiste dansa kultura no konsertu.
“Festival Fronteira 2023 ho tema interkambiu kultural ba hametin rekonsiliasaun iha munisipiu Bobonaro, ami hare’e juventude munisipiu Bobonaro nia partisipasaun masimu tebes tanba sira kontente ho prezensa festival ida ne’e, asiste konsertu no dansa kultura husi grupu Timor-Leste ho NTT”, dehan diretor ezekutivu juventude munispiu Bobonaro Alcino Lopes ba jornalista sira iha resintu jinajiu munisipal Maliana, Bobonaro sabadu (18/11/2023).
Diretor hatutan, juventude husi munisipiu Bobonaro laos asiste deit maibe sira mos aprezenta dansa kultura ho kanta espresa sira nia talenta hamutuk ho grupu sira mai husi NTT no munisipiu sira seluk.
Alcino informa tan, grupu husi munisipiu Bobonaro aprezenta dansa kultura no kanta muzika ne’e sira halo preparasaun masimu tebes, nune’e grupu dansa kultura mai husi munisipiu bobonaro hamutuk rua no kanta iha grupu tolu, X-Cruz Maliana, Alkaris no kuda ulun hamutuk komunidade munisipiu Bobonaro harame tebes festival ida ne’e.
Nia afirma tan, liu husi festival hakarak fo mensajen ba juventude Timor-Leste liuliu munisipiu Bobonaro tenki hatudu maturidade tanba joven mak sai fundamentu ba paz no estabilidade tanba seguransa iha juventude sira nia liman.
Reportajen: Augusto dos Santos