Baucau : Ai Hanehan Natacia Ho Idade 21 To’o Lakon Vida

Imajem : Ai Hanehan Natacia Joselina Belo Fraga iha Suku Tirilolo, Postu Administrativu Baucau, 19/01/2026.

SAPNewsTL, Baucau : Ligadu ho ai-hun ida ne’ebe monu iha Suku Tirilolo, Postu Administrativu Baucau rezulta Natacia Joselina Belo Fraga ho idade 21 lakon vida tanba vítima nia kakorok kotu no hetan pankada makaas iha ulun.

Hafoin akontesimentu ai hanehan Natacia Joselina Belo Fraga iha oras 09:30 iha Aldeia Lutumutu, Suku Tirilolo, Postu Administrativu Baucau., Komandu Autoridade Protesaun Sivíl Munisípiu Baucau, liu husi Korpu Bombeiros Brigada l lidera husi Xefe Seksaun Antonio da Costa ho ekipa inklui familia husi vítima evakua vítima ba Hospitál HOREX Baucau maibé la konsege salva nia vida.

Tuir publikasaun ne’ebe Pajina Ofisial Autoridade Protesaun Sivil Timor-Leste fo sai katak iha dader vítima Natacia Joselina Belo Fraga fase hela roupa iha torneira ne’ebe besik uma derepente ai kafe monu no hanehan vítima to’o rezulta nia kakorok kotu.

Kronolojia husi akontesimentu refere, tuir esplikasaun familia vítima nian katak “iha dader vítima Natacia Joselina Belo Fraga fase hela roupa iha torneira ne’ebe besik uma derepente ai kafe monu no hanehan vítima”. Sita Pajina Ofisial Autoridade Protesaun Sivil, Baucau,19/01/2026. Hakerek Média APC Baucau Natalia Guterres.

Iha momentu ne’e kedas, familia vítima no ekipa Korpu Bombeiros hasai vítima husi ai ne’ebe hanehan no evakua kedas ba ospital maibé lakonsege salva nia vida tanba vítima nia kakorok kotu no nia ulun hetan pankada makas husi ai refere.

Hafoin akontesimentu ne’e, imediatamente ekipa Bombeiros kontinua tesi ai ne’ebé monu hanehan vítima inklui tesi mos ai ne’ebé fo ameasa ba familia ne’ebé hela iha fatin refere.