Avelino : Abríl, Rekrutamentu Juri Bá Selesaun Kargu Juíz Tribunál Justisa & Rekursu

‎‎

Imajem : Komisaun Rekrutamentu aktualiza preparasaun ba Primeiru Ministru Kay Rala Xanana Gusmão iha Palásiu Governu, 02/03/2026. Foto : Média GPM

SAPNewsTL, Dili – Prezidente Komisaun Rekrutamentu, Avelino Coelho  informa komisaun rekrutamentu no selesaun bá kargu juíz Tribunál Justisa no juíz Tribunál Rekursu sei loke prosesu rekrutamentu bá juri iha fulan Abríl 2026.

‎‎‎‎Durante sorumutu, Avelino Coelho esplika kona-bá atividade ne’ebé hala’o desde simu knaar no selesaun bá primeiru movimentu bá Juíz Supremu Tribunál Justisa no Tribunál Rekursu.

‎‎Tuir lejislasaun, Komisaun presiza aprova uluk dokumentus antes tama bá faze rekrutamentu juri, tanba ne’e ekipa atualiza ona bá PM Xanana kona-bá atividade ne’ebé halo tiha ona liga ho aprovasaun regulamentu avaliasaun rejimentu internu ho manuál operasionál juri nian.

‎‎“Ami iha fulan ida bá aprovasaun dokumentus ne’ebé lejislasaun ne’e husu. Segundu, abríl mak ami foin hahú loke prosesu rekrutamentu juri entre na’in tolu ka lima. Bainhira juri sira prontu ona mak foin loke vaga bá konkursu kona-bá Supremu Tribunál Justisa na’in-hitu no bá Tribunál Rekursu na’in-sia,” hateten Avelino Coelho iha Palásiu Governu, segunda (02/03/3036).

‎‎Avelino hatutan juíz hotu-hotu ne’ebé hala’o knaar durante tinan 10, bele tuir konkursu bá Supremu Tribunál Justisa, alende ne’e jurista sira, advogadu sira, defensór no Prokuradór Repúblika mós bele tuir konkursu bá Supremu Tribunál Justisa maibé tenke iha esperiénsia profisionál durante tinan 15.

‎‎Tuir Lei, presija juri ne’ebé tenke juíz konsilleiru maibé to’o agora Estadu Timor-Leste seidauk iha juíz konsilleiru tanba ne’e lejislasaun iha parte tranzisaun nian fó dalan atu juri sira-ne’e pelumenus prienxe kritériu rua, primeiru tenke hosi país ne’ebé ko’alia Lian Ofisiál Portugés. Tanba ne’e sei loke konkursu bá juri sira-ne’e sei mai hosi liur atu labele mosu deskonfia-malu no duun-malu.

‎‎Lei mós fó dalan bá akadémiku sira bele tuir, maibé tenke formadu iha área direitu no hala’o knaar iha área justisa nian durante tinan 15, ne’e bá Supremu Tribunál Justisa. Kona-bá Tribunál Rekursu, tenke juíz sira de’it ho esperiénsia mínimu tinan-ualu.

‎‎Hafoin rona tiha atualizasaun hosi Komisaun ne’e, Primeiru-Ministru mós fó orientasaun atu haree kestaun balun ne’ebé nasesáriu-liu iha futuru.

‎‎Tuir planu, atividade ne’ebé Komisaun halo sei entrega bá Xefe Governu no entre 30 Agostu ka posibilidade 28 Setembru bele estabelese ona Tribunál Supremu Justisa ne’ebé sei garante kualidade no imparsialidade tanba juri sira mak sei fó teste iha Lian Portugés.

‎‎Avelino Coelho assume kargu hanesan Prezidente bá Komisaun rekrutamentu no selesaun bá kargu juíz Tribunál Justisa Timor-Leste nian hanesan responsável hodi garante selesaun transparente no justa bá kandidatu juíz Tribunal Justisa nian.

‎‎Iha funsaun ne’e, Avelino Coelho koordena Komisaun ne’ebé involve prosesu rekrutamentu no selesaun bá juízes Tribunál Justisa, inklui entrevista, análize meritokrátika no verifikasaun kandidatu ho rekezitus legais ne’ebé estabelesidus iha Konstituisaun Repúblika.

‎‎Avelino Coelho ho karreira direitu no justisa iha Timor-Leste ne’ebé riku esperiénsia iha administrasaun públika no direitu konstitusionál.